2 Samuel 11

1 Samuel  «  2 Samuel 10  ‹  2 Samuel 11  ›  2 Samuel 12  »  1 Kings

ԴԱՒԻԹ ԵՒ ԲԵԹՍԱԲԷ

Հետեւեալ տարին՝՝, թագաւորներուն ¹պատերազմելու ատենը, Դաւիթ Յովաբը եւ անոր հետ իր ծառաներն ու ամբողջ Իսրայէլը ղրկեց, եւ անոնք Ամմոնի որդիները կոտորեցին ու Ռաբբան պաշարեցին. բայց Դաւիթ Երուսաղէմ մնաց։

Օր մը՝ իրիկուան դէմ՝ Դաւիթ իր անկողինէն ելլելով ²պալատին տանիքին վրայ կը պտըտէր։ Տանիքին վրայէն կին մը տեսաւ՝ որ կը լուացուէր. այդ կինը յոյժ վայելուչ տեսք ունէր։

Դաւիթ մարդ ղրկեց եւ այդ կնոջ մասին ³հարցուց։ Իրեն ըսին. «Ասիկա Բեթսաբէն է, ⁴Էլիամի աղջիկը, Քետացի Ուրիայի կինը»։

Դաւիթ պատգամաւորներ ղրկեց՝ զայն բերելու։ Երբ ան իր քով եկաւ, Դաւիթ անոր հետ պառկեցաւ. ան իր անմաքրութենէն դեռ նոր ⁵մաքրուած էր։ Յետոյ ան իր տունը վերադարձաւ։

Կինը յղացաւ, ու մարդ ղրկելով Դաւիթի իմացուց՝ ըսելով. «Յղի եմ»։

Դաւիթ մարդ ղրկեց Յովաբի՝ ըսելով. «Քետացի Ուրիան ինծի՛ ղրկէ»։ Յովաբ ալ Ուրիան Դաւիթի ղրկեց։

Երբ Ուրիա անոր եկաւ, Դաւիթ Յովաբի ⁶որպիսութիւնը, զօրքին որպիսութիւնը եւ պատերազմին ⁷վիճակը հարցուց։

Յետոյ Դաւիթ Ուրիայի ըսաւ. «Տո՛ւնդ իջիր ու ոտքե՛րդ լուա»։ Ուրիա թագաւորին տունէն ելաւ, եւ անոր ետեւէն թագաւորէն ⁸պարգեւ գնաց։

Բայց Ուրիա իր տիրոջ բոլոր ծառաներուն հետ՝ պալատին մուտքը պառկեցաւ, ու իր տունը չիջաւ։

Երբ Դաւիթի պատմեցին թէ “Ուրիա իր տունը չիջաւ”, Դաւիթ Ուրիայի ըսաւ. «Դուն ճամբորդութենէ եկած չե՞ս. ինչո՞ւ տունդ չես իջներ»։

Ուրիա Դաւիթի ըսաւ. «Տապանակը, Իսրայէլ ու Յուդա ⁹վրաններու մէջ կը կենան, իմ տէրս՝ Յովաբ եւ իմ տիրոջս ծառաները ¹⁰բաց դաշտի մէջ՝՝ կը բանակին, իսկ ես ուտելու, խմելու եւ կնոջս հետ պառկելու համար իմ տո՞ւնս երթամ։ Դուն կ’ապրի՛ս ու քու անձդ կ’ապրի՛. ես այս բանը չեմ ըներ»։

Դաւիթ Ուրիայի ըսաւ. «Այսօ՛ր ալ հոս մնացիր, եւ վաղը քեզ պիտի ղրկեմ»։ Ուրիա այդ օրն ու հետեւեալ օրը Երուսաղէմի մէջ մնաց։

Դաւիթ հրաւիրեց զայն, եւ ան իր առջեւ կերաւ ու խմեց. Դաւիթ զայն գինովցուց։ Ուրիա իրիկունը իր տիրոջ ծառաներուն քով՝ իր անկողինին մէջ պառկեցաւ, բայց իր տունը չիջաւ։

Առտուն Դաւիթ ¹¹նամակ մը գրեց Յովաբի, եւ Ուրիայի ձեռքով ղրկեց։

Նամակին մէջ գրեց. «Ուրիան յոյժ սաստիկ պատերազմին ¹²ճակա՛տը դրէք ու դուք իրմէ ե՛տ քաշուեցէք, որպէսզի զարնուի եւ մեռնի»։

Մինչ Յովաբ քաղաքին վրայ կը հսկէր, Ուրիան դրաւ այնպիսի տեղ մը՝ ուր գիտէր թէ կտրիճ մարդիկ կային։

Քաղաքին մարդիկը դուրս ելան ու Յովաբի դէմ պատերազմեցան, եւ ժողովուրդէն՝ Դաւիթի ծառաներէն՝ ոմանք ինկան. Քետացի Ուրիան ալ մեռաւ։

Յովաբ պատգամաւոր մը ղրկեց ու պատերազմին բոլոր ¹³եղելութիւնները Դաւիթի իմացուց։

Պատգամաւորին պատուիրեց. «Երբ պատերազմին բոլոր եղելութիւնները թագաւորին պատմելը աւարտես,

եթէ թագաւորին ցասումը ¹⁴բորբոքի եւ քեզի ըսէ. “Ինչո՞ւ պատերազմելու համար քաղաքին մօտեցաք. չէի՞ք գիտեր թէ պարիսպէն նետ կը նետեն։

¹⁵Յերոբահաղի որդին՝ Աբիմելէքը ո՞վ մեռցուց. կին մը չէ՞ր, որ պարիսպին վրայէն երկանաքարի կտոր մը նետեց անոր վրայ, եւ ան Թեբէսի մէջ մեռաւ։ Ինչո՞ւ պարիսպին մօտեցաք”, այն ատեն ըսէ՛. “Քու ծառադ՝ Քետացի Ուրիան ալ մեռաւ”»։

Պատգամաւորը գնաց, ու Յովաբի բոլոր իրեն պատուիրածը Դաւիթի պատմեց։

Պատգամաւորը Դաւիթի ըսաւ. «Ի՛րապէս այդ մարդիկը մեզմէ զօրաւոր էին. մեզի դէմ դուրս ելան՝ դաշտը, բայց մենք մինչեւ քաղաքին դուռը ¹⁶զանոնք հալածեցինք՝՝։

¹⁷Աղեղնաւորները պարիսպին վրայէն քու ծառաներուդ նետեր նետեցին, եւ թագաւորին ծառաներէն ոմանք մեռան. քու ծառադ՝ Քետացի Ուրիան ալ մեռաւ»։

Այն ատեն Դաւիթ պատգամաւորին ըսաւ. «Յովաբի սա՛ ըսէ. “Այս բանը ¹⁸քեզի անհաճոյ՝՝ թող չըլլայ. արդարեւ սուրը երբեմն ասիկա կը սպառէ, ու երբեմն՝ անիկա։ Քաղաքին դէմ պատերազմը սաստկացո՛ւր եւ զայն փլցո՛ւր”։ Դո՛ւն ալ ¹⁹քաջալերէ զինք»։

Ուրիայի կինը՝ իր ամուսինին մեռնիլը լսելով՝ ամուսինին համար հեծեծեց։

Երբ սուգը անցաւ, Դաւիթ մարդ ղրկեց ու զայն իր տունը ²⁰ընդունեց. ան իր կինը եղաւ եւ իրեն որդի մը ծնաւ։ Բայց Դաւիթի ըրած բանը Տէրոջ ²¹անհաճոյ եղաւ։