2 Samuel 8

1 Samuel  «  2 Samuel 7  ‹  2 Samuel 8  ›  2 Samuel 9  »  1 Kings

ԴԱՒԻԹԻ ԶԻՆՈՒՈՐԱԿԱՆ ՅԱՂԹԱՆԱԿՆԵՐԸ (Ա. Մնաց. 18. 1-17)

Ատկէ ետք՝ Դաւիթ Փղշտացիները զարկաւ ու զանոնք ընկճեց։ Դաւիթ Փղշտացիներուն ձեռքէն Մեթեկամման առաւ.

նաեւ Մովաբը զարկաւ, եւ զանոնք գետինը պառկեցնելով՝ զանոնք լարով չափեց. երկու լարով չափեց՝ մեռցնելու համար, ու մէկ ամբողջ լարով՝ ողջ պահելու։ Մովաբացիները Դաւիթի ¹հարկատու հպատակներ եղան՝՝։

Դաւիթ Սուբայի թագաւորը, Ռուբի որդին՝ Ադրազարը զարկաւ, երբ Եփրատ գետին վրայ իր ²իշխանութիւնը հաստատելու՝՝ կ’երթար։

Դաւիթ անկէ հազար եօթը հարիւր ձիաւոր եւ քսան հազար հետեւակ ³զօրք բռնեց։ Դաւիթ բոլոր ⁴կառքի ձիերուն ջիղերը կտրեց, բայց անոնցմէ միայն հարիւր ձի իրեն համար պահեց՝՝։

Դամասկոսի ⁵Ասորիները Սուբայի թագաւորին՝ Ադրազարի օգնութեան ⁶հասան. բայց Դաւիթ Ասորիներէն քսաներկու հազար մարդ զարկաւ։

Դաւիթ Դամասկոսի Սուրիային մէջ պահակազօրքեր դրաւ, եւ Ասորիները Դաւիթի հարկատու հպատակներ եղան։ Դաւիթ ուր որ կ’երթար՝ Տէրը ⁷իրեն յաղթութիւն կու տար՝՝։

Դաւիթ Ադրազարի ծառաներուն ոսկիէ վահանները գրաւեց, ու զանոնք Երուսաղէմ բերաւ։

Ադրազարի քաղաքներէն՝ Բեթահէն եւ Բերոթայէն՝ Դաւիթ թագաւորը յոյժ շատ պղինձ գրաւեց։

Երբ Եմաթի թագաւորը՝ Թովու լսեց թէ Դաւիթ Ադրազարի բոլոր զօրագունդերը զարկեր է,

Թովու իր որդին՝ ⁸Յովրամը Դաւիթ թագաւորին ղրկեց, որպէսզի անոր ⁹որպիսութիւնը հարցնէ եւ զինք ¹⁰շնորհաւորէ, Ադրազարի դէմ պատերազմելուն ու զայն զարնելուն համար. (արդարեւ Ադրազար Թովուի դէմ կը պատերազմէր։) Յովրամ իրեն հետ արծաթէ անօթներ, ոսկիէ անօթներ եւ պղինձէ անօթներ ¹¹բերաւ։

Դաւիթ թագաւորը զանոնք ալ Տէրոջ ¹²ընծայեց, միւս ընծայած արծաթին ու ոսկիին հետ, որոնք իր նուաճած բոլոր ազգերէն գրաւած էր.—

Սուրիայէն, Մովաբէն, Ամմոնի որդիներէն, Փղշտացիներէն, Ամաղէկէն, եւ Սուբայի թագաւորին՝ Ռուբի որդիին՝ Ադրազարի աւարէն։

Երբ Դաւիթ Աղի ձորին մէջ տասնութ հազար ¹³Ասորիներ զարկաւ ու վերադարձաւ, մեծ անուն վաստկեցաւ։

Եդովմի մէջ պահակազօրքեր դրաւ. ամբողջ Եդովմի երկրին մէջ պահակազօրքեր դրաւ, եւ բոլոր Եդովմայեցիները Դաւիթի ծառայ եղան։ Դաւիթ ուր որ կ’երթար, Տէրը իրեն յաղթութիւն կու տար։

Դաւիթ ամբողջ Իսրայէլի վրայ թագաւորեց։ Դաւիթ իր ամբողջ ժողովուրդին իրաւունք եւ արդարութիւն կը կիրարկէր։

Շարուհեայի որդին՝ Յովաբ զօրքերուն վրայ նշանակուած էր. Աքիղուդի որդին՝ Յովսափատ ¹⁴դիւանադպիր էր.

Աքիտովբի որդին՝ Սադովկ ու Աբիաթարի որդին՝ Աքիմելէք քահանաներ էին. Սարայիա ատենադպիր էր.

Յովիադայի որդին՝ Բանեա ¹⁵Քերեթիներուն ու ¹⁶Փելեթիներուն վրայ նշանակուած էր. իսկ Դաւիթի որդիները ¹⁷նախարարներ էին։