2 Samuel 20

1 Samuel  «  2 Samuel 19  ‹  2 Samuel 20  ›  2 Samuel 21  »  1 Kings

ՍԱԲԷԷԻ ԱՊՍՏԱՄԲՈՒԹԻՒՆԸ

Հոն Բենիամինեան ¹անօրէն մարդ մը ²գտնուեցաւ, Բոքորեան Սաբէէ անունով։ Ան շեփոր հնչեցուց եւ ըսաւ. «Մենք Դաւիթի քով բաժին չունինք, ո՛չ ալ Յեսսէի որդիին քով՝ ժառանգութիւն. ո՛վ Իսրայէլ, իւրաքանչիւրը իր վրանը թող վերադառնայ»։

Ուստի բոլոր Իսրայելացիները Դաւիթէ զատուեցան ու Բոքորեան Սաբէէի հետեւեցան, բայց Յուդայեանները՝ Յորդանանէն մինչեւ Երուսաղէմ՝ իրենց թագաւորին յարեցան։

Դաւիթ իր տունը եկաւ՝ Երուսաղէմ։ Թագաւորը իր տան պահպանութեան համար թողուցած տասը կիները՝ իր հարճերը առաւ, զանոնք պահպանուած տան մը մէջ դրաւ ու զանոնք կերակրեց, բայց անոնց չմտաւ։ Անոնք մինչեւ իրենց մեռնելու օրը արգելափակուեցան, եւ այրիի պէս ապրեցան։

Թագաւորը Ամեսայիի ըսաւ. «Երեք օրուան մէջ Յուդայեանները ինծի՛ ³կանչէ, ու դո՛ւն ալ հոս ⁴ներկայացիր»։

Ուստի Ամեսայի Յուդան կանչելու գնաց. բայց Դաւիթի իրեն որոշած ատենէն աւելի ուշացաւ։

Այն ատեն Դաւիթ Աբեսսայի ըսաւ. «Հիմա Բոքորեան Սաբէէ՝ Աբիսողոմէ աւելի չարիք պիտի ընէ մեզի. ուրեմն քու տիրոջդ ծառաները ա՛ռ քեզի հետ ու հետապնդէ՛ զինք, որ իրեն համար պարսպապատ քաղաքներ չգտնէ եւ մեզմէ չխուսափի»։

Այսպէս՝ Յովաբի մարդիկը, Քերեթիներն ու Փելեթիները եւ բոլոր զօրաւորները անոր ետեւէն դուրս ելան, ու Բոքորեան Սաբէէն հետապնդելու համար Երուսաղէմէն գացին։

Երբ անոնք Գաբաւոնի մէջ եղող մեծ քարին քով էին, Ամեսայի անոնց առջեւ հասաւ։ Յովաբ իր հագած վերարկուն գօտեւորած էր, եւ անոր վրայէն ուրիշ գօտիով՝ մէջքը սուր մը կապած էր, իր պատեանին մէջ։ Երբ ⁵կ’երթար՝ սուրը պատեանէն ինկաւ։

Յովաբ Ամեսայիի ըսաւ. «Եղբայրս, ողջ առո՞ղջ ես»։ Յովաբ Ամեսային համբուրելու համար՝ աջ ձեռքով անոր մօրուքէն բռնեց։

Ամեսայի Յովաբի ձեռքը եղած սուրէն չզգուշացաւ. ուստի անով Յովաբ սնակուշտէն զարկաւ զայն, եւ անոր աղիքները գետինը թափեց։ Անոր երկու անգամ չզարկաւ, ու ան մեռաւ։ Ապա Յովաբ եւ իր եղբայրը՝ Աբեսսա Բոքորեան Սաբէէն հետապնդեցին։

Այն ատեն Յովաբի մարդոցմէն մէկը ⁶Ամեսայիի քով կայնեցաւ ու ըսաւ. «Ո՛վ որ Յովաբէ կ’ախորժի եւ ո՛վ որ Դաւիթի կողմէն է, Յովաբի՛ թող հետեւի»։

Ամեսայի իր արիւնին մէջ կը թաւալէր՝ պողոտային վրայ։ Երբ այդ մարդը տեսաւ թէ ամբողջ զօրքը կանգ առաւ, Ամեսային պողոտայէն փոխադրեց արտի մը մէջ, եւ զայն հագուստով մը ծածկեց. արդարեւ տեսաւ թէ անոր քով հասնող ամէն մարդ կանգ կ’առնէ։

Երբ զայն պողոտայէն վերցուց, ամէն մարդ անցաւ ու Յովաբի ետեւէն գնաց՝ Բոքորեան Սաբէէն հետապնդելու համար։

(Բայց ան Իսրայէլի բոլոր տոհմերուն մէջէն անցեր էր — մինչեւ Աբէլ եւ Բեթմաաքա — բոլոր Բերացիներուն հետ, որոնք իր քով հաւաքուելով՝ իրեն հետեւեր էին։)

Անոնք հասան ու Բեթմաաքայի Աբէլին մէջ զինք պաշարեցին. քաղաքին առջեւ հողաբլուր մը բարձրացուցին, որ պատուարին մօտ կանգնուեցաւ, եւ Յովաբի հետ եղող ամբողջ զօրքը պարիսպը կը քանդէր՝ զայն տապալելու համար։

Իմաստուն կին մը քաղաքէն պոռաց. «Լսեցէ՛ք, լսեցէ՛ք. կ’աղերսե՛մ, Յովաբի ըսէ՛ք. “Հո՛ս մօտեցիր, որպէսզի քեզի հետ խօսիմ”»։

Յովաբ անոր մօտեցաւ, ու կինը ըսաւ. «Յովաբը դո՞ւն ես»։ Ան ալ պատասխանեց. «Ես եմ»։ Ուստի կինը անոր ըսաւ. «Քու աղախինիդ խօսքերը մտի՛կ ըրէ»։ Ան ալ պատասխանեց. «Ահա՛ մտիկ կ’ընեմ»։

Կինը խօսեցաւ՝ ըսելով. «Նախապէս ⁷սովորութիւն ունէին ըսելու՝՝. “Թող Աբէլի ⁸երթան հարցնեն՝՝, եւ այնպէս լմնցնեն”։

Ես Իսրայէլի մէջ խաղաղարար ու հաւատարիմ քաղաք մըն եմ. բայց դուն կը ⁹ջանաս ¹⁰աւերել այնպիսի ¹¹քաղաք մը, որ Իսրայէլի մէջ մայրաքաղաք է՝՝։ Տէրոջ ժառանգութիւնը ինչո՞ւ կը ¹²կործանես»։

Յովաբ պատասխանեց. «Հեռո՛ւ ինձմէ, հեռո՛ւ ինձմէ, որ ես կործանեմ կամ կոտորեմ։

Խնդիրը այդպէս չէ. հապա Եփրեմի լեռնէն՝ Բոքորեան Սաբէէ անունով մարդ մը իր ձեռքը Դաւիթ թագաւորին դէմ բարձրացուց. միա՛յն զինք յանձնեցէք, եւ այս քաղաքէն կ’երթամ»։ Կինը Յովաբի ըսաւ. «Ահա՛ անոր գլուխը պարիսպին վրայէն քեզի պիտի նետուի»։

Ուստի կինը ամբողջ ժողովուրդին գնաց, իր իմաստութեամբ խօսեցաւ, եւ Բոքորեան Սաբէէի գլուխը կտրեցին ու Յովաբի նետեցին։ Այն ատեն ան շեփոր հնչեցուց, եւ այդ քաղաքէն քաշուելով ցրուեցան՝ իւրաքանչիւրը իր վրանը։ Յովաբ ալ թագաւորին վերադարձաւ՝ Երուսաղէմ։

ԴԱՒԻԹԻ ԶՕՐԱՎԱՐՆԵՐԸ

Յովաբ Իսրայէլի բոլոր զօրքերուն վրայ նշանակուած էր, Յովիադայի որդին՝ Բանեա Քերեթիներուն ու Փելեթիներուն վրայ,

եւ Ադորամ՝ հարկերուն վրայ։ Աքիղուդի որդին՝ Յովսափատ դիւանադպիր էր,

Սուսա՝ ատենադպիր, Սադովկ ու Աբիաթար՝ քահանաներ.

իսկ Յայիրացի Իրաս ալ Դաւիթի նախարարն էր։