1 Kings 9

2 Samuel  «  1 Kings 8  ‹  1 Kings 9  ›  1 Kings 10  »  2 Kings

ԱՍՏՈՒԱԾ ԿՐԿԻՆ Կ’ԵՐԵՒՆԱՅ ՍՈՂՈՄՈՆԻ (Բ. Մնաց. 7. 11-22)

Երբ Սողոմոն Տէրոջ տան ու թագաւորին տան կառուցումը աւարտեց, եւ Սողոմոնի բոլոր ¹բաղձանքները գործադրուեցան,

Տէրը Սողոմոնի կրկին երեւցաւ՝ ինչպէս Գաբաւոնի մէջ երեւցեր էր։

Տէրը անոր ըսաւ. «Իմ առջեւս ըրած աղօթքդ ու աղաչանքդ լսեցի, եւ այս կառուցանած տունդ սրբացուցի, որպէսզի իմ անունս յաւիտեան հոն դնեմ. իմ աչքերս ու սիրտս ²ընդմիշտ հոն պիտի ըլլան։

Եթէ դուն իմ առջեւս քու հօրդ՝ Դաւիթի պէս ընթանաս,— պարկեշտ սիրտով եւ ուղղամտութեամբ ընթանաս,— բոլոր քեզի պատուիրածներս գործադրելով, ու իմ կանոններս եւ ³դատավճիռներս պահես,

քու թագաւորութեանդ գահը Իսրայէլի վրայ յաւիտեան պիտի հաստատեմ, ինչպէս հօրդ՝ Դաւիթի խոստացայ, ըսելով. “Իսրայէլի գահին վրայ քեզմէ մարդ պակաս պիտի չըլլայ”։

Բայց եթէ դուք կամ ձեր որդիները ⁴ինձմէ հեռանաք՝՝, ու ձեր առջեւ դրած պատուիրաններս եւ կանոններս չպահէք, հապա երթաք ուրիշ աստուածներ պաշտէք ու անոնց երկրպագէք,

Իսրայէլը պիտի բնաջնջեմ այն հողին վրայէն՝ որ իրենց տուի. այս տունը՝ որ իմ անունիս համար սրբացուցի՝ երեսէս պիտի ⁵ձգեմ, եւ Իսրայէլ բոլոր ազգերուն մէջ առակ ու կատակի առարկայ պիտի ըլլայ։

Ո՛վ որ այս բարձր տան քովէն անցնի՝ պիտի ապշի ու սուլէ։ Անոնք պիտի ըսեն. “Տէրը ինչո՞ւ այս երկրին եւ այս տան այսպէս ըրաւ”։

Անոնց պիտի պատասխանեն. “Որովհետեւ անոնք լքեցին Տէրը՝ իրենց Աստուածը, որ անոնց հայրերը Եգիպտոսի երկրէն հաներ էր, եւ ուրիշ աստուածներու ⁶յարեցան, անոնց երկրպագեցին ու զանոնք պաշտեցին. այս պատճառով Տէրը անոնց վրայ այս բոլոր չարիքները բերաւ”»։

ՍՈՂՈՄՈՆԻ ՀԱՄԱՁԱՅՆՈՒԹԻՒՆԸ ՔԻՐԱՄԻ ՀԵՏ (Բ. Մնաց. 8. 1-2)

Սողոմոն երկու տուները՝ Տէրոջ տունը եւ թագաւորին տունը՝ քսան տարուան մէջ կառուցանելէն ետք,

քանի Տիւրոսի թագաւորը՝ Քիրամ, մայրիի փայտեր, եղեւնափայտեր ու ոսկի ⁷հայթայթեր էր Սողոմոնի՝ անոր ամբողջ բաղձանքին համաձայն, Սողոմոն թագաւորն ալ Քիրամի քսան քաղաք տուաւ Գալիլեայի երկրին մէջ։

Քիրամ Տիւրոսէն ⁸եկաւ որպէսզի Սողոմոնի իրեն տուած քաղաքները տեսնէ, սակայն ⁹իրեն հաճելի չթուեցան՝՝։

Ուստի ըսաւ. «Եղբա՛յր, այս ի՜նչ քաղաքներ են՝ որ ինծի տուիր», եւ անոնց անունը ¹⁰Քաբողի երկիր ¹¹կոչուեցաւ մինչեւ այսօր։

Քիրամ թագաւորին հարիւր քսան տաղանդ ոսկի ¹²ղրկեր էր՝՝։

ՍՈՂՈՄՈՆԻ ՄԻՒՍ ՆՈՒԱՃՈՒՄՆԵՐԸ (Բ. Մնաց. 8. 3-18)

Ահա՛ւասիկ Սողոմոն թագաւորին ¹³հաւաքած մարդահարկին պատճառը.— Տէրոջ տունը, իր տունը, Մելոնը, Երուսաղէմի պարիսպը, Հասորը, Մակեդդովն ու Գազերը կառուցանել։

(Արդարեւ Եգիպտոսի Փարաւոն թագաւորը բարձրանալով՝ Գազերը գրաւեր եւ զայն կրակով այրեր էր, եւ այդ քաղաքը բնակող Քանանացիները ջարդելով՝ զայն իր աղջիկին — Սողոմոնի կնոջ — տուեր էր իբր օժիտ։)

Սողոմոն Գազերն ու Ստորին Բեթորոնը կառուցանեց,

նաեւ Բահաղէթն ու Թադմորը՝ երկրին անապատին մէջ,

Սողոմոնի բոլոր շտեմարանի քաղաքները, կառքերուն քաղաքները, ձիաւորներուն քաղաքները, եւ այն բոլոր շէնքերը՝ որ Սողոմոն ¹⁴ուզեց կառուցանել Երուսաղէմի մէջ, Լիբանանի մէջ, ու իր տէրութեան ամբողջ երկրին մէջ։

Այն բոլոր ժողովուրդները, որ Ամորհացիներէն, Քետացիներէն, Փերեզացիներէն, Խեւացիներէն ու Յեբուսացիներէն մնացած էին եւ Իսրայէլի որդիներէն չէին,

այսինքն անոնց զաւակները՝ որ անոնցմէ ետք այդ երկրին մէջ մնացած էին ու Իսրայէլի որդիները չէին կրցած զանոնք անճիտել, Սողոմոն զանոնք հարկատու հպատակ ըրաւ մինչեւ այսօր։

Բայց Սողոմոն Իսրայէլի որդիները իրեն ստրուկ չըրաւ. հապա անոնք իր պատերազմիկները, իր ¹⁵պալատականները, վերահսկիչները, զօրավարները, եւ իր կառքերուն ու ձիաւորներուն վերահսկիչներն էին։

Սողոմոնի գործին վրայ եղող վերակացուները հինգ հարիւր յիսուն պետեր ունէին, որոնք գործը կատարող ժողովուրդին վրայ կը տիրապետէին։

Փարաւոնի աղջիկը Դաւիթի քաղաքէն բարձրացաւ իր տունը, որ Սողոմոն անոր համար կառուցաներ էր։ Ապա Մելոնը կառուցանեց։

Սողոմոն տարին երեք անգամ ողջակէզներ ու խաղաղութեան զոհեր կը մատուցանէր՝ Տէրոջ համար կառուցանած զոհասեղանին վրայ, եւ Տէրոջ առջեւ եղող զոհասեղանին վրայ խունկ կը ծխէր։ Այսպէս տունը աւարտեց։

Սողոմոն թագաւորը Եդովմի երկրին մէջ, Կարմիր ծովուն եզերքը, Ելաթի քով եղող Գասիոն-Գաբերի մէջ նաւատորմ մը շինեց։

Քիրամ այդ նաւատորմին վրայ՝ Սողոմոնի ծառաներուն հետ՝ ղրկեց իր ծառաները, ծովու ճամբորդութեան ¹⁶հմուտ նաւազներ։

Անոնք Ոփիր գացին, եւ անկէ չորս հարիւր քսան տաղանդ ոսկի առին ու Սողոմոն թագաւորին բերին։