1 Kings 1

2 Samuel  «  2 Samuel 24  ‹  1 Kings 1  ›  1 Kings 2  »  2 Kings

ԴԱՒԻԹ ԾԵՐՈՒԹԵԱՆ ՄԷՋ

Դաւիթ թագաւորը ծերացած ու ¹տարիքը յառաջացած՝՝ ըլլալով, զինք հագուստներով կը ծածկէին, բայց չէր տաքնար։

Ուստի անոր ծառաները իրեն ըսին. «²Մեր տիրոջ՝ թագաւորին համար կոյս երիտասարդուհի մը թող փնտռուի, որ թագաւորին առջեւ կայնի, զայն խնամէ եւ անոր ծոցը պառկի, որպէսզի մեր տէրը՝ թագաւորը տաքնայ»։

Ուստի Իսրայէլի ամբողջ հողամասին մէջ գեղեցիկ երիտասարդուհի մը փնտռեցին, ու Սունամացի Աբիսակը գտնելով՝ զայն թագաւորին բերին։

Այդ երիտասարդուհին շատ գեղեցիկ էր. ան թագաւորը կը խնամէր եւ անոր կը սպասարկէր, բայց թագաւորը զայն չգիտցաւ։

ԱԴՈՆԻԱ ԿԸ ԳՐԱՒԷ ԳԱՀԸ

Այն ատեն Ագգիթի որդին՝ Ադոնիա ³հպարտանալով ըսաւ. «Ե՛ս թագաւոր պիտի ըլլամ»։ Իրեն համար կառքեր ու ձիաւորներ պատրաստեց, նաեւ յիսուն մարդ՝ որ իր առջեւէն վազեն։

Անոր հայրը անոր ⁴կեանքին մէջ բնաւ ⁵յանդիմանած չէր զինք, եւ ըսած չէր. «Ինչո՞ւ այսպէս կ՛ընես»։ Ան շատ վայելչագեղ էր, ու իր մայրը զինք Աբիսողոմէ ետք ծներ էր։

⁶Ան բանակցեցաւ՝՝ Շարուհեայի որդիին՝ Յովաբի եւ Աբիաթար քահանային հետ, որոնք Ադոնիայի հետեւելով՝ անոր օգնեցին։

Բայց Սադովկ քահանան, Յովիադայի որդին՝ Բանեա, Նաթան մարգարէն, Սեմէի, Ռէի, ու Դաւիթի զօրաւոր մարդիկը Ադոնիայի հետ չէին։

Ադոնիա Ռովգէլի աղբիւրին մօտ եղող Զոհողէթի քարին քով՝ ոչխարներ, արջառներ ու պարարտ զուարակներ ⁷զոհեց, եւ իր բոլոր եղբայրները — թագաւորին որդիները — ու Յուդայի բոլոր մարդիկը — թագաւորին ծառաները — հրաւիրեց.

բայց Նաթան մարգարէն, Բանեան, զօրաւորները եւ իր Սողոմոն եղբայրը չհրաւիրեց։

ՍՈՂՈՄՈՆ ԹԱԳԱՒՈՐ Կ’ԸԼԼԱՅ

Հետեւաբար Նաթան Սողոմոնի մօր՝ Բեթսաբէի ըսաւ. «Չլսեցի՞ր թէ Ագգիթի որդին՝ Ադոնիա թագաւոր եղաւ, բայց մեր տէրը՝ Դաւիթ չի գիտեր։

Ուրեմն հիմա եկո՛ւր, կ’աղերսե՛մ, եւ քեզի խրատ մը տամ, որպէսզի քու կեանքդ ու որդիիդ՝ Սողոմոնի կեանքը ազատես։

Գնա՛, Դաւիթ թագաւորին քով մտի՛ր եւ անոր ըսէ՛. “Ո՛վ թագաւոր, իմ տէ՛րս. դուն քու աղախինիդ երդում չըրի՞ր ու չըսի՞ր. "Քու որդիդ՝ Սողոմո՛ն թագաւոր պիտի ըլլայ ինձմէ ետք, եւ անիկա՛ պիտի բազմի իմ գահիս վրայ"։ Ուրեմն ինչո՞ւ Ադոնիա թագաւոր եղաւ”։

Ահա՛ ես ալ ետեւէդ կու գամ, մինչ դուն տակաւին կը խօսիս հոն՝ թագաւորին հետ, ու խօսքերդ կը ⁸հաստատեմ»։

Բեթսաբէ ներքին սենեակը մտաւ՝ թագաւորին քով. թագաւորը շատ ծերացած էր, եւ Սունամացի Աբիսակ թագաւորին կը սպասարկէր։

Բեթսաբէ խոնարհեցաւ ու թագաւորին երկրպագեց։

Թագաւորը ըսաւ. «Ի՞նչ կ’ուզես»։ Ինք ալ անոր ըսաւ. «Իմ տէ՛րս, դուն աղախինիդ երդում ըրիր, ⁹Տէրոջ՝ քու Աստուծոյդ անունով, ըսելով. “Քու որդիդ՝ Սողոմո՛ն թագաւոր պիտի ըլլայ ինձմէ ետք, եւ անիկա՛ պիտի բազմի իմ գահիս վրայ”։

Բայց ահա՛ հիմա Ադոնիա թագաւոր եղած է, ու դուն չես գիտեր, ո՛վ թագաւոր, իմ տէ՛րս։

Ան բազմաթիւ արջառներ, պարարտ զուարակներ եւ ոչխարներ զոհեց, ու թագաւորին բոլոր որդիները, Աբիաթար քահանան ու Յովաբ սպարապետը հրաւիրեց. բայց քու ծառադ՝ Սողոմոնը չհրաւիրեց։

Ուրեմն ո՛վ թագաւոր, իմ տէ՛րս, ամբողջ Իսրայէլի աչքերը քու վրադ են, որպէսզի անոնց իմացնես թէ իմ տիրոջս՝ թագաւորին գահին վրայ իրմէ ետք ո՛վ պիտի բազմի։

Թէ ոչ, երբ իմ տէրս՝ թագաւորը իր հայրերուն հետ քնանայ, ես ու իմ որդիս՝ Սողոմոն մեղաւոր պիտի սեպուինք»։

Մինչ ան տակաւին թագաւորին հետ կը խօսէր, ահա՛ Նաթան մարգարէն հասաւ։

Թագաւորին իմացուցին՝ ըսելով. «Ահա՛ Նաթան մարգարէն եկաւ»։ Երբ ան թագաւորին առջեւ եկաւ, դէմքը մինչեւ գետին խոնարհեցնելով՝ թագաւորին երկրպագեց։

Յետոյ Նաթան ըսաւ. «Ո՛վ թագաւոր, իմ տէ՛րս, միթէ դուն ըսի՞ր. “Ադոնիա՛ թագաւոր պիտի ըլլայ ինձմէ ետք, եւ անիկա՛ պիտի բազմի իմ գահիս վրայ”։

Քանի որ ան այսօր իջաւ, բազմաթիւ արջառներ, պարարտ զուարակներ ու ոչխարներ զոհեց, եւ թագաւորին բոլոր որդիները, սպարապետներն ու Աբիաթար քահանան հրաւիրեց. եւ ահա՛ անոնք անոր առջեւ կ’ուտեն, կը խմեն ու կ’ըսեն. “Ապրի՜ Ադոնիա թագաւորը”։

Բայց զիս՝ քու ծառադ, Սադովկ քահանան, Յովիադայի որդին՝ Բանեան եւ քու ծառադ՝ Սողոմոնը չհրաւիրեց։

Այս բանը արդեօք իմ տիրոջս՝ թագաւորին հրամանո՞վ եղաւ. բայց դուն ծառայիդ չգիտցուցիր թէ քեզմէ ետք ո՛վ պիտի բազմի իմ տիրոջս՝ թագաւորին գահին վրայ»։

Դաւիթ թագաւորը պատասխանեց. «Ինծի՛ կանչեցէք Բեթսաբէն»։ Ան ալ թագաւորին առջեւ եկաւ ու թագաւորին ներկայացաւ։

Թագաւորը երդում ըրաւ եւ ըսաւ. «Իմ անձս ամէն տագնապէ ազատող Տէրը կ’ապրի՛.

ինչպէս քեզի Տէրոջմով՝ Իսրայէլի Աստուծմով երդում ըրի՝ ըսելով. “Քու որդիդ՝ Սողոմո՛ն թագաւոր պիտի ըլլայ ինձմէ ետք, եւ անիկա՛ պիտի բազմի իմ տեղս՝ իմ գահիս վրայ”, ահա՛ այսօր այնպէս պիտի ընեմ»։

Այն ատեն Բեթսաբէ դէմքը մինչեւ գետին խոնարհեցուց, թագաւորին երկրպագեց եւ ըսաւ. «Իմ տէրս՝ Դաւիթ թագաւորը յաւիտեա՛ն ապրի»։

Ապա Դաւիթ թագաւորը ըսաւ. «Ինծի՛ կանչեցէք Սադովկ քահանան, Նաթան մարգարէն ու Յովիադայի որդին՝ Բանեան»։ Անոնք ալ թագաւորին առջեւ եկան։

Թագաւորը անոնց ըսաւ. «Ձեր տիրոջ ծառաները ձեզի՛ հետ առէք, իմ որդիս՝ Սողոմոնը մատա՛կ ջորիիս վրայ հեծցուցէք, եւ զայն Գեհո՛ն իջեցուցէք։

Սադովկ քահանան ու Նաթան մարգարէն զայն հոն թագաւոր թող օծեն Իսրայէլի վրայ. դուք ալ շեփո՛ր հնչեցուցէք եւ ըսէ՛ք. “Ապրի՜ Սողոմոն թագաւորը”։

Իր ետեւէն դո՛ւք ալ բարձրացէք, ու ինք թող գայ եւ իմ գահիս վրայ բազմի. իմ տեղս ի՛նք թագաւոր պիտի ըլլայ, քանի որ ես զի՛նք առաջնորդ ¹⁰նշանակեցի Իսրայէլի վրայ ու Յուդայի վրայ»։

Այն ատեն Յովիադայի որդին՝ Բանեա թագաւորին պատասխանեց. «Ամէ՛ն. Տէրը, իմ տիրոջս՝ թագաւորին Աստուածն ալ այդպէս ըսէ։

Ինչպէս Տէրը իմ տիրոջս՝ թագաւորին հետ էր, Սողոմոնի հետ ալ ըլլայ, եւ անոր գահը իմ տիրոջս՝ Դաւիթ թագաւորին գահէն աւելի ¹¹բարձրացնէ»։

Այն ատեն Սադովկ քահանան, Նաթան մարգարէն ու Յովիադայի որդին՝ Բանեա, ¹²Քերեթիները եւ ¹³Փելեթիները իջան, Սողոմոնը Դաւիթ թագաւորին մատակ ջորիին վրայ հեծցուցին, ու զայն Գեհոն տարին։

Սադովկ քահանան Հանդիպումի վրանէն իւղին եղջիւրը առաւ ու Սողոմոնը օծեց. ապա շեփորը հնչեցուցին եւ ամբողջ ժողովուրդը ըսաւ. «Ապրի՜ Սողոմոն թագաւորը»։

Ամբողջ ժողովուրդը անոր ետեւէն բարձրացաւ. ժողովուրդը սրինգներ նուագելով մեծապէս կ’ուրախանար, այնպէս որ անոնց ձայնէն գետինը կը ¹⁴դղրդար։

Ադոնիա եւ անոր հետ եղող բոլոր հրաւիրեալները լսեցին, մինչ անոնք ճաշը կ’աւարտէին։ Յովաբ շեփորին ձայնը լսելով՝ ըսաւ. «Ի՞նչ է այս դղրդիւնի աղմուկը, որ քաղաքէն կ’ելլէ»։

Մինչ ան տակաւին կը խօսէր, ահա՛ Աբիաթար քահանային որդին՝ Յովնաթան եկաւ։ Ադոնիա անոր ըսաւ. «Եկո՛ւր, քանի որ դուն քաջ մարդ մըն ես, ու բարի աւետիս կը բերես»։

Յովնաթան Ադոնիայի պատասխանեց. «Իրաւ է թէ մեր տէրը՝ Դաւիթ թագաւորը՝ Սողոմոնը թագաւոր նշանակեց։

Թագաւորը Սադովկ քահանան, Նաթան մարգարէն եւ Յովիադայի որդին՝ Բանեան, Քերեթիներն ու Փելեթիները անոր հետ ղրկեց, եւ զայն թագաւորին մատակ ջորիին վրայ հեծցուցին։

Սադովկ քահանան ու Նաթան մարգարէն զինք Գեհոնի մէջ թագաւոր օծեցին եւ անկէ ուրախութեամբ բարձրացան, ու քաղաքը դղրդաց։ Ա՛յս է ձեր լսած աղմուկը։

Նաեւ Սողոմոն թագաւորութեան գահին վրայ բազմեցաւ,

եւ թագաւորին ծառաներն ալ մեր տէրը՝ Դաւիթ թագաւորը օրհնելու եկան, ու ըսին. “Քու Աստուածդ Սողոմոնի անունը քու անունէդ աւելի մեծցնէ, եւ անոր գահը քու գահէդ աւելի բարձրացնէ”։ Թագաւորն ալ իր անկողինին վրայ երկրպագեց։

Նաեւ թագաւորը սա՛ ըսաւ. “Օրհնեա՜լ ըլլայ Տէրը՝ Իսրայէլի Աստուածը, որ այսօր իմ գահիս վրայ բազմող մը տուաւ, ու իմ աչքերս տեսան”»։

Ադոնիայի բոլոր հրաւիրեալները սարսռացին, եւ կանգնելով՝ իւրաքանչիւրը իր ճամբան գնաց։

Ադոնիա ¹⁵Սողոմոնէն վախցաւ. ուստի կանգնելով՝ գնաց ու զոհասեղանին եղջիւրները բռնեց։

Սողոմոնի պատմեցին. «Ահա՛ Ադոնիա Սողոմոն թագաւորէն վախցաւ. ահա՛ ան զոհասեղանին եղջիւրները բռնած է՝ ըսելով. “Սողոմոն թագաւորը այսօր ինծի երդում թող ընէ թէ իր ծառան սուրով պիտի չմեռցնէ”»։

Սողոմոն ըսաւ. «Եթէ ան ¹⁶առաքինի ըլլայ, իրմէ ո՛չ մէկ մազ գետին պիտի իյնայ. բայց եթէ անոր վրայ չարութիւն գտնուի, այն ատեն պիտի մեռնի»։

Սողոմոն թագաւորը մարդ ղրկեց, եւ զայն զոհասեղանէն իջեցուցին։ Ան ալ եկաւ ու Սողոմոն թագաւորին երկրպագեց։ Սողոմոն անոր ըսաւ. «Տո՛ւնդ գնա»։