2 Samuel 19

1 Samuel  «  2 Samuel 18  ‹  2 Samuel 19  ›  2 Samuel 20  »  1 Kings

ՅՈՎԱԲ ԿԸ ՅԱՆԴԻՄԱՆԷ ԴԱՒԻԹԸ

Յովաբի պատմուեցաւ. «Ահա՛ թագաւորը Աբիսողոմի համար կու լայ ու կը սգայ»։

Այդ օրը ¹յաղթանակը սուգի վերածուեցաւ ամբողջ ²զօրքին համար, քանի որ զօրքը այդ օրը լսեց թէ կ’ըսեն. «Թագաւորը իր որդիին համար կը սգայ»։

Այդ օրը զօրքը գաղտագողի քաղաքը մտաւ, ինչպէս զօրք մը գաղտագողի պիտի մտնէր՝ պատերազմէն փախչելուն համար խպնելով։

Թագաւորը իր երեսը ծածկած էր. թագաւորը բարձր ձայնով կ’աղաղակէր. «Որդեա՜կս Աբիսողոմ, Աբիսողո՜մ, որդեա՜կս, որդեա՜կս»։

Յովաբ տունէն ներս մտաւ՝ թագաւորին քով, ու ըսաւ. «Այսօր բոլոր ծառաներուդ երեսը ամօթահար ըրիր, որոնք այսօր ազատեցին քու կեանքդ, որդիներուդ եւ աղջիկներուդ կեանքը, կիներուդ ու հարճերուդ կեանքը.

որովհետեւ քեզ ատողները կը սիրես, իսկ քեզ սիրողները կ’ատես։ Արդարեւ այսօր ապացուցանեցիր թէ պետերդ եւ ծառաներդ ոչինչ են քեզի համար։ Այսօր լաւ հասկցայ թէ եթէ Աբիսողոմ ողջ ըլլար ու մենք բոլորս մեռած ըլլայինք այսօր, ³քեզի հաճելի պիտի թուէր՝՝։

Հիմա կանգնէ՛, դո՛ւրս ելիր, եւ ծառաներուդ ⁴քաղցրութեա՛մբ խօսէ. արդարեւ Տէրոջմով երդում կ’ընեմ թէ եթէ դուրս չելլես, այս գիշեր ո՛չ մէկը քեզի հետ պիտի իջեւանի. ասիկա քեզի աւելի գէշ պիտի ըլլայ, քան մանկութենէդ մինչեւ հիմա վրադ հասած բոլոր չարիքները»։

Ուստի թագաւորը կանգնեցաւ ու դուռը նստաւ։ Այն ատեն ամբողջ զօրքին իմացուցին. «Ահա՛ թագաւորը դուռը նստած է», եւ ամբողջ զօրքը թագաւորին առջեւ եկաւ. բայց Իսրայէլ փախեր էր, իւրաքանչիւրը իր վրանը։

ԴԱՒԻԹ ԿԸ ՎԵՐԱԴԱՌՆԱՅ ԵՐՈՒՍԱՂԷՄ

Իսրայէլի բոլոր տոհմերուն մէջ ամբողջ ժողովուրդը կը ⁵վիճէր՝ ըսելով. «Մեր թշնամիներուն ձեռքէն մեզ ազատողը թագաւո՛րն է, Փղշտացիներուն ձեռքէն մեզ փրկողը անիկա՛ է. ու հիմա Աբիսողոմի պատճառով այս երկրէն փախեր է։

Իսկ Աբիսողոմ, որ մեր վրայ թագաւոր օծեցինք, պատերազմի մէջ մեռաւ։ Ուստի հիմա ինչո՞ւ լուռ կը կենաք թագաւորը վերադարձնելու մասին»։

Դաւիթ թագաւորը Սադովկ եւ Աբիաթար քահանաներուն մարդ ղրկեց՝ ըսելով. «Յուդայի երէցներուն հետ խօսեցէ՛ք ու ըսէ՛ք. “Ինչո՞ւ վերջինները կ’ըլլաք թագաւորը իր տունը վերադարձնելու, քանի որ ամբողջ Իսրայէլի խօսքը թագաւորին հասաւ՝ մինչեւ իր տունը։

Դուք իմ եղբայրներս էք, ոսկորս եւ միսս. ուստի ինչո՞ւ վերջինները կ’ըլլաք թագաւորը իր տունը վերադարձնելու”։

Ամեսայիի ալ ըսէ՛ք. “Դուն իմ ոսկորս ու միսս չե՞ս. Աստուած ինծի այսպէս եւ ասկէ աւելին ընէ, եթէ Յովաբի տեղ ⁶ընդմիշտ իմ առջեւս սպարապետ չըլլաս”»։

Այսպէս՝ բոլոր Յուդայեաններուն սիրտը մէկ մարդու սիրտի պէս իրեն հակեցուց, ու անոնք թագաւորին պատգամաւորներ ղրկեցին՝ ըսելով. «Վերադարձի՛ր, թէ՛ դուն եւ թէ քու բոլոր ծառաներդ»։

Այն ատեն թագաւորը վերադարձաւ ու մինչեւ Յորդանան եկաւ։ Յուդա ալ մինչեւ Գաղգաղա եկաւ, որպէսզի թագաւորը դիմաւորէ եւ թագաւորը Յորդանանէն անցընէ։

Գերայի որդին՝ Բաւուրիմացի Բենիամինեան Սեմէի, արտորալով Յուդայեաններուն հետ իջաւ՝ Դաւիթ թագաւորը դիմաւորելու։

Անոր հետ Բենիամինէ հազար մարդ կար, նաեւ Սաւուղի տան սպասաւորը՝ Սիբա, իր տասնհինգ որդիներով ու քսան ծառաներով։ Անոնք թագաւորին առջեւ ⁷Յորդանանէն անցան՝՝։

ԹԱԳԱՒՈՐԸ ԿԸ ՆԵՐԷ ՍԵՄԷԻԻ

Գետանաւ մը անցաւ՝ թագաւորին տունը անցընելու եւ անոր ⁸հաճելի եղածը ընելու համար։ Երբ թագաւորը Յորդանանէն անցաւ, Գերայի որդին՝ Սեմէի թագաւորին առջեւ ինկաւ

ու թագաւորին ըսաւ. «Իմ տէրս ⁹ինծի անօրէնութիւն թող չսեպէ՝՝, իմ տիրոջս՝ թագաւորին Երուսաղէմէն ելած օրը՝ ծառայիդ գործած անիրաւութիւնը մի՛ յիշեր, եւ թագաւորը զայն իր սիրտին մէջ թող ¹⁰չպահէ։

Արդարեւ քու ծառադ գիտէ թէ մեղանչեց. ուստի ահա՛ այսօր եկայ՝ Յովսէփի ամբողջ տունէն առաջ, որպէսզի իմ տէրս՝ թագաւորը ¹¹դիմաւորեմ»։

Շարուհեայի որդին՝ Աբեսսա պատասխանեց. «Միթէ Սեմէի ասոր համար պիտի չմեռցուի՞, քանի ինք Տէրոջ օծեալը անիծեց»։

Բայց Դաւիթ ըսաւ. «Դուք ինծի հետ ի՞նչ գործ ունիք, ո՛վ Շարուհեայի որդիներ, որ այսօր ինծի կ’ընդդիմանաք։ Միթէ այսօր Իսրայէլի մէջ մարդ մը պիտի մեռցուի՞. որովհետեւ ¹²գիտեմ թէ ես այսօր Իսրայէլի վրայ թագաւոր եմ»

Թագաւորը Սեմէիի ըսաւ. «Պիտի չմեռնիս». ու թագաւորը անոր երդում ըրաւ։

ԴԱՒԻԹ ԿԸ ՆԵՐԷ ՄԵՄՓԻԲՈՍԹԷԻ

Սաւուղի որդին՝ Մեմփիբոսթէ թագաւորը դիմաւորելու իջաւ։ Թագաւորին գացած օրէն մինչեւ անոր խաղաղութեամբ եկած օրը՝ ան ոտքերը դարմանած չէր, մօրուքը յարդարած չէր եւ հագուստները լուացած չէր։

Երբ ¹³թագաւորը դիմաւորելու համար Երուսաղէմ եկաւ՝՝, թագաւորը անոր ըսաւ. «Ո՛վ Մեմփիբոսթէ, ինչո՞ւ ինծի հետ չգացիր»։

Ան ալ պատասխանեց. «Ո՛վ թագաւոր, իմ տէ՛րս, ծառաս զիս խաբեց։ Արդարեւ քու ծառադ ըսաւ. “Էշը համետեմ, որպէսզի վրան հեծնեմ ու թագաւորին հետ երթամ. որովհետեւ ծառադ կաղ է”։

Բայց անիկա քու ծառադ — զիս — զրպարտեց իմ տիրոջս՝ թագաւորին առջեւ. սակայն իմ տէրս՝ թագաւորը Աստուծոյ հրեշտակի մը պէս է։ Ուստի ¹⁴քեզի հաճելի՝՝ եղածը ըրէ՛։

Թէպէտ իմ հօրս ամբողջ տունը իմ տիրոջս՝ թագաւորին առջեւ միայն մահուան արժանի մարդիկ էին, դուն քու ծառադ սեղանդ կերակուր ուտողներուն ¹⁵կարգը դրիր. ուստի ա՛լ ասկէ ետք ի՞նչ իրաւունք ունիմ թագաւորին ¹⁶բողոքելու»։

Թագաւորը անոր ըսաւ. «Ինչո՞ւ տակաւին քու խնդիրներուդ մասին կը խօսիս։ Ես ըսի. “Դուն եւ Սիբա՝ բաժնեցէ՛ք արտերը ձեր միջեւ”»։

Մեմփիբոսթէ թագաւորին ըսաւ. «Ան նոյնիսկ բոլո՛րը թող առնէ, որովհետեւ իմ տէրս՝ թագաւորը խաղաղութեամբ իր տունը վերադարձաւ»։

ԴԱՒԻԹ ԿԸ ՀԱՏՈՒՑԱՆԷ ԲԵՐԶԵԼԻԻ

Գաղաադացի Բերզելի Ռովգելիմէն իջաւ, ու թագաւորին հետ Յորդանանէն անցաւ, որպէսզի անոր ուղեկցի Յորդանանէն անդին։

Բերզելի յոյժ ծեր մարդ մըն էր, ութսուն տարեկան. այնքան ժամանակ որ թագաւորը Մանայիմի մէջ կեցաւ, ի՛նք զայն կերակրեց, որովհետեւ յոյժ մեծ մարդ մըն էր։

Թագաւորը Բերզելիի ըսաւ. «Ինծի՛ հետ անցիր, որ քեզ իմ քովս՝ Երուսաղէմի մէջ կերակրեմ»։

Իսկ Բերզելի թագաւորին ըսաւ. «¹⁷Տակաւին քանի՞ տարի պիտի ապրիմ՝՝, որ թագաւորին հետ Երուսաղէմ բարձրանամ։

Ես այսօր ութսուն տարեկան եմ. միթէ լաւն ու գէշը կրնա՞մ ¹⁸զատորոշել. միթէ ծառադ իր կերածին ու խմածին համը կրնա՞յ առնել։ Տակաւին երգիչներուն կամ երգչուհիներուն ձայնը կրնա՞մ լսել. ուստի քու ծառադ իմ տիրոջս՝ թագաւորին ա՛լ ինչո՞ւ բեռ ըլլայ։

Քու ծառադ թագաւորին հետ քիչ մը Յորդանանէն անդին պիտի անցնի. թագաւորը ինչո՞ւ այդպիսի փոխարէն հատուցանէ ինծի։

Կ’աղերսե՛մ, ծառադ թող վերադառնայ, որ իմ քաղաքիս մէջ մեռնիմ՝ իմ հօրս ու մօրս գերեզմանին քով։ Ահա՛ քու ծառադ՝ Քամաամ. ի՛նք թող անցնի իմ տիրոջս՝ թագաւորին հետ, եւ ¹⁹քեզի հաճելի՝՝ եղածը ըրէ՛ անոր»։

Թագաւորը պատասխանեց. «Քամաամ ինծի հետ թող անցնի, ու ես քեզի հաճելի եղածը պիտի ընեմ անոր. ինձմէ ինչ որ ²⁰խնդրես՝ քեզի պիտի ընեմ»։

Ամբողջ ժողովուրդը Յորդանանէն անցաւ. թագաւորն ալ անցաւ։ Թագաւորը Բերզելին համբուրեց եւ զայն օրհնեց. ան ալ իր տեղը վերադարձաւ։

ՅՈՒԴԱ ԵՒ ԻՍՐԱՅԵԼ ԿԸ ՎԻՃԻՆ ԹԱԳԱՒՈՐԻՆ ՀԱՄԱՐ

Թագաւորը Գաղգաղա անցաւ, ու Քամաամ անոր հետ անցաւ։ Այսպէս՝ Յուդայի ամբողջ ժողովուրդը, եւ Իսրայէլի ալ կէս ժողովուրդը թագաւորը անցուցին։

Եւ ահա՛ բոլոր Իսրայելացիները թագաւորին եկան ու թագաւորին ըսին. «Ինչո՞ւ մեր եղբայրները՝ Յուդայեանները քեզ գողցան, ու թագաւորը, անոր տունը եւ անոր հետ Դաւիթի բոլոր մարդիկը Յորդանանէն անցուցին»։

Բոլոր Յուդայեանները Իսրայելացիներուն պատասխանեցին. «Որովհետեւ թագաւորը մեզի մերձաւոր է։ Այս խնդիրին համար ինչո՞ւ այսպէս կը բորբոքիք. միթէ թագաւորէն բան մը կերա՞նք, կամ թէ ան մեզի պարգեւ մը տուա՞ւ»։

Իսրայելացիները Յուդայեաններուն պատասխանեցին. «Մենք թագաւորին քով տասը բաժին ունինք. նաեւ Դաւիթի վրայ ձեզմէ աւելի իրաւունք ունինք։ Ինչո՞ւ մեզ անարգեցիք, ու մեր թագաւորը վերադարձնելու համար՝ ²¹առաջ մեզմէ խորհուրդ չհարցուցիք՝՝»։ Բայց Յուդայեաններուն խօսքը Իսրայելացիներուն խօսքէն աւելի խիստ եղաւ։