1 Chronicles 10

2 Kings  «  1 Chronicles 9  ‹  1 Chronicles 10  ›  1 Chronicles 11  »  2 Chronicles

ՍԱՒՈՒՂ ԹԱԳԱՒՈՐԻՆ ՄԱՀԸ (Ա. Թագ. 31. 1-13)

Փղշտացիները Իսրայէլի դէմ պատերազմեցան։ Իսրայելացիները Փղշտացիներուն առջեւէն փախան, ու Գեղբուէ լերան վրայ խոցուած ինկան։

Փղշտացիները Սաւուղի եւ անոր որդիներուն ետեւէն հասան, ու Փղշտացիները Սաւուղի որդիները՝ Յովնաթանը, Աբիադաբն ու Մեղքիսաւէն զարկին։

Պատերազմը Սաւուղի վրայ հետզհետէ սաստկացաւ, եւ ¹աղեղնաւորները զայն գտան։ Աղեղնաւորներէն վիրաւորուելով՝

Սաւուղ իր զինակիրին ըսաւ. «Սո՛ւրդ քաշէ եւ անով զի՛ս խոցէ, որ այս անթլփատները չգան ու զիս չանպատուեն»։ Բայց զինակիրը չուզեց, քանի որ շատ վախցաւ. ուստի Սաւուղ սուրը առաւ եւ անոր վրայ ինկաւ։

Անոր զինակիրը Սաւուղի մեռնիլը տեսնելով՝ ի՛նք ալ իր սուրին վրայ ինկաւ, ու մեռաւ։

Այսպէս մեռան Սաւուղ եւ անոր երեք որդիները. անոր ամբողջ տունն ալ միասին մեռաւ։

Հովիտին մէջ եղող բոլոր Իսրայելացիները, տեսնելով անոնց փախչիլն ու Սաւուղի եւ անոր որդիներուն մեռնիլը, իրենց քաղաքները լքեցին ու փախան։ Փղշտացիներն ալ եկան եւ անոնց մէջ բնակեցան։

Հետեւեալ օրը Փղշտացիները եկան՝ որ սպաննուածները մերկացնեն, ու Սաւուղը եւ անոր որդիները Գեղբուէի լերան վրայ փռուած գտան։

Զայն մերկացուցին, անոր գլուխն ու զէնքերը առին, եւ Փղշտացիներու երկրին ²չորս կողմը՝՝ մարդ ղրկեցին՝ այս բաները աւետելու իրենց կուռքերուն ու ժողովուրդին։

Անոր զէնքերը իրենց աստուծոյն տունը դրին, իսկ անոր գլուխը Դագոնի տան մէջ գամեցին։

Երբ Գաղաադի Յաբիսի բոլոր բնակիչները լսեցին ինչ որ Փղշտացիները Սաւուղի ըրեր էին,

բոլոր կտրիճ մարդիկը կանգնեցան, Սաւուղի մարմինն ու անոր որդիներուն մարմինները վերցուցին, եւ զանոնք Յաբիս բերին. անոնց ոսկորները Յաբիսի մէջ՝ բեւեկնիին տակ թաղեցին, ու եօթը օր ծոմ պահեցին։

Այսպէս մեռաւ Սաւուղ՝ Տէրոջ հանդէպ ուխտազանց ըլլալուն համար. արդարեւ Տէրոջ խօսքը չպահեց, նաեւ վհուկ փնտռեց՝ խորհուրդ հարցնելու համար,

ու Տէրոջ խորհուրդ չհարցուց. ուստի Տէրը զայն մեռցուց, ու թագաւորութիւնը Յեսսէի որդիին՝ Դաւիթի փոխանցեց։