2 Samuel 18

1 Samuel  «  2 Samuel 17  ‹  2 Samuel 18  ›  2 Samuel 19  »  1 Kings

ԱԲԻՍՈՂՈՄ ԿԸ ՊԱՐՏՈՒԻ ԵՒ ԿԸ ՍՊԱՆՆՈՒԻ

Դաւիթ իրեն հետ եղող ¹զօրքը աչքէ անցուց, եւ անոնց վրայ հազարապետներ ու հարիւրապետներ նշանակեց։

Դաւիթ զօրքին մէկ երրորդը Յովաբի ²ձեռքը յանձնեց՝՝, մէկ երրորդը Յովաբի եղբօր՝ Շարուհեան Աբեսսայի ձեռքը, եւ մէկ երրորդը Գեթացի Եթթիի ձեռքը։ Թագաւորը ժողովուրդին ըսաւ. «Անպատճառ ես ալ ձեզի հետ ³պատերազմի պիտի երթամ՝՝»։

Բայց ժողովուրդը պատասխանեց. «⁴Մի՛ գար՝՝. արդարեւ եթէ մենք փախչինք, անոնք մեզի համար չեն մտահոգուիր։ Թէեւ մեր կէսը մեռնի, անոնք մեզի համար չեն մտահոգուիր. բայց դո՛ւն՝ մեր տասը հազարին չափ ես։ Ուստի հիմա աւելի լաւ է որ դուն քաղաքէ՛ն մեզի օգնութեան հասնիս»։

Թագաւորն ալ անոնց ըսաւ. «⁵Ձեզի հաճելի՝՝ եղածը պիտի ընեմ»։ Թագաւորը դրան քով կայնեցաւ, մինչ ամբողջ զօրքը՝ հարիւրներով եւ հազարներով՝ դուրս կ’ելլէր։

Թագաւորը Յովաբի, Աբեսսայի ու Եթթիի պատուիրեց. «Իմ սիրոյս համար երիտասարդ Աբիսողոմի հետ մե՛ղմօրէն վարուեցէք»։ Երբ թագաւորը Աբիսողոմի մասին բոլոր պետերուն պատուիրեց, ամբողջ զօրքը լսեց։

Զօրքը դուրս ելաւ՝ դաշտը, Իսրայէլի դէմ. պատերազմը Եփրեմի անտառին մէջ եղաւ։

Հոն Իսրայէլի զօրքը Դաւիթի ծառաներուն առջեւ պարտուեցաւ. այդ օրը մեծ կոտորած եղաւ հոն, ու քսան հազար մարդ ինկաւ։

Հոն պատերազմը ամբողջ երկրին ⁶վրայ տարածուեցաւ, եւ այդ օրը անտառը սուրին սպառածէն աւելի ժողովուրդ սպառեց։

Աբիսողոմ Դաւիթի ծառաներուն հանդիպեցաւ. Աբիսողոմ ջորիի մը վրայ հեծեր էր։ Ջորին մեծ բեւեկնիի մը թաւ ոստերուն տակ մտաւ։ Անոր գլուխը բեւեկնիէն բռնուեցաւ, ու երկինքի եւ երկրի միջեւ ⁷կախուած մնաց՝՝. իսկ տակը եղող ջորին անցաւ գնաց։

Մարդ մը զայն տեսնելով՝ Յովաբի պատմեց. «Ահա՛ Աբիսողոմը բեւեկնիէ մը կախուած տեսայ»։

Յովաբ իրեն իմացնող մարդուն ըսաւ. «Ահա՛ դուն զայն տեսար. ինչո՞ւ զայն հոն գետինը չզարկիր։ Այն ատեն քեզի տասը սիկղ արծաթ եւ գօտի մը կու տայի»։

Այդ մարդը Յովաբի ըսաւ. «Եթէ ափիս մէջ հազար սիկղ արծաթ ալ ⁸դրուէր, թագաւորին որդիին վրայ ձեռքս չէի երկարեր. արդարեւ ⁹մենք լսեցինք թագաւորին պատուէրը՝՝ քեզի, Աբեսսայի ու Եթթիի, երբ ըսաւ. “¹⁰Ուշադի՛ր եղէք որ ո՛չ մէկը երիտասարդ Աբիսողոմի դպչի՝՝”։

¹¹Եթէ թագաւորին պատուէրը մտիկ չընէի, իմ կեանքս վտանգի մէջ պիտի դնէի՝՝. արդարեւ ոչինչ թագաւորէն կը պահուի, ու դուն ալ ինծի դէմ պիտի կենայիր»։

Յովաբ ըսաւ. «Ես քու առջեւդ այսպէս պիտի չսպասեմ», եւ իր ձեռքը երեք գեղարդ առնելով՝ զանոնք Աբիսողոմի սիրտը խոթեց, երբ ան տակաւին ողջ էր բեւեկնիին ¹²վրայ։

Յետոյ՝ տասը երիտասարդներ, Յովաբի զինակիրները, շրջապատելով Աբիսողոմը՝ զարկին ու զինք մեռցուցին։

Յովաբ շեփոր հնչեցուց, եւ զօրքը Իսրայէլը հալածելէն վերադարձաւ, քանի որ Յովաբ զօրքը զսպեց։

Աբիսողոմը առին, զայն անտառը՝ մեծ փոսի մը մէջ նետեցին, ու անոր վրայ յոյժ մեծ քարակոյտ մը դիզեցին։ Ամբողջ Իսրայէլը փախաւ, իւրաքանչիւրը իր վրանը։

Աբիսողոմ ողջ եղած ատենը արձան մը առեր էր, եւ զայն իրեն համար Թագաւորի հովիտին մէջ կանգնեցուցեր էր՝ ըսելով. «Որդի չունիմ որ իմ անունիս յիշատակը պահէ»։ Ուստի այդ արձանը իր անունով կոչեր էր. ան մինչեւ այսօր “Աբիսողոմի ¹³յուշարձանը” կը կոչուի։

ԱԲԻՍՈՂՈՄԻ ՄԱՀԸ Կ’ԻՄԱՑՈՒԻ ԴԱՒԻԹԻ

Սադովկի որդին՝ Աքիմաաս ըսաւ. «Այժմ վազեմ ու թագաւորին աւետիս տանիմ թէ Տէրը իր դատը պաշտպանեց, ու զինք իր թշնամիներուն ձեռքէն ազատեց»։

Յովաբ անոր ըսաւ. «Դուն այսօր աւետաբեր պիտի չըլլաս. ուրիշ օր մը աւետիս տար, բայց այսօր աւետիս պիտի չտանիս, որովհետեւ թագաւորին որդին մեռաւ»։

Ապա Յովաբ Քուսիի ըսաւ. «Գնա՛, տեսածդ թագաւորի՛ն պատմէ»։ Քուսի Յովաբի երկրպագեց, եւ վազելով գնաց։

Սադովկի որդին՝ Աքիմաաս դարձեալ Յովաբի ըսաւ. «Ինչ որ ալ ըլլայ, կ’աղերսե՛մ, ե՛ս ալ Քուսիի ետեւէն վազեմ»։ Յովաբ ըսաւ. «Ինչո՞ւ վազես, որդի՛ս, քանի տանելիք աւետիս մը չունիս»։

Ան ըսաւ. «Ինչ որ ալ ըլլայ, վազեմ»։ Ինք ալ անոր ըսաւ. «Վազէ՛»։ Աքիմաաս դաշտին ճամբայով վազեց, ու Քուսիէն անցաւ։

Դաւիթ երկու դռներուն մէջտեղ նստած էր. դէտը դրան տանիքին վրայ՝ դէպի պարիսպը գնաց, եւ աչքերը վերցնելով տեսաւ թէ ահա՛ մարդ մը մինակ կը վազէր։

Այն ատեն դէտը գոչելով թագաւորին իմացուց, ու թագաւորը ըսաւ. «Եթէ մինակ է, անոր բերանը աւետիս կայ»։ Մինչ ան կու գար եւ կը մօտենար,

դէտը ուրիշ վազող մարդ մըն ալ տեսաւ։ Դէտը դռնապանին գոչելով ըսաւ. «Ահա՛ ուրիշ մարդ մըն ալ մինակ կը վազէ»։ Թագաւորը ըսաւ. «Ա՛ն ալ աւետաբեր է»։

Դէտը ըսաւ. «Առաջինին վազքը Սադովկի որդիին՝ Աքիմաասի վազքին պէս կ’երեւնայ ինծի»։ Թագաւորը ըսաւ. «Անիկա բարի մարդ է, ու բարի աւետիսով կու գայ»։

Աքիմաաս գոչելով թագաւորին ըսաւ. «¹⁴Ողջո՜յն». ու դէմքի վրայ գետինը իյնալով՝ թագաւորին երկրպագեց, եւ ըսաւ. «Օրհնեա՜լ ըլլայ Տէրը՝ քու Աստուածդ, որ իմ տիրոջս՝ թագաւորին դէմ ձեռք բարձրացնողները քու ձեռքդ մատնեց»։

Թագաւորը ըսաւ. «Երիտասարդ Աբիսողոմը ողջ առո՞ղջ է»։ Աքիմաաս պատասխանեց. «Երբ Յովաբ թագաւորին ծառան ու զիս՝ քու ծառադ ղրկեց, մեծ բազմութիւն մը տեսայ, բայց ի՛նչ ըլլալը չհասկցայ»։

Թագաւորը ըսաւ. «Դարձի՛ր եւ հո՛ս կայնէ»։ Ան ալ դարձաւ ու կայնեցաւ։

Եւ ահա՛ Քուսի եկաւ, ու Քուսի ըսաւ. «Իմ տիրոջս՝ թագաւորին աւետիս կու տամ, թէ բոլոր քեզի դէմ կանգնողներուն ձեռքէն Տէրը այսօր քեզ ազատեց, եւ դատդ պաշտպանեց»։

Թագաւորը Քուսիի ըսաւ. «Երիտասարդ Աբիսողոմը ողջ առո՞ղջ է»։ Այն ատեն Քուսի պատասխանեց. «Իմ տիրոջս՝ թագաւորին թշնամիները, ու չարութեան համար բոլոր քեզի դէմ կանգնողները այդ երիտասարդին պէս ըլլան»։

Թագաւորը վրդովեցաւ, դրան վերնատունը ելաւ ու լացաւ. եւ քալելով սա՛ կ’ըսէր. «Որդեա՜կս Աբիսողոմ, որդեա՜կս, որդեա՜կս Աբիսողոմ. երանի՜ թէ քու տեղդ ես մեռնէի. Աբիսողո՜մ, որդեա՜կս, որդեա՜կս»։