1 Kings 3

2 Samuel  «  1 Kings 2  ‹  1 Kings 3  ›  1 Kings 4  »  2 Kings

ՍՈՂՈՄՈՆ ԿԸ ԽՆԴՐԷ ԻՄԱՍՏՈՒԹԻՒՆ (Բ. Մնաց. 1. 3-12)

Սողոմոն Եգիպտոսի Փարաւոն թագաւորին խնամի եղաւ. Փարաւոնի աղջիկը առաւ իբր կին եւ զայն Դաւիթի քաղաքը բերաւ, մինչեւ որ իր տան, Տէրոջ տան ու Երուսաղէմի շրջակայ պարիսպին կառուցումը աւարտեց։

Սակայն ժողովուրդը բարձր տեղերու վրայ զոհ կը մատուցանէր, քանի որ մինչեւ այդ օրերը Տէրոջ անունին տուն կառուցանուած չէր։

Սողոմոն Տէրը կը սիրէր, եւ իր հօր՝ Դաւիթի կանոններով կ’ընթանար. միայն թէ բարձր տեղերու վրայ զոհ կը մատուցանէր ու խունկ կը ծխէր։

Թագաւորը Գաբաւոն գնաց, որպէսզի հոն զոհ մատուցանէ. արդարեւ ա՛ն էր ¹գլխաւոր բարձր տեղը։ Սողոմոն այդ զոհասեղանին վրայ հազար ողջակէզ զոհեց։

Գաբաւոնի մէջ՝ Տէրը գիշերը Սողոմոնի երեւցաւ, երազի մէջ։ Աստուած ըսաւ. «²Բա՛ն մը խնդրէ՝ որ քեզի տամ՝՝»։

Սողոմոն ըսաւ. «Դուն քու ծառայիդ, իմ հօրս՝ Դաւիթի հետ մեծ կարեկցութեամբ վարուեցար, որովհետեւ ան քու առջեւդ ճշմարտութեամբ, արդարութեամբ եւ քեզի հանդէպ ուղիղ սիրտով ընթացաւ։ Անոր հանդէպ այս մեծ կարեկցութիւնը ³պահեցիր՝ անոր որդի մը տալով, որ այսօր իր գահին վրայ կը բազմի։

Հիմա, ո՛վ Տէր, իմ Աստուա՛ծս, դուն քու ծառադ իմ հօրս՝ Դաւիթի տեղ թագաւոր նշանակեցիր. բայց ես պզտիկ տղայ մըն եմ, ելլել ու մտնել չեմ գիտեր։

Քու ծառադ քու ընտրած ժողովուրդիդ մէջ է, բազմաթիւ ժողովուրդ մը՝ որ շատութենէն չի համրուիր եւ չի հաշուուիր։

Ուստի քու ծառայիդ ⁴իմաստո՛ւն սիրտ տուր, որպէսզի քու ժողովուրդդ դատէ, ու բարին եւ չարը հասկնայ. արդարեւ այս մեծ ժողովուրդդ ո՞վ կրնայ դատել»։

Այս խօսքը, այսինքն՝ Սողոմոնի այս բանը խնդրելը, Տէրոջ ⁵հաճելի եղաւ։

Ուստի Աստուած անոր ըսաւ. «Քանի այս բանը խնդրեցիր, ու քեզի համար երկար օրեր չխնդրեցիր, քեզի համար հարստութիւն չխնդրեցիր եւ թշնամիներուդ կեանքը չխնդրեցիր, հապա իրաւունքը ⁶հասկնալու խելք խնդրեցիր քեզի համար,

ահա՛ քու խօսքիդ համաձայն ըրի։ Քեզի իմաստուն ու խելացի սիրտ մը տուի, այնպէս որ քեզմէ առաջ քեզի պէս ո՛չ մէկը եղած է, ո՛չ ալ քեզմէ ետք քեզի նման մէկը պիտի ելլէ։

Նաեւ քու չխնդրածդ ալ քեզի տուի՝ թէ՛ հարստութիւն եւ թէ փառք, այնպէս որ քու կեանքիդ բոլոր օրերուն մէջ՝ թագաւորներուն մէջ քեզի պէս մէ՛կը պիտի չըլլայ։

Եթէ իմ ճամբաներէս ընթանաս՝ հրամաններս ու պատուիրաններս պահելով, ինչպէս քու հայրդ՝ Դաւիթ ընթացաւ, քու օրերդ պիտի երկարեմ»։

Սողոմոն արթնցաւ, եւ ահա՛ երազ էր։ Երուսաղէմ եկաւ, Տէրոջ ուխտի տապանակին առջեւ կայնեցաւ, ու ողջակէզներ մատուցանեց եւ խաղաղութեան զոհեր ընծայեց, ու իր բոլոր ծառաներուն խնճոյք սարքեց։

ՍՈՂՈՄՈՆ ԿԸ ԼՈՒԾԷ ԴԺՈՒԱՐ ՀԱՐՑ ՄԸ

Այն ատեն երկու պոռնիկ կիներ թագաւորին եկան եւ անոր ներկայացան։

Կիներէն մէկը ըսաւ. «Ո՜հ, իմ տէրս, ես ու այս կինը մէկ տան մէջ կը բնակինք, եւ նոյն տան մէջ՝ անոր քով զաւակ մը ծնայ։

Իմ ծնանելուս երրորդ օրը՝ այս կինն ալ զաւակ մը ծնաւ։ Մենք միասին էինք. տան մէջ մեզի հետ ո՛չ մէկ օտար կար. միայն մենք երկուքս էինք տան մէջ։

Այս կնոջ որդին գիշերը մեռաւ, քանի որ ինք անոր վրայ պառկած էր։

Կէս գիշերին ելաւ, քու աղախինիդ քնացած ատենը՝ իմ որդիս քովէս առաւ ու զայն իր ծոցը պառկեցուց, իսկ իր մեռած որդին իմ ծոցս պառկեցուց։

Երբ առտուն ելայ՝ որպէսզի որդիս դիեցնեմ, ահա՛ ան մեռած էր։ Երբ առտուն ⁷ուշադրութիւն դարձուցի անոր՝՝, ահա՛ ան իմ ծնած որդիս չէր»։

Իսկ միւս կինը ըսաւ. «Ո՛չ, հապա ողջը ի՛մ որդիս է, իսկ մեռածը՝ քո՛ւ որդիդ»։ Սակայն ⁸առաջինը կ’ըսէր. «Ո՛չ, հապա մեռածը քո՛ւ որդիդ է, իսկ ողջը ի՛մ որդիս է»։ Թագաւորին առջեւ այսպէս կը խօսէին։

Այն ատեն թագաւորը ըսաւ. «Ասիկա կ’ըսէ. “Իմ որդիս այս ողջն է, իսկ մեռածը քու որդիդ է”. անիկա ալ կ’ըսէ. “Ո՛չ, հապա մեռածը քու որդիդ է, իսկ ողջը իմ որդիս է”»։

Ուստի թագաւորը ըսաւ. «Ինծի սո՛ւր մը բերէք». ու թագաւորին առջեւ սուր մը բերին։

Թագաւորը ըսաւ. «Ողջ զաւակը երկուքի՛ բաժնեցէք, եւ կէսը մէկո՛ւն տուէք, կէսն ալ՝ միւսին»։

Այն կինը՝ որունն էր ողջ որդին՝ թագաւորին խօսեցաւ, քանի որ իր ընդերքը բռնկեցաւ որդիին հանդէպ, եւ ըսաւ. «Ո՜հ, իմ տէրս, ողջ զաւակը անո՛ր տուէք, ու զայն բնա՛ւ մի՛ մեռցնէք»։ Բայց միւսը ըսաւ. «Ո՛չ ինծի ըլլայ, ո՛չ ալ՝ քեզի. զայն բաժնեցէ՛ք»։

Այն ատեն թագաւորը պատասխանեց եւ ըսաւ. «Ողջ զաւակը ա՛յս կնոջ տուէք, ու զայն բնա՛ւ մի՛ մեռցնէք, քանի որ ասիկա՛ է անոր մայրը»։

Ամբողջ Իսրայէլը թագաւորին արձակած դատավճիռը լսեց, եւ թագաւորէն վախցան. արդարեւ տեսան թէ անոր վրայ Աստուծոյ իմաստութիւնը կար՝ ⁹իրաւունքը պաշտպանելու՝՝ համար։