2 Samuel 2

1 Samuel  «  2 Samuel 1  ‹  2 Samuel 2  ›  2 Samuel 3  »  1 Kings

ԴԱՒԻԹ Կ’ԸԼԼԱՅ ՅՈՒԴԱՅԻ ԹԱԳԱՒՈՐ

Ասկէ ետք Դաւիթ Տէրոջ հարցուց. «Յուդայի քաղաքներէն մէկը բարձրանա՞մ»։ Տէրը անոր ըսաւ. «Բարձրացի՛ր»։ Դաւիթ ըսաւ. «Ո՞ւր բարձրանամ»։ Տէրը ըսաւ. «Քեբրոն»։

Ուստի Դաւիթ հոն բարձրացաւ, նաեւ իր երկու կիները, այսինքն Յեզրայելացի Աքինոամն ու Կարմելացի Նաբաղի կինը՝ Աբիգեան։

Դաւիթ իրեն հետ եղող իր մարդիկն ալ բարձրացուց, իւրաքանչիւրը իր ընտանիքով, եւ Քեբրոնի քաղաքներուն մէջ բնակեցան։

Յուդայի մարդիկը եկան, ու հոն Դաւիթը Յուդայի տան վրայ թագաւոր օծեցին։ Դաւիթի պատմեցին թէ “Գաղաադի Յաբիսի բնակիչնե՛րը թաղեցին Սաւուղը”։

Դաւիթ Գաղաադի Յաբիսի բնակիչներուն պատգամաւորներ ղրկեց եւ անոնց ըսաւ. «Դուք Տէրոջմէն օրհնեա՜լ ըլլաք, որ ձեր տիրոջ՝ Սաւուղի հետ այսպէս կարեկցութեամբ վարուեցաք, ու զինք թաղեցիք։

Հիմա Տէրը ձեզի հետ կարեկցութեամբ եւ ճշմարտութեամբ թող վարուի. ես ալ ձեզի այս բարիքին փոխարէնը պիտի հատուցանեմ, քանի որ այս արարքը ըրիք։

Հիմա ձեր ձեռքերը թող ուժովնան, ու ¹կտրի՛ճ եղէք. արդարեւ ձեր Տէրը՝ Սաւուղ մեռաւ, եւ Յուդայի տունը զիս իր վրայ թագաւոր օծեց»։

ՅԵԲՈՒՍԹԷ Կ’ԸԼԼԱՅ ԻՍՐԱՅԷԼԻ ԹԱԳԱՒՈՐ

Սակայն Սաւուղի զօրապետը՝ Ներեան Աբեններ, Սաւուղի որդին՝ Յեբուսթէն առաւ, զայն Մանայիմ անցուց,

ու զինք թագաւոր նշանակեց Գաղաադի վրայ, Ասուրիի վրայ, Յեզրայէլի վրայ, Եփրեմի վրայ, Բենիամինի վրայ, եւ ամբողջ Իսրայէլի վրայ։

Երբ Սաւուղի որդին՝ Յեբուսթէ Իսրայէլի վրայ թագաւոր եղաւ, քառասուն տարեկան էր, ու երկու տարի թագաւորեց. միայն Յուդայի տունը Դաւիթի հետեւեցաւ։

Քեբրոնի մէջ՝ Յուդայի տան վրայ Դաւիթի թագաւոր եղած ժամանակը եօթը տարի ու վեց ամիս եղաւ։

ՊԱՏԵՐԱԶՄ ՅՈՒԴԱՅԻ ԵՒ ԻՍՐԱՅԷԼԻ ՄԻՋԵՒ

Ներեան Աբեններ, եւ Սաւուղի որդիին՝ Յեբուսթէի ծառաները Մանայիմէն ելան դէպի Գաբաւոն։

Շարուհեայի որդին՝ Յովաբ, ու Դաւիթի ծառաներն ալ Քեբրոնէն ելան, ու Գաբաւոնի աւազանին քով անոնց հանդիպեցան։ Ասոնք աւազանին մէկ կողմը կեցան, իսկ անոնք՝ աւազանին միւս կողմը։

Աբեններ Յովաբի ըսաւ. «Այժմ երիտասարդները թող կանգնին ու մեր առջեւ խայտան»։ Յովաբ ըսաւ. «Թող կանգնին»։

Ուստի անոնք նոյն թիւով կանգնեցան եւ անցան.— տասներկու մարդ Բենիամինէն եւ Սաւուղի որդիին՝ Յեբուսթէի կողմէն, ու տասներկու մարդ Դաւիթի ծառաներէն։

Իւրաքանչիւրը իր ²հակառակորդին գլուխէն բռնեց, եւ իր սուրը հակառակորդին կողը խոթեց, ու միասին ինկան։ Ուստի այդ տեղին անունը ³Քեղկաթ-Ասուրիմ կոչուեցաւ, որ Գաբաւոնի մէջ է։

Այդ օրը յոյժ սաստիկ պատերազմ եղաւ, եւ Աբեններ՝ Իսրայէլի մարդոց հետ՝ Դաւիթի ծառաներէն պարտուեցաւ։

Շարուհեայի երեք որդիները՝ Յովաբ, Աբեսսա ու Ասայէլ՝ հոն էին. Ասայէլ դաշտի այծեամի պէս ⁴թեթեւաշարժ էր՝՝։

Ասայէլ Աբենները հալածեց. Աբենների հետեւելու ատեն՝ աջ կամ ձախ կողմ չշեղեցաւ։

Աբեններ ետեւը դարձաւ եւ ըսաւ. «Ասայէ՛լ, դո՞ւն ես»։ Ան ալ պատասխանեց. «Ե՛ս եմ»։

Աբեններ անոր ըսաւ. «Քու աջ կամ ձախ կողմդ շեղէ՛, երիտասարդներէ՛ն մէկը բռնէ եւ անո՛ր ⁵զէնքերը քեզի առ»։ Բայց Ասայէլ անոր ետեւէն շեղիլ չուզեց։

Աբեններ անգա՛մ մըն ալ Ասայէլի ըսաւ. «Ետեւէս շեղէ՛. քեզ ինչո՞ւ գետինը զարնեմ. յետոյ ի՞նչպէս երեսս պիտի վերցնեմ եղբօրդ՝ Յովաբի նայելու»։

Բայց ան մերժեց անոր ետեւէն շեղիլ։ Ուստի Աբեններ նիզակին ետեւի ծայրով ⁶սնակուշտէն զարկաւ, ու նիզակը անոր կռնակէն ելաւ. հոն ինկաւ, եւ նոյն տեղը մեռաւ։ Բոլոր անոնք՝ որ Ասայէլի ինկած ու մեռած տեղը կու գային, կանգ կ’առնէին։

Յովաբ եւ Աբեսսա Աբենները կը հալածէին. արեւը մայր կը մտնէր երբ անոնք Ամմայի բլուրը հասան, որ Գիայի դիմաց է՝ Գաբաւոնի անապատին ճամբան։

Բենիամինի որդիները Աբենների ետեւ հաւաքուեցան, մէ՛կ գունդ եղան ու բլուրի մը գագաթը կայնեցան։

Աբեններ Յովաբի պոռալով՝ ըսաւ. «Միթէ սուրը ընդմիշտ պիտի սպառէ՞։ Չե՞ս գիտեր թէ ասոր վախճանը դառն պիտի ըլլայ։ Մինչեւ ե՞րբ ժողովուրդին պիտի չհրամայես՝ որ իրենց ⁷եղբայրները հալածելէն վերադառնան»։

Յովաբ ըսաւ. «Աստուած կ’ապրի՛. եթէ դուն խօսած չըլլայիր, ժողովուրդէն իւրաքանչիւրը իր ⁸եղբայրը հալածելէն վերադարձած՝՝ պիտի ըլլար՝ առտուընէ ի վեր»։

Այն ատեն Յովաբ շեփոր հնչեցուց, եւ ամբողջ ժողովուրդը կանգ առաւ. ա՛լ Իսրայէլը չհալածեցին, անգա՛մ մըն ալ չպատերազմեցան։

Աբեններ եւ իր մարդիկը այդ ամբողջ գիշերը դաշտին մէջէն քալելով՝ Յորդանանէն անցան, ապա ամբողջ Բեթրոնէն երթալով՝ Մանայիմ հասան։

Յովաբ ⁹Աբենները հալածելէն՝՝ վերադարձաւ եւ ամբողջ ժողովուրդը հաւաքեց։ Դաւիթի ծառաներէն տասնինը մարդ ու Ասայէլ կը պակսէին.

իսկ Դաւիթի ծառաները Բենիամինէն եւ Աբենների մարդոցմէն երեք հարիւր վաթսուն մարդ զարկած ու մեռցուցած էին։

Ասայէլը վերցուցին, եւ զայն Բեթլեհէմի մէջ՝ իր հօր գերեզմանը թաղեցին։ Յովաբ ու իր մարդիկը ամբողջ գիշերը քալեցին, եւ արշալոյսին Քեբրոն հասան։