2 Samuel 14

1 Samuel  «  2 Samuel 13  ‹  2 Samuel 14  ›  2 Samuel 15  »  1 Kings

ՅՈՎԱԲ ԿԸ ԿԱՐԳԱԴՐԷ ԱԲԻՍՈՂՈՄԻ ՎԵՐԱԴԱՐՁԸ

Շարուհեայի որդին՝ Յովաբ հասկցաւ թէ թագաւորին սիրտը դէպի Աբիսողոմը դարձած է։

Ուստի Յովաբ Թեկուէ մարդ ղրկեց, անկէ իմաստուն կին մը բերել տուաւ, եւ անոր ըսաւ. «Կ’աղերսե՛մ, քեզ սգաւո՛ր ձեւացուր, սուգի հանդերձնե՛ր հագիր, հոտաւէտ իւղով մի՛ օծուիր, հապա մեռելի մը համար երկար ժամանակէ ի վեր սգացող կնոջ մը պէս եղիր,

ու թագաւորի՛ն մտիր եւ անոր սա՛ կերպով խօսէ». ու Յովաբ անոր ¹պատուիրեց իր ըսելիք խօսքերը՝՝։

Երբ այդ թեկուացի կինը թագաւորին ²մտաւ խօսելու համար՝՝, դէմքի վրայ գետինը իյնալով անոր երկրպագեց եւ ըսաւ. «Ո՛վ թագաւոր, ³օգնութեա՛ն հասիր ինծի՝՝»։

Թագաւորը անոր ըսաւ. «Քեզի ի՞նչ եղաւ»։ Կինը պատասխանեց. «Իրա՛ւ ես այրի կին մըն եմ, եւ ամուսինս մեռած է։

Քու ⁴աղախինդ երկու որդի ունէր. երկուքը դաշտի մէջ իրարու հետ կռուեցան, եւ զանոնք ⁵հաշտեցնող մը չկար. ուստի մէկը միւսը զարկաւ ու զայն մեռցուց։

Եւ ահա՛ ամբողջ գերդաստանը քու աղախինիդ դէմ կանգնեցաւ, ու ըսին. “Յանձնէ՛ իր եղբայրը զարնողը, որպէսզի զինք մեռցնենք՝ իր մեռցուցած եղբօր կեանքին համար, եւ ժառանգորդն ալ բնաջնջենք”։ Ինծի մնացած կայծը պիտի մարեն, երկրագունդին վրայ ամուսինիս ո՛չ անուն, ո՛չ ալ մնացորդ ⁶պահելով»։

Թագաւորը կնոջ ըսաւ. «Տո՛ւնդ գնա, ու ես քեզի համար պատուէր կու տամ»։

Թեկուացի կինը թագաւորին ըսաւ. «Ո՛վ թագաւոր, իմ տէ՛րս. անօրէնութիւնը ի՛մ վրաս եւ հօ՛րս տան վրայ ըլլայ, բայց թագաւորն ու անոր գահը անպարտ ըլլան»։

Թագաւորը ըսաւ. «Ո՛վ որ քեզի բան մը ըսէ, զայն ինծի՛ բեր, եւ անգա՛մ մըն ալ քեզի պիտի չդպչի»։

Ինք ըսաւ. «Կ’աղերսե՛մ, թագաւորը թող յիշէ Տէրը՝ իր Աստուածը, ու չթողու որ արիւնի վրէժխնդիրները կոտորածը շատցնեն եւ որդիս բնաջնջեն»։ Ան ալ ըսաւ. «Տէրը կ’ապրի՛. որդիիդ գլուխէն մա՛զ մը գետինը պիտի չիյնայ»։

Այն ատեն կինը ըսաւ. «Կ’աղերսե՛մ, քու աղախինդ իմ տիրոջս՝ թագաւորին խօսք մը թող ըսէ»։ Ան ալ ըսաւ. «Խօսէ՛»։

Կինը ըսաւ. «Ուրեմն ինչո՞ւ Աստուծոյ ժողովուրդին դէմ այդպիսի բան կը մտածես. որովհետեւ թագաւորը այս խօսքերը ըսելով յանցաւորի պէս կ’ըլլայ, այնքան ատեն որ իր աքսորածը չվերադարձնէ։

Արդարեւ մենք անշուշտ պիտի մեռնինք, ու գետինը թափուած ջուրին կը նմանինք, որ կարելի չէ հաւաքել։ Աստուած մարդու մը ⁷կեանքը չ’առներ, հապա միջոցներ կը հնարէ, որպէսզի աքսորականը իրմէ աքսորուած չմնայ։

Հիմա իմ տիրոջս՝ թագաւորին այս խօսքը ըսելու եկայ, քանի որ ժողովուրդը զիս վախցուց ու քու աղախինդ ըսաւ. “Այժմ թագաւորին հետ խօսիմ, թերեւս թագաւորը իր աղախինին խօսքը կատարէ.

Որովհետեւ թագաւորը մտիկ ընելով՝ իր աղախինը պիտի ազատէ այն մարդուն ձեռքէն, որ զիս ու իմ որդիս միասին Աստուծոյ ժառանգութենէն բնաջնջել կ’ուզէ”։

Եւ աղախինդ ըսաւ. “Իմ տիրոջս՝ թագաւորին խօսքը այժմ մխիթարութիւն պիտի ըլլայ”. արդարեւ իմ տէրս՝ թագաւորը Աստուծոյ հրեշտակի մը պէս է, ու բարին ու չարը կը ⁸հասկնայ։ Տէրը՝ քու Աստուածդ՝ քեզի հետ ⁹ըլլայ»։

Թագաւորը կնոջ պատասխանեց. «Այժմ քեզի հարցնելիք բանս ինձմէ մի՛ պահեր»։ Կինը ըսաւ. «Իմ տէրս՝ թագաւորը թող խօսի»։

Թագաւորը ըսաւ. «Արդեօք այս բոլորին մէջ Յովաբի ձեռքը քեզի հե՞տ է»։ Կինը պատասխանեց. «Ո՛վ թագաւոր, իմ տէ՛րս, քու անձդ կ’ապրի՛. ո՛չ մէկը իմ տիրոջս՝ թագաւորին բոլոր ըսածներէն աջ կողմ կամ ձախ կողմ կրնայ շեղիլ. արդարեւ քու ծառադ Յովա՛բն է ինծի պատուիրողը, եւ այս բոլոր խօսքերը քու աղախինիդ բերանը դնողը անիկա՛ է։

Այս խնդիրին ¹⁰ուրիշ երեւոյթ տալու՝՝ համար է որ քու ծառադ Յովաբ այս բանը ըրաւ. իմ տէրս իմաստուն է՝ Աստուծոյ հրեշտակի մը իմաստութեան համեմատ, ու երկրի վրայ պատահող ամէն ինչ գիտէ»։

Թագաւորը Յովաբի ըսաւ. «Ահա՛ այժմ այս բանը ըրի. գնա՛, երիտասարդ Աբիսողոմը վերադարձո՛ւր»։

Այն ատեն Յովաբ երեսին վրայ գետին ինկաւ, անոր երկրպագեց, թագաւորը օրհնեց եւ ըսաւ. «Քու ծառադ այսօր գիտցաւ թէ քու ¹¹առջեւդ շնորհք գտայ, ո՛վ թագաւոր, իմ տէ՛րս, քանի որ թագաւորը իր ծառային խօսքը գործադրեց»։

Ուստի Յովաբ կանգնեցաւ, Գեսուր գնաց, եւ Աբիսողոմը Երուսաղէմ բերաւ։

Թագաւորը ըսաւ. «Թող ¹²մեկուսանայ իր տունը, բայց իմ երեսս չտեսնէ»։ Աբիսողոմ իր տունը մեկուսացաւ, սակայն թագաւորին երեսը չտեսաւ։

ԱԲԻՍՈՂՈՄ ԿԸ ՀԱՇՏՈՒԻ ԹԱԳԱՒՈՐԻՆ ՀԵՏ

Ամբողջ Իսրայէլի մէջ Աբիսողոմի պէս գեղեցիկ ու գովելի մարդ մը չկար. իր ոտքին ներբանէն մինչեւ գլուխին գագաթը արատ մը չունէր։

Երբ իր գլուխը կ’ածիլէր, (արդարեւ ամէն տարուան վախճանին զայն կ’ածիլէր, քանի մազերը իր վրայ ծանրութիւն կ’ըլլային. ուստի զայն կ’ածիլէր,) գլուխին մազերը կը կշռէր.— թագաւորական կշռաքարով՝ երկու հարիւր սիկղ։

Աբիսողոմի երեք որդի ու Թամար անունով աղջիկ մը ծնան. ան գեղեցիկ տեսքով կին մըն էր։

Աբիսողոմ Երուսաղէմի մէջ լման երկու տարի բնակեցաւ, բայց թագաւորին երեսը չտեսաւ։

Աբիսողոմ Յովաբի մարդ ղրկեց՝ որպէսզի զինք թագաւորին ղրկէ. բայց ինք անոր երթալ չուզեց։ Դարձեալ երկրորդ անգամ մարդ ղրկեց, սակայն ան չուզեց երթալ։

Այն ատեն Աբիսողոմ իր ծառաներուն ըսաւ. «Տեսէ՛ք, Յովաբի արտը՝ իմ արտիս մօտ է. ան հոն գարի ունի։ Գացէ՛ք զայն կրակո՛վ վառեցէք»։ Աբիսողոմի ծառաներն ալ այդ արտը կրակով վառեցին։

Յովաբ կանգնեցաւ, Աբիսողոմի տունը գնաց եւ անոր ըսաւ. «Ինչո՞ւ քու ծառաներդ իմ արտս կրակով վառեցին»։

Աբիսողոմ Յովաբի պատասխանեց. «Ահա՛ քեզի մարդ ղրկեցի ու ըսի. “Հո՛ս եկուր, քեզ թագաւորին ղրկեմ, որպէսզի ըսես. "Գեսուրէն ինչո՞ւ եկայ. ինծի համար աւելի լաւ էր հոն մնալ։ Հիմա կ’ուզեմ թագաւորին երեսը տեսնել. եթէ իմ վրաս անօրէնութիւն մը կայ, զիս թող մեռցնէ"”»։

Յովաբ թագաւորին գնաց եւ այս բանը անոր իմացուց։ Թագաւորը Աբիսողոմը կանչեց. ան ալ թագաւորին քով գնաց, ու թագաւորին առջեւ դէմքին վրայ գետին իյնալով՝ երկրպագեց. իսկ թագաւորը Աբիսողոմը համբուրեց։