2 Samuel 15

1 Samuel  «  2 Samuel 14  ‹  2 Samuel 15  ›  2 Samuel 16  »  1 Kings

ԱԲԻՍՈՂՈՄ ԱՊՍՏԱՄԲՈՒԹԻՒՆ ԿԸ ԾՐԱԳՐԷ

Ատկէ ետք Աբիսողոմ իրեն համար կառքեր եւ ձիեր պատրաստեց, նաեւ իր առջեւէն ¹վազող յիսուն մարդ՝՝։

Աբիսողոմ կանուխ կ’ելլէր ու դրան ճամբային քով կը կայնէր. ամէն անգամ որ մարդ մը դատ ունենար եւ դատաստանի համար թագաւորին գար, Աբիսողոմ զայն կը կանչէր ու կ’ըսէր. «Դուն ո՞ր քաղաքէն ես»։ Երբ ան ըսէր. “Ծառադ Իսրայէլի տոհմերէն մէկէն է”,

Աբիսողոմ անոր կ’ըսէր. «Նայէ՛, քու խնդիրդ ²բանաւոր եւ իրաւացի է. բայց թագաւորին կողմէն քեզի մտիկ ընող չկայ»։

Աբիսողոմ կ’ըսէր. «Երանի՜ թէ զիս այս երկրին վրայ դատաւոր դնէին, ամէն վէճ կամ դատ ունեցող մարդ ինծի գար, եւ անոր իրաւունքը պաշտպանէի»։

Երբ մարդ մը մօտենար՝ իրեն երկրպագելու, ինք ձեռքը կ’երկարէր, զայն կը բռնէր ու կը համբուրէր։

Դատաստանի համար թագաւորին եկող ամբողջ Իսրայէլի հետ այս կերպով վարուելով՝ Աբիսողոմ Իսրայէլի մարդոց սիրտը ³իրեն դարձուց՝՝։

⁴Քառասուն տարուան վախճանին՝ Աբիսողոմ թագաւորին ըսաւ. «Կ’աղերսե՛մ, երթամ ու Տէրոջ ըրած ուխտս կատարեմ Քեբրոնի մէջ։

Որովհետեւ երբ Գեսուր կը բնակէի՝ Սուրիայի մէջ, ծառադ ուխտ ըրաւ եւ ըսաւ. “Եթէ Տէրը զիս Երուսաղէմ վերադարձնէ, Տէրոջ պաշտամունք պիտի կատարեմ”»։

Թագաւորը իրեն ըսաւ. «Գնա՛ խաղաղութեամբ»։ Ինք ալ կանգնեցաւ ու Քեբրոն գնաց։

Աբիսողոմ Իսրայէլի բոլոր տոհմերուն ⁵պատգամաւորներ ղրկեց եւ ըսաւ. «Երբ շեփորին ձայնը լսէք՝ ըսէ՛ք. “Աբիսողոմ Քեբրոնի մէջ թագաւոր եղաւ”»։

Աբիսողոմի հետ Երուսաղէմէն երկու հարիւր մարդ գնաց՝ հրաւիրուած ըլլալով։ Անոնք ⁶պարզամտութեամբ գացին, ոչինչ գիտնալով։

Մինչ Աբիսողոմ զոհ կը մատուցանէր, Դաւիթի խորհրդականը՝ Գեղոնացի Աքիտոփէլը՝ իր Գեղոն քաղաքէն կանչել տուաւ։ Դաւադրութիւնը զօրացաւ, ու ժողովուրդը հետզհետէ կը շատնար Աբիսողոմի քով։

ԴԱՒԻԹ ԿԸ ՓԱԽՉԻ ԵՐՈՒՍԱՂԷՄԷՆ

Տեղեկաբեր մը Դաւիթի եկաւ եւ ըսաւ. «Իսրայելացիներուն սիրտը Աբիսողոմի ⁷դարձաւ՝՝»։

Այն ատեն Դաւիթ Երուսաղէմի մէջ իրեն հետ եղող բոլոր ծառաներուն ըսաւ. «Կանգնեցէ՛ք ու փախչի՛նք, քանի որ Աբիսողոմի ⁸ձեռքէն մեզի ազատում չկայ։ Շտապելո՛վ գացէք, որ ան շուտով մեզի չհասնի, մեր վրայ չարիք ⁹չբերէ, ու քաղաքը սուրի բերանէ չանցընէ»։

Թագաւորին ծառաները թագաւորին ըսին. «Մեր տէր թագաւորը ինչ որ ընտրէ, ահա՛ իր ծառաները պատրաստ են ընելու»։

Թագաւորը դուրս ելաւ, եւ իր ¹⁰ետեւէն՝ իր ամբողջ տունը. սակայն թագաւորը իր հարճերէն տասը կին թողուց, որպէսզի տունը պահպանեն։

Թագաւորը դուրս ելաւ, ու իր ետեւէն՝ ամբողջ ժողովուրդը. անոնք հեռաւոր ¹¹տեղ մը կանգ առին։

Իր բոլոր ծառաները, բոլոր Քերեթիները եւ բոլոր Փելեթիները իր քովէն ¹²կը քալէին՝՝։ Իր ետեւէն Գեթէն եկած բոլոր Գեթացիները, վեց հարիւր մարդ, թագաւորին առջեւէն ¹³կը քալէին՝՝։

Թագաւորը Գեթացի Եթթիի ըսաւ. «Ինչո՞ւ դուն ալ մեզի հետ պիտի երթաս. վերադարձի՛ր ու թագաւորի՛ն հետ կեցիր, քանի որ դուն օտարազգի մըն ես, նաեւ եղած տեղդ տարագրուած ես։

Դուն երէկ եկար, եւ այսօր ես քեզ թափառեցնե՞մ մեզի հետ։ Քանի ես կ’երթամ ո՛ւր որ կրնամ երթալ, դուն վերադարձի՛ր, ու եղբայրնե՛րդ ալ վերադարձուր. ողորմութիւնն ու ճշմարտութիւնը քեզի հետ ըլլան»։

Եթթի թագաւորին պատասխանեց. «Տէրը կ’ապրի՛, եւ իմ տէրս՝ թագաւորն ալ կ’ապրի՛. իմ տէրս՝ թագաւորը ո՛ւր որ ըլլայ, մահուան մէջ թէ կեանքի մէջ, քու ծառադ ալ հոն պիտի ըլլայ»։

Դաւիթ Եթթիի ըսաւ. «Ուրեմն գնա՛, անցի՛ր»։ Գեթացի Եթթի իրեն հետ եղող բոլոր մարդոցմով ու բոլոր մանուկներով անցաւ։

Ամբողջ երկիրը բարձր ձայնով կու լար, մինչ ամբողջ ժողովուրդը կ’անցնէր։ Թագաւորը Կեդրոն վտակէն անցաւ, ու ամբողջ ժողովուրդը դէպի անապատին ճամբան անցաւ։

Ահա՛ Սադովկ ալ, եւ անոր հետ բոլոր Ղեւտացիները՝ Աստուծոյ ուխտին տապանակը կը կրէին։ Աստուծոյ տապանակը զետեղեցին, ու Աբիաթար ¹⁴զոհ կը մատուցանէր՝՝ մինչեւ որ քաղաքէն դուրս ելլող ամբողջ ժողովուրդին անցնիլը լրացաւ։

Թագաւորը Սադովկի ըսաւ. «Աստուծոյ տապանակը քաղա՛քը վերադարձուր։ Եթէ Տէրոջ ¹⁵առջեւ շնորհք գտնեմ, զիս պիտի վերադարձնէ եւ ինծի ցուցնէ զայն ու անոր բնակարանը։

Բայց եթէ ինծի սա՛ ըսէ. “Քեզմէ չեմ ախորժիր”, ահա՛ հոս եմ, ինծի թող ընէ ինչ որ ¹⁶իրեն հաճելի՝՝ է»։

Թագաւորը Սադովկ քահանային ըսաւ. «Դուն տեսանող չե՞ս։ Խաղաղութեամբ քաղա՛քը վերադարձիր. քու որդիդ՝ Աքիմաաս, եւ Աբիաթարի որդին՝ Յովնաթան, ձեր երկու որդիները՝ ձեզի հետ։

Ահա՛ ես անապատին դաշտերուն մէջ պիտի սպասեմ, մինչեւ որ ձեզմէ ¹⁷լուր մը ստանամ՝՝»։

Ուստի Սադովկ եւ Աբիաթար Աստուծոյ տապանակը Երուսաղէմ վերադարձուցին, ու հոն մնացին։

Դաւիթ Ձիթենեաց լերան զառիվերէն կը բարձրանար. մինչ կը բարձրանար՝ կու լար։ Գլուխը ծածկած էր, եւ բոկոտն կը քալէր։ Անոր հետ եղող ամբողջ ժողովուրդն ալ կը բարձրանար. իւրաքանչիւրը իր գլուխը ծածկած էր, ու լալով կը բարձրանային։

Դաւիթի պատմեցին. «Աքիտոփէլ Աբիսողոմի հետ դաւադրողներուն մէջ է»։ Դաւիթ ըսաւ. «Ո՛վ Տէր, կ’աղերսե՛մ, Աքիտոփէլի ծրագիրը ¹⁸ձախողեցո՛ւր»։

Երբ Դաւիթ լերան գագաթը հասաւ, ուր Աստուծոյ երկրպագեց, ահա՛ Արաքացի Քուսի՝ հանդերձները պատռած ու գլուխին վրայ հող ցանած՝ զինք դիմաւորեց։

Դաւիթ անոր ըսաւ. «Եթէ ինծի հետ ¹⁹գաս, ինծի բեռ կ’ըլլաս։

Բայց եթէ քաղաքը վերադառնաս եւ Աբիսողոմի ըսես. “Ո՛վ թագաւոր, ես քու ծառադ պիտի ըլլամ. առաջ քու հօրդ ծառան էի, ու հիմա քու ծառադ եմ”, այն ատեն Աքիտոփէլի ծրագիրը կրնաս ձախողեցնել ինծի համար։

Միթէ Սադովկ եւ Աբիաթար քահանաները հոն քեզի հետ չե՞ն. թագաւորին տունէն ինչ որ լսես, Սադովկ ու Աբիաթար քահանաներո՛ւն պատմէ։

Ահա՛ հոն անոնց երկու որդիները, Սադովկի որդին՝ Աքիմաաս ու Աբիաթարի որդին՝ Յովնաթան, իրենց հետ են։ Ձեր լսած բոլոր խօսքերը ինծի իմացուցէ՛ք անոնց ²⁰միջոցով»։

Ուստի Դաւիթի բարեկամը՝ Քուսի քաղաքը մտաւ. Աբիսողոմ ալ Երուսաղէմ հասաւ։