2 Samuel 9

1 Samuel  «  2 Samuel 8  ‹  2 Samuel 9  ›  2 Samuel 10  »  1 Kings

ԴԱՒԻԹ ԵՒ ՄԵՄՓԻԲՈՍԹԷ

Դաւիթ ըսաւ. «Տակաւին Սաւուղի տունէն մնացած մարդ մը կա՞յ, որ Յովնաթանի սիրոյն համար՝ անոր հետ կարեկցութեամբ վարուիմ»։

Սաւուղի տունէն Սիբա անունով ծառայ մը կար. զայն Դաւիթի կանչեցին։ Թագաւորը անոր ըսաւ. «Սիբան դո՞ւն ես»։ Ան ալ ըսաւ. «Ծառադ եմ»։

Թագաւորը ըսաւ. «Ա՛լ Սաւուղի տունէն մնացած մարդ չկա՞յ, որպէսզի անոր հետ Աստուծոյ կարեկցութեամբ վարուիմ»։ Սիբա թագաւորին ըսաւ. «Տակաւին Յովնաթանէ ոտքերը կաղ որդի մը մնաց»։

Թագաւորը անոր ըսաւ. «Անիկա ո՞ւր է»։ Սիբա թագաւորին ըսաւ. «Ահա՛ անիկա Լադաբարի մէջ՝ Ամիէլի որդիին Մաքիրի տունն է»։

Դաւիթ թագաւորը մարդ ղրկեց, ու զայն Լադաբարէ՝ Ամիէլի որդիին Մաքիրի տունէն բերաւ։

Երբ Մեմփիբոսթէ, Սաւուղի որդիին՝ Յովնաթանի որդին, Դաւիթի եկաւ, երեսին վրայ ինկաւ ու երկրպագեց։ Դաւիթ ըսաւ. «Մեմփիբոսթէ՛»։ Ան ալ պատասխանեց. «Ահա՛ քու ծառադ»։

Դաւիթ անոր ըսաւ. «Մի՛ վախնար, քանի որ քու հօրդ՝ Յովնաթանի սիրոյն համար անշուշտ քեզի հետ կարեկցութեամբ պիտի վարուիմ. քու հօրդ՝ Սաւուղի բոլոր արտերը քեզի պիտի վերադարձնեմ, ու դուն շարունակ իմ սեղանս հաց պիտի ուտես»։

Ան երկրպագեց եւ ըսաւ. «Քու ծառադ ո՞վ է, որ ինծի պէս մեռած շունի մը վրայ նայեցար»։

Իսկ թագաւորը Սաւուղի սպասաւորը՝ Սիբան կանչեց, ու անոր ըսաւ. «Սաւուղի եւ անոր տան ամբողջ ստացուածքը՝ քու տիրոջդ որդիին տուի։

Դուն, որդիներդ ու ծառաներդ իրեն համար մշակեցէ՛ք հողը, եւ բե՛ր իրեն անոր պտուղը, որպէսզի քու տիրոջդ որդին ուտելու հաց ունենայ. իսկ քու տիրոջդ որդին՝ Մեմփիբոսթէ շարունակ իմ սեղանս հաց պիտի ուտէ»։ Սիբա տասնհինգ որդի ու քսան ծառայ ունէր։

Սիբա թագաւորին ըսաւ. «Իմ տէրս՝ թագաւորը քու ծառայիդ ինչ որ հրամայեց, քու ծառադ այնպէս պիտի ընէ»։ «Բայց Մեմփիբոսթէ,— ըսաւ Դաւիթ,— թագաւորին որդիներէն մէկուն պէս՝ իմ սեղանս հաց պիտի ուտէ»։

Մեմփիբոսթէ պզտիկ որդի մը ունէր, որուն անունը Միքա էր. բոլոր անոնք՝ որ Սիբայի տունը կը բնակէին, Մեմփիբոսթէի ծառաներն էին։

Մեմփիբոսթէ Երուսաղէմ բնակեցաւ, քանի որ շարունակ թագաւորին սեղանը հաց կ’ուտէր. ան իր երկու ոտքերով կաղ էր։