1 Kings 14

2 Samuel  «  1 Kings 13  ‹  1 Kings 14  ›  1 Kings 15  »  2 Kings

ՅԵՐՈԲՈՎԱՄԻ ԶԱՒԱԿԻՆ ՄԱՀԸ

Այդ ատեն Յերոբովամի որդին՝ Աբիա հիւանդացաւ։

Յերոբովամ իր կնոջ ըսաւ. «Կ’աղերսե՛մ, կանգնէ՛, ¹ծպտուէ՛, որպէսզի Յերոբովամի կինը ըլլալդ չգիտցուի, ու Սելո՛վ գնա։ Ահա՛ հոն է Աքիա մարգարէն, որ ինծի ըսաւ թէ այս ժողովուրդին վրայ թագաւոր պիտի ըլլամ։

²Քեզի հետ՝՝ տա՛սը հաց, բլիթներ ու փարչ մը մեղր առ, եւ անո՛ր գնա։ Ան քեզի պիտի իմացնէ ինչ որ տղային պիտի պատահի»։

Յերոբովամի կինը այդպէս ըրաւ. կանգնեցաւ, Սելով գնաց եւ Աքիայի տունը մտաւ։ Բայց Աքիա չէր կրնար տեսնել, քանի որ իր աչքերը ալեւորութենէն ³անշարժացած էին։

Տէրը Աքիայի ըսաւ. «Ահա՛ Յերոբովամի կինը իր որդիին համար քեզմէ ⁴խօսք մը խնդրելու՝՝ կու գայ, որովհետեւ ան հիւանդ է։ Անոր սա՛ եւ սա՛ ըսէ՛։ Երբ հասնի՝ ⁵կերպարանափոխուած պիտի ըլլայ՝՝»։

Մինչ ան դռնէն ներս կը մտնէր, երբ Աքիա անոր ոտքերուն ձայնը լսեց՝ ըսաւ. «Մտի՛ր, ո՛վ Յերոբովամի կին,— ինչո՞ւ այդպէս կերպարանափոխուած ես,— քանի ես քեզի ⁶տխուր լուր մը տալու ղրկուեցայ։

Գնա՛, Յերոբովամի ըսէ՛. “Տէրը՝ Իսրայէլի Աստուածը սա՛ կը յայտարարէ. "Քեզ ժողովուրդին մէջէն բարձրացուցի, եւ քեզ իմ ժողովուրդիս՝ Իսրայէլի վրայ առաջնորդ կարգեցի.

թագաւորութիւնը Դաւիթի տունէն ⁷խլեցի ու զայն քեզի տուի, բայց դուն իմ ծառայիս՝ Դաւիթի պէս չեղար. ան իմ պատուիրաններս կը պահէր եւ իր ամբողջ սիրտով ինծի կը հետեւէր՝ միայն ընելով ինչ որ իմ ⁸առջեւս ուղիղ է։

Մանաւանդ բոլոր քեզմէ առաջ եղողներէն աւելի չարիք գործեցիր, ու գացիր քեզի ուրիշ աստուածներ եւ ⁹ձուլածոյ կուռքեր՝՝ շինեցիր՝ զիս գրգռելու համար, ու զիս կռնակիդ ետեւը նետեցիր։

Հետեւաբար ահա՛ Յերոբովամի տան վրայ չարիք պիտի բերեմ. Յերոբովամի բոլոր այր ¹⁰մարդիկը՝՝ — Իսրայէլի մէջ ¹¹բանտարկուածն ու ազատը՝՝ — պիտի բնաջնջեմ, եւ Յերոբովամի տան յետնորդները պիտի ¹²աւլեմ՝ ինչպէս կղկղանքը կ’աւլեն, մինչեւ որ հատնի։

Յերոբովամի տունէն՝ քաղաքի մէջ մեռնողը շուները պիտի ուտեն, ու դաշտի մէջ մեռնողը երկինքի թռչունները պիտի ուտեն, քանի որ Տէրը խօսեցաւ"”։

Իսկ դուն կանգնէ՛, տո՛ւնդ գնա։ Երբ ոտքերդ քաղաքը մտնեն՝ զաւակը պիտի մեռնի։

Ամբողջ Իսրայէլը հեծեծելով զինք պիտի թաղէ, որովհետեւ Յերոբովամէն միայն ան գերեզման պիտի մտնէ. արդարեւ՝ Յերոբովամի տունէն միայն անոր վրայ բարի բան մը գտնուեցաւ Տէրոջ՝ Իսրայէլի Աստուծոյն առջեւ։

Տէրը իրեն համար Իսրայէլի վրայ թագաւոր մը պիտի հանէ, որ Յերոբովամի տունը պիտի բնաջնջէ այդ օրը. բայց ի՞նչ մնաց, գրեթէ հի՛մա պիտի ընէ։

Տէրը Իսրայէլը պիտի զարնէ, ինչպէս ջուրերու մէջ եղէգը կը շարժի։ Իսրայէլը պիտի խլէ այս լաւ ¹³երկրէն՝ որ անոնց հայրերուն տուեր էր, ու զանոնք Գետին միւս կողմը պիտի ցրուէ, որովհետեւ Տէրը գրգռելով՝ իրենց աստարովթներ շինեցին։

Իսրայէլը պիտի մատնէ Յերոբովամի մեղքերուն համար, որովհետեւ ան մեղանչեց եւ Իսրայէլի ալ մեղանչել տուաւ»։

Այն ատեն Յերոբովամի կինը կանգնեցաւ, գնաց ու Թերսա հասաւ. երբ տան դրան սեմէն ներս կը մտնէր, տղան մեռաւ։

Զայն թաղեցին, եւ ամբողջ Իսրայէլը անոր վրայ հեծեծեց Տէրոջ խօսքին համաձայն, որ իր ծառային՝ Աքիա մարգարէին ¹⁴միջոցով ըսեր էր։

ՅԵՐՈԲՈՎԱՄԻ ՄԱՀԸ

Յերոբովամի մնացեալ արարքները — թէ ի՛նչպէս պատերազմեցաւ եւ ի՛նչպէս թագաւորեց — ահա՛ Իսրայէլի թագաւորներուն Ժամանակագրութեան գիրքին մէջ գրուած են։

¹⁵Յերոբովամ քսաներկու տարի թագաւորեց՝՝, ապա իր հայրերուն հետ քնացաւ։ Անոր տեղ իր որդին՝ Նադաբ թագաւոր եղաւ։

ՅՈՒԴԱՅԻ ՌՈԲՈՎԱՄ ԹԱԳԱՒՈՐԸ (Բ. Մնաց. 11. 5-12. 15)

Սողոմոնի որդին՝ Ռոբովամ Յուդայի վրայ թագաւորեց։ Ռոբովամ քառասունմէկ տարեկան էր՝ երբ թագաւոր եղաւ, եւ տասնեօթը տարի թագաւորեց Երուսաղէմի մէջ, այսինքն այն քաղաքին մէջ՝ որ Տէրը Իսրայէլի բոլոր տոհմերէն ընտրեց, իր անունը հոն դնելու համար։ Անոր մայրը Նաամա անունով Ամմոնացի մըն էր։

¹⁶Յուդայեաններն ալ Տէրոջ ¹⁷առջեւ չարիք գործեցին, ու զայն նախանձի մղեցին իրենց գործած մեղքերով՝ իրենց հայրերուն բոլոր գործածներէն աւելի։

Իրենք ալ՝ ամէն բարձր բլուրի վրայ եւ ամէն կանաչազարդ ծառի տակ՝ բարձր տեղեր, արձաններ ու աստարովթներ կառուցանեցին իրենց համար.

նոյնիսկ երկրին մէջ ¹⁸իգացեալներ կային։ Իսրայէլի որդիներուն առջեւէն Տէրոջ վտարած ազգերուն բոլոր գարշութիւններուն նմանները գործեցին։

Ռոբովամ թագաւորին հինգերորդ տարին՝ Եգիպտոսի Սիսակ թագաւորը Երուսաղէմի դէմ բարձրացաւ։

Տէրոջ տան գանձերն ու թագաւորին տան գանձերը գրաւեց. բոլորն ալ գրաւեց. Սողոմոնի շինած բոլոր ոսկիէ վահաններն ալ գրաւեց։

Ռոբովամ թագաւորը անոնց տեղ պղինձէ վահաններ շինեց, ու զանոնք թագաւորին տան մուտքը պահպանող սուրհանդակներու պետերուն ձեռքը յանձնեց։

Երբ թագաւորը Տէրոջ տունը կ’երթար, սուրհանդակները զանոնք կը կրէին. յետոյ զանոնք սուրհանդակներուն խուցը կը վերադարձնէին։

Ռոբովամի մնացեալ արարքներն ու անոր բոլոր ըրածները՝ ահա՛ Յուդայի թագաւորներուն Ժամանակագրութեան գիրքին մէջ գրուած են։

Ռոբովամի ու Յերոբովամի միջեւ ¹⁹ամէն ատեն՝՝ պատերազմ կար։

Ռոբովամ իր հայրերուն հետ քնացաւ, եւ իր հայրերուն հետ՝ Դաւիթի քաղաքին մէջ թաղուեցաւ։ Անոր մայրը Նաամա անունով Ամմոնացի մըն էր։ Անոր տեղ իր որդին՝ ²⁰Աբիա թագաւորեց։