Deuteronomy 8

Numbers  «  Deuteronomy 7  ‹  Deuteronomy 8  ›  Deuteronomy 9  »  Joshua

ԼԱՒ ԵՐԿԻՐ ՄԸ ՊԻՏԻ ՍՏԱՑՈՒԻ

«Զգուշութեա՛մբ գործադրեցէք բոլոր պատուիրանները՝ որ այսօր կը հրամայեմ ձեզի, որպէսզի ապրիք, բազմանաք, մտնէք այն երկիրը՝ որ Տէրը երդումով խոստացաւ ձեր հայրերուն, եւ անոր տիրանաք։

Ու յիշէ՛ այն ամբողջ ճամբան, որ Տէրը՝ քու Աստուածդ՝ այս քառասուն տարիները անապատին մէջ քեզի քալել տուաւ, քեզ խոնարհեցնելու, քեզ փորձարկելու եւ սիրտիդ մէջինը գիտնալու համար, թէ արդեօք դուն իր պատուիրանները պիտի պահե՛ս՝ թէ ոչ։

Տէրը քեզ խոնարհեցուց, անօթեցուց, ու քեզի մանանայ կերցուց, որ դուն չէիր ճանչնար, ո՛չ ալ քու հայրերդ կը ճանչնային, քեզի գիտցնելու համար թէ մարդը միայն հացով չ’ապրիր, հապա մարդը կ’ապրի ամէն խօսքով՝ որ Տէրոջ բերանէն կ’ելլէ։

Այս քառասուն տարիներու ընթացքին քու վրայէդ հանդերձներդ չմաշեցան եւ ոտքերդ չուռեցան։

Նաեւ սիրտիդ մէջ գիտցի՛ր թէ ինչպէս մարդ մը իր որդին կը խրատէ, նոյնպէս Տէրը՝ քու Աստուածդ՝ քեզ կը խրատէ։

Ուրեմն Տէրոջ՝ քու Աստուծոյդ պատուիրաննե՛րը պահէ, որպէսզի անոր ճամբաներէն ընթանաս ու անկէ վախնաս։

Արդարեւ Տէրը՝ քու Աստուածդ՝ լաւ երկիր մը կը տանի քեզ, հովիտներէ եւ լեռներէ ¹բխող վտակներով, ակերով ու ²խորունկ ջուրերով երկիր մը.

ցորենի, գարիի, որթատունկերու, թզենիներու եւ նռնենիներու երկիր մը, ձէթի ու մեղրի երկիր մը.

այնպիսի երկիր մը՝ ուր ³կուշտ հաց պիտի ուտես եւ անոր մէջ ոչինչ պիտի պակսի քեզի. երկիր մը՝ որուն քարերը երկաթ են, ու անոր լեռներէն պղինձ պիտի ⁴հանես։

Ուստի, երբ ուտես եւ կշտանաս, օրհնէ՛ Տէրը, քու Աստուածդ, այն լաւ երկրին համար՝ որ քեզի տուաւ»։

ՏԷՐԸ ՄՈՌՆԱԼՈՒՆ ԴԷՄ ԶԳՈՒՇԱՑՈՒՄ

«Զգուշացի՛ր որ Տէրը, քու Աստուածդ, չմոռնաս՝ չպահելով անոր պատուիրանները, ⁵դատավճիռներն ու կանոնները, որ այսօր քեզի կը պատուիրեմ։

Երբ ուտես ու կշտանաս, վայելչագեղ տուներ կառուցանես եւ բնակիս անոնց մէջ,

ու երբ արջառներդ եւ ոչխարներդ բազմանան, նաեւ արծաթդ ու ոսկիդ շատնան եւ ամբողջ ունեցածդ շատնայ,

սիրտդ թող չգոռոզանայ ու մի՛ մոռնար Տէրը՝ քու Աստուածդ, որ Եգիպտոսի երկրէն՝ ստրկութեան տունէն՝ քեզ հանեց,

եւ այդ մեծ ու ահաւոր, խայթող օձերով ու կարիճներով լեցուն, ծարաւուտ եւ անջուր երկրին մէջ քեզի քալել տուաւ, ապառաժէն քեզի ջուր հանեց,

եւ անապատին մէջ քու հայրերուդ չճանչցած մանանան քեզի կերցուց, որպէսզի քեզ խոնարհեցնէ ու փորձարկէ, եւ վերջաւորութեան քեզի բարիք ընէ։

Սիրտիդ մէջ մի՛ ըսեր թէ “այս հարստութիւնը իմ կարողութեամբս ու ձեռքիս ⁶ոյժով վաստկեցայ”։

Հապա յիշէ՛ Տէրը՝ քու Աստուածդ — քանի որ հարստութիւն վաստկելու համար քեզի կարողութիւն տուողը ա՛ն է —, որպէսզի հաստատէ իր ուխտը՝ որուն համար երդում ըրած էր հայրերուդ, ինչպէս այսօր կը տեսնես։

Իսկ եթէ Տէրը՝ քու Աստուածդ մոռնալով ուրիշ աստուածներու հետեւիս, զանոնք պաշտես ու անոնց երկրպագես, այսօր ձեզի կը վկայեմ թէ դուք ա՛նպատճառ պիտի կորսուիք.

ինչպէս այն ազգերը՝ որ Տէրը ձեր առջեւէն պիտի կորսնցնէ, ա՛յնպէս պիտի կորսուիք, որովհետեւ Տէրոջ՝ ձեր Աստուծոյն խօսքը մտիկ չըրիք»։