1 Kings 11

2 Samuel  «  1 Kings 10  ‹  1 Kings 11  ›  1 Kings 12  »  2 Kings

ՍՈՂՈՄՈՆ ԿԸ ՀԵՌԱՆԱՅ ԱՍՏՈՒԾՄԷ

Սողոմոն թագաւորը Փարաւոնի աղջիկէն զատ շատ օտարազգի կիներ սիրեց, այսինքն՝ մովաբացի, ամմոնացի, եդովմայեցի, սիդոնացի ու քետացի կիներ.

այն ազգերէն՝ որոնց համար Տէրը Իսրայէլի որդիներուն ըսեր էր. «Անոնց քով մի՛ մտնէք, եւ անոնք ալ ձեր քով թող չմտնեն, որպէսզի ձեր սիրտերը իրենց աստուածներուն չհակեցնեն»։ Սողոմոն սիրով անոնց յարեցաւ.

ան եօթը հարիւր իշխանազուն կին ունէր, ու երեք հարիւր հարճ. անոր կիները իր սիրտը հակեցուցին։

Սողոմոնի ծերութեան ժամանակ՝ անոր կիները իր սիրտը օտար աստուածներու հակեցուցին, եւ անոր սիրտը իր հօր՝ Դաւիթի սիրտին պէս կատարեալ չեղաւ Տէրոջ՝ իր Աստուծոյն հանդէպ։

Սողոմոն Սիդոնացիներու աստուծոյն՝ Աստարովթի, եւ Ամմոնացիներուն պիղծ Մեղքոմին հետեւեցաւ։

Սողոմոն Տէրոջ ¹առջեւ չարիք գործեց, ու իր հօր՝ Դաւիթի պէս լման Տէրոջ չհետեւեցաւ։

Այն ատեն Սողոմոն Երուսաղէմի դիմաց եղող լերան վրայ Մովաբացիներուն պիղծ Քամովսին համար բարձր տեղ մը կառուցանեց, եւ Ամմոնի որդիներուն պիղծ Մողոքին համար ալ։

Նոյնպէս ալ ըրաւ իր բոլոր օտարազգի կիներուն համար, որոնք իրենց աստուածներուն խունկ կը ծխէին ու զոհ կը մատուցանէին։

Տէրը Սողոմոնի դէմ բարկացաւ, որովհետեւ անոր սիրտը դարձաւ Տէրոջմէն՝ Իսրայէլի Աստուծմէն, որ երկու անգամ իրեն երեւցեր էր,

եւ ²ճիշդ այս մասին իրեն պատուիրեր էր՝ որ ուրիշ աստուածներու չհետեւի. բայց ինք Տէրոջ պատուէրը չպահեց։

Ուստի Տէրը Սողոմոնի ըսաւ. «Քանի ³դուն այսպէս ըրիր՝՝ եւ իմ ուխտս ու քեզի պատուիրած կանոններս չպահեցիր, թագաւորութիւնը անշուշտ քեզմէ պիտի ⁴խլեմ եւ զայն ծառայիդ պիտի տամ։

Միայն թէ այս բանը քու օրերուդ մէջ պիտի չընեմ, քու հօրդ՝ Դաւիթի սիրոյն համար, հապա զայն քու որդիիդ ձեռքէն պիտի խլեմ։

Սակայն ամբողջ թագաւորութիւնը պիտի չխլեմ, հապա տոհմ մը պիտի տամ քու որդիիդ, իմ ծառայիս՝ Դաւիթի սիրոյն համար, ու Երուսաղէմի սիրոյն համար՝ որ ես ընտրեցի»։

ՍՈՂՈՄՈՆԻ ԹՇՆԱՄԻՆԵՐԸ

Տէրը Սողոմոնի դէմ ⁵թշնամի մը ոտքի հանեց, այսինքն՝ Եդովմի թագաւորին զարմէն եղող եդովմայեցի Ադադը։

Արդարեւ՝ երբ Դաւիթ Եդովմի մէջ էր, եւ Յովաբ սպարապետը սպաննուածները թաղելու համար բարձրացաւ՝ Եդովմի մէջ բոլոր արուները զարնելէ ետք,

(որովհետեւ Յովաբ ամբողջ Իսրայէլի հետ հոն վեց ամիս մնաց, մինչեւ որ Եդովմի բոլոր արուները կոտորեց,)

այդ ատեն Ադադ իր հօր ծառաներէն քանի մը Եդովմայեցիներու հետ փախաւ, որպէսզի Եգիպտոս երթայ. Ադադ դեռ պզտիկ տղայ մըն էր։

Անոնք Մադիամէն ⁶մեկնեցան եւ Փառան գացին. Փառանէն իրենց հետ մարդիկ առին ու Եգիպտոս հասան, Եգիպտոսի Փարաւոն թագաւորին քով, որ անոր տուն մը տուաւ, անոր ⁷պարէն ⁸որոշեց, եւ անոր հողեր տուաւ։

Ադադ Փարաւոնի առջեւ շատ շնորհք գտաւ, ու Փարաւոն իր կնոջ քոյրը — Թահփենէս ⁹մայր-թագուհիին՝՝ քոյրը — անոր տուաւ իբր կին։

Թահփենէսի քոյրը Ադադի որդի մը ծնաւ, որ Գանեբաթ կոչուեցաւ. Թահփենէս զայն Փարաւոնի տան մէջ ¹⁰մեծցուց, եւ Գանեբաթ Փարաւոնի տունը՝ Փարաւոնի որդիներուն մէջ էր։

Երբ Ադադ Եգիպտոսի մէջ լսեց թէ Դաւիթ իր հայրերուն հետ քնացեր է ու Յովաբ սպարապետը մեռեր է, Ադադ Փարաւոնի ըսաւ. «Արձակէ՛ զիս, որպէսզի իմ երկիրս երթամ»։

Փարաւոն անոր ըսաւ. «Իմ քովս քու ի՞նչդ պակաս է, որ քու երկիրդ երթալ կը ¹¹փափաքիս»։ Ան ալ պատասխանեց. «Ո՛չինչ. սակայն ա՛նպատճառ արձակէ զիս»։

Աստուած անոր դէմ ուրիշ թշնամի մըն ալ ոտքի հանեց, այսինքն Եղիադայի որդին՝ Ռազոնը, որ իր տիրոջ՝ Սուբայի Ադրազար թագաւորին քովէն փախեր էր։

Ան իր քով մարդիկ հաւաքեց եւ գնդապետ եղաւ. երբ Դաւիթ ¹²զանոնք ջարդեց, Դամասկոս գացին ու հոն բնակեցան, եւ Դամասկոսի մէջ թագաւորեցին։

Ուստի Ռազոն Սողոմոնի բոլոր օրերուն մէջ Իսրայէլի թշնամի եղաւ, Ադադի գործած չարիքին ատենը. Իսրայէլը ¹³կը զզուեցնէր՝՝, եւ Սուրիայի վրայ կը թագաւորէր։

ԱՍՏՈՒԾՈՅ ԽՈՍՏՈՒՄԸ ՅԵՐՈԲՈՎԱՄԻ

Սողոմոնի ծառան՝ Յերոբովամ ալ, Սարեդայէ եղող Եփրաթացի Նաբատի որդին,— որուն մայրը այրի կին մըն էր՝ Սարուա անունով ,— թագաւորին դէմ ձեռք վերցուց։

Թագաւորին դէմ ձեռք վերցնելուն պատճառը սա՛ էր.— մինչ Սողոմոն Մելոնը կը կառուցանէր եւ իր հօր՝ Դաւիթի քաղաքին ճեղքուածքը կը գոցէր,

Յերոբովամ զօրաւոր ու կտրիճ մարդ մըն էր, եւ Սողոմոն տեսաւ թէ ան գործունեայ երիտասարդ մըն է. ուստի զայն Յովսէփի տան ամբողջ բռնի աշխատանքին վրայ նշանակեց։

Այդ ատեն, երբ Յերոբովամ Երուսաղէմէն դուրս ելաւ, ճամբան Սիլոնացի Աքիա մարգարէն անոր հանդիպեցաւ. ան նոր վերարկու մը հագեր էր, ու դաշտին մէջ երկուքը մինակ էին։

Աքիա անոր վրայի նոր վերարկուն բռնեց, զայն պատռեց՝ տասներկու կտոր ընելով,

եւ Յերոբովամի ըսաւ. «Տասը կտորը քեզի՛ առ, քանի որ Տէրը՝ Իսրայէլի Աստուածը սա՛ կը յայտարարէ. “Ահա՛ Սողոմոնի ձեռքէն թագաւորութիւնը պիտի պատռեմ, ու տասը տոհմը քեզի պիտի տամ,

(սակայն իմ ծառայիս՝ Դաւիթի սիրոյն համար, եւ Իսրայէլի բոլոր տոհմերէն ընտրուած Երուսաղէմ քաղաքին սիրոյն համար, տոհմ մը անոր ըլլայ,)

որովհետեւ զիս լքեցին ու Սիդոնացիներուն աստուծոյն՝ Աստարովթի, Մովաբացիներու աստուծոյն՝ Քամովսի, եւ Ամմոնի որդիներուն աստուծոյն՝ Մեղքոմի երկրպագեցին ու իմ ճամբաներէս չընթացան, որ իր հօր՝ Դաւիթի պէս իմ ¹⁴առջեւս ուղիղ եղածն ու իմ կանոններս եւ ¹⁵դատավճիռներս գործադրեն։

Սակայն անոր ձեռքէն ամբողջ թագաւորութիւնը պիտի չառնեմ, հապա զայն իր կեանքին բոլոր օրերուն մէջ իշխան պիտի ¹⁶թողում, իմ պատուիրաններս ու կանոններս պահող իմ ընտրած ծառայիս՝ Դաւիթի սիրոյն համար։

Բայց անոր որդիին ձեռքէն թագաւորութիւնը պիտի առնեմ, եւ տասը տոհմը քեզի պիտի տամ։

Իսկ անոր որդիին տոհմ մը պիտի տամ, որպէսզի իմ ծառաս՝ Դաւիթ իմ առջեւս ¹⁷ընդմիշտ ճրագ մը ունենայ Երուսաղէմ քաղաքին մէջ, որ ընտրեցի իմ անունս հոն դնելու համար։

Քեզ ալ պիտի առնեմ, ու ¹⁸սիրտիդ ամբողջ փափաքածին համաձայն պիտի թագաւորես, եւ Իսրայէլի վրայ թագաւոր պիտի ըլլաս։

Եթէ բոլոր քեզի պատուիրածներուս հնազանդիս, իմ ճամբաներէս ընթանաս, ու կանոններս եւ պատուիրաններս պահելով՝ իմ առջեւս ուղիղ եղածը ընես, ինչպէս իմ ծառաս՝ Դաւիթ ըրաւ, ես քեզի հետ պիտի ըլլամ ու քեզի հաստատ տուն մը պիտի կառուցանեմ, ինչպէս Դաւիթի կառուցանեցի, եւ Իսրայէլը քեզի պիտի տամ։

¹⁹Այսպէս Դաւիթի զարմը պիտի խոնարհեցնեմ, բայց ոչ՝ միշտ”»։

Սողոմոն Յերոբովամը մեռցնել ²⁰ուզեց, բայց Յերոբովամ կանգնեցաւ ու Եգիպտոս փախաւ. Եգիպտոսի Սիսակ թագաւորին քով գնաց, եւ մինչեւ Սողոմոնի մահը Եգիպտոս մնաց։

ՍՈՂՈՄՈՆԻ ՄԱՀԸ (Բ. Մնաց. 9. 29-31)

Սողոմոնի մնացեալ արարքները, անոր բոլոր ըրածներն ու իմաստութիւնը՝ ահա՛ Սողոմոնի Արարքներու գիրքին մէջ գրուած են։

²¹Սողոմոն քառասուն տարի թագաւորեց՝՝ ամբողջ Իսրայէլի վրայ՝ Երուսաղէմի մէջ։

Ապա Սողոմոն իր հայրերուն հետ քնացաւ, եւ իր հօր՝ Դաւիթի քաղաքին մէջ թաղուեցաւ։ Անոր տեղ իր որդին՝ Ռոբովամ թագաւոր եղաւ։