2 Kings 13

1 Kings  «  2 Kings 12  ‹  2 Kings 13  ›  2 Kings 14  »  1 Chronicles

ԻՍՐԱՅԷԼԻ ՅՈՎԱՔԱԶ ԹԱԳԱՒՈՐԸ

Յուդայի թագաւորին՝ Ոքոզիայի որդիին՝ Յովասի քսաներեքերորդ տարին, Իսրայէլի վրայ Յէուի որդին՝ Յովաքազ թագաւոր եղաւ Սամարիայի մէջ, ու տասնեօթը տարի թագաւորեց։

Տէրոջ ¹առջեւ չարիք գործեց, եւ Իսրայէլի մեղանչել տուող Նաբատեան Յերոբովամի մեղքերուն հետեւեցաւ, անոնցմէ չհեռացաւ։

Ուստի Տէրոջ բարկութիւնը Իսրայէլի դէմ բորբոքեցաւ, ու զանոնք Սուրիայի Ազայէլ թագաւորին ձեռքը մատնեց, նաեւ Ազայէլի որդիին՝ Բենադադի ձեռքը, ասոնց բոլոր օրերը։

Երբ Յովաքազ Տէրոջ ²պաղատեցաւ, Տէրը անոր մտիկ ըրաւ. արդարեւ տեսաւ Իսրայէլի տանջանքը՝ որով Սուրիայի թագաւորը զանոնք կը չարչարէր։

Տէրը Իսրայէլի փրկիչ մը տուաւ, եւ Ասորիներու ³ձեռքէն ազատեցան՝՝. ուստի Իսրայէլի որդիները ⁴առաջուան պէս իրենց վրաններուն մէջ բնակեցան։

Սակայն Իսրայէլի մեղանչել տուող Յերոբովամի տան մեղքերէն չհեռացան, հապա անոնց մէջէն ընթացան. նոյնիսկ ⁵Աստարովթի կուռքը՝՝ Սամարիայի մէջ կանգուն մնաց։

Տէրը Յովաքազի ⁶զօրքէն միայն յիսուն ձիաւոր, տասը կառք ու տասը հազար հետեւակ թողուց, որովհետեւ Սուրիայի թագաւորը ⁷միւսները կորսնցուցեր էր. զանոնք կոխկռտուած հողի պէս ըրեր էր։

Յովաքազի մնացեալ արարքները, անոր բոլոր ըրածներն ու քաջութիւնը՝ ահա՛ Իսրայէլի թագաւորներուն Ժամանակագրութեան գիրքին մէջ գրուած են։

Յովաքազ իր հայրերուն հետ քնացաւ։ Զայն Սամարիայի մէջ թաղեցին, եւ անոր տեղ իր որդին՝ Յովաս թագաւոր եղաւ։

ԻՍՐԱՅԷԼԻ ՅՈՎԱՍ ԹԱԳԱՒՈՐԸ

Յուդայի Յովաս թագաւորին երեսունեօթներորդ տարին, Իսրայէլի վրայ Յովաքազի որդին՝ Յովաս թագաւոր եղաւ Սամարիայի մէջ, ու տասնվեց տարի թագաւորեց։

Տէրոջ առջեւ չարիք գործեց, եւ Իսրայէլի մեղանչել տուող Նաբատեան Յերոբովամի բոլոր մեղքերէն չհեռացաւ, հապա անոնց մէջէն ընթացաւ։

Յովասի մնացեալ արարքներն ու անոր բոլոր ըրածները, եւ Յուդայի Ամասիա թագաւորին դէմ պատերազմած ատեն իր ցոյց տուած քաջութիւնը՝ ահա՛ Իսրայէլի թագաւորներուն Ժամանակագրութեան գիրքին մէջ գրուած են։

Յովաս իր հայրերուն հետ քնացաւ, ու Յերոբովամ բազմեցաւ անոր գահին վրայ։ Յովաս Սամարիայի մէջ թաղուեցաւ՝ Իսրայէլի թագաւորներուն հետ։

ԵՂԻՍԷԻ ՄԱՀԸ

Եղիսէ հիւանդացաւ, եւ իր հիւանդութենէն պիտի մեռնէր։ Իսրայէլի թագաւորը՝ Յովաս անոր իջաւ, անոր երեսին վրայ իյնալով լացաւ եւ ըսաւ. «Իմ հա՛յրս, իմ հա՛յրս, Իսրայէլի կառքն ու անոր ձիաւորները»։

Եղիսէ անոր ըսաւ. «Աղե՛ղ մը եւ նետե՛ր առ»։ Ան ալ աղեղ մը ու նետեր առաւ։

Եղիսէ Իսրայէլի թագաւորին ըսաւ. «Ձեռքդ աղեղի՛ն վրայ զետեղէ»։ Ան ձեռքը դրաւ. Եղիսէ ալ իր ձեռքերը թագաւորին ձեռքերուն վրայ դրաւ,

եւ ըսաւ. «Արեւելեան կողմի պատուհա՛նը բաց»։ Ան ալ բացաւ։ Եղիսէ ըսաւ. «Արձակէ՛»։ Ան ալ արձակեց։ Այն ատեն Եղիսէ ըսաւ. «Տէրոջ փրկութեան նետը, ու Սուրիայի ⁸վրայ տարուած յաղթանակի՝՝ նետը. արդարեւ Ասորիները Ափեկի մէջ պիտի զարնես՝ մինչեւ որ հատցնես»։

Նաեւ ըսաւ. «Ա՛ռ նետերը». ան ալ առաւ։ Եղիսէ Իսրայէլի թագաւորին ըսաւ. «Գետի՛նը զարկ»։ Ան ալ երեք անգամ գետինը զարկաւ, ու կեցաւ։

Աստուծոյ մարդը անոր դէմ զայրանալով՝ ըսաւ. «Եթէ հինգ կամ վեց անգամ զարնէիր, այն ատեն Սուրիան պիտի զարնէիր եւ պիտի հատցնէիր. բայց հիմա Սուրիան միայն երեք անգամ պիտի զարնես»։

Եղիսէ մեռաւ, ու զինք թաղեցին։ ⁹Հետեւեալ տարին՝՝ Մովաբացիներուն գունդերը երկիրը ներխուժեցին։

Երբ մարդ մը կը թաղէին, ահա՛ գունդ մը տեսան, ու մարդը Եղիսէի գերեզմանը նետեցին։ Երբ այդ մարդը Եղիսէի ոսկորներուն դպաւ՝ վերապրեցաւ, եւ իր ոտքերուն վրայ կանգնեցաւ։

ՊԱՏԵՐԱԶՄ ԻՍՐԱՅԷԼԻ ԵՒ ՍՈՒՐԻԱՅԻ ՄԻՋԵՒ

Սուրիայի Ազայէլ թագաւորը Յովաքազի բոլոր օրերուն մէջ Իսրայէլը տանջեց։

Բայց Տէրը՝ Աբրահամի, Իսահակի ու Յակոբի հետ իր կնքած ուխտին պատճառով անոնց ողորմեցաւ եւ գթաց։ Անոնց ¹⁰ուշադրութիւն դարձուց ու զանոնք բնաջնջել չուզեց. զանոնք մինչեւ հիմա իր ներկայութենէն չվտարեց։

Սուրիայի Ազայէլ թագաւորը մեռաւ, եւ անոր տեղ իր որդին՝ Բենադադ թագաւոր եղաւ։

Յովաքազի որդին՝ Յովաս, Ազայէլի որդիին՝ Բենադադի ձեռքէն վերագրաւեց այն քաղաքները, որ Ազայէլ անոր հօր՝ Յովաքազի ձեռքէն պատերազմով գրաւեր էր։ Յովաս զայն երեք անգամ զարկաւ, ու Իսրայէլի քաղաքները ¹¹վերագրաւեց։