Deuteronomy 17

Numbers  «  Deuteronomy 16  ‹  Deuteronomy 17  ›  Deuteronomy 18  »  Joshua

«Տէրոջ՝ քու Աստուծոյդ մի՛ զոհեր արատ կամ որեւէ ¹թերութիւն ունեցող արջառ մը կամ ոչխար մը, որովհետեւ ասիկա Տէրոջ՝ քու Աստուծոյդ առջեւ գարշելի է։

Տէրոջ՝ քու Աստուծոյդ քեզի տուած քաղաքներէն մէկուն մէջ, եթէ գտնուի ձեր մէջ այնպիսի մարդ մը կամ կին մը, որ Տէրոջ՝ քու Աստուծոյդ ²առջեւ չարիք գործէ՝ անոր ուխտը անտեսելով,

ու երթայ եւ ուրիշ աստուածներ պաշտէ — արեւը, կամ լուսինը, կամ երկինքի ³զարդերէն որեւէ մէկը — ու անոնց երկրպագէ,— ինչ որ ես չեմ պատուիրեր,—

երբ ասիկա քեզի պատմուի, դուն՝ լսելէդ ետք՝ լա՛ւ որոնէ. ⁴եթէ ըսուածը ճշմարիտ եւ բանը ստոյգ է, այսինքն՝ Իսրայէլի մէջ այսպիսի գարշութիւն մը գործուած է,

այս չար արարքը գործող մարդը կամ կինը ⁵քաղաքէդ դուրս՝՝ հանէ՛, ու այդ մարդը կամ կինը ⁶քարկոծէ՛ ՝ որպէսզի մեռնի։

Մահապարտը երկու կամ երեք ⁷վկայութեամբ թող մեռցուի. մէկ վկայութեամբ թող չմեռցուի։

Զայն մեռցնելու համար՝ նախ վկաներո՛ւն ձեռքը անոր վրայ թող ըլլայ, յետոյ՝ ամբողջ ժողովուրդին ձեռքը։ Այսպէս՝ չարութիւնը քու մէջէդ բնաջնջէ՛։

Երբ ⁸ծագած խնդիրի մը դատաստանը խրթին երեւնայ քեզի,— քաղաքներուդ մէջ վէճի պատճառ եղող ⁹զանազան արիւնահեղութիւններու, դատերու կամ վէրքերու մասին՝՝,— ելի՛ր ու բարձրացի՛ր Տէրոջ՝ քու Աստուծոյդ ընտրած տեղը,

¹⁰մօտեցի՛ր Ղեւտացի քահանաներուն եւ այդ օրերու դատաւորին, ու խորհո՛ւրդ հարցուր. անոնք ալ ¹¹դատարանին վճիռը պիտի հաղորդեն քեզի։

Գործադրէ՛ այն վճիռը՝ որ քեզի պիտի հաղորդեն Տէրոջ ընտրած այդ տեղը. ամէն ինչ որ քեզի սորվեցնեն՝ զգուշութեա՛մբ գործադրէ։

Գործադրէ՛ անոնց քեզի սորվեցուցած օրէնքին հրամանը եւ քեզի ըսած դատավճիռը. անոնց քեզի հաղորդած վճիռէն մի՛ խոտորիր, ո՛չ աջ կողմ եւ ո՛չ ձախ կողմ։

Բայց եթէ մարդ մը յանդգնելով մտիկ չընէ Տէրոջ՝ քու Աստուծոյդ պաշտօն կատարելու համար հոն կայնող քահանային կամ դատաւորին խօսքը, այդ մարդը պիտի մեռնի ու չարութիւնը Իսրայէլէն պիտի բնաջնջես,

որպէսզի ամբողջ ժողովուրդը լսելով վախնայ եւ անգա՛մ մըն ալ յանդուգն չըլլայ»։

ԹԱԳԱՒՈՐԻ ՅԱՏՈՒԿ ՀՐԱՀԱՆԳ

«Երբ Տէրոջ՝ քու Աստուծոյդ քեզի տուած երկիրը մտնես, անոր տիրանալով հոն բնակիս եւ ըսես. “Իմ շուրջս եղող բոլոր ազգերուն պէս ե՛ս ալ իմ վրաս թագաւոր մը կ’ուզեմ նշանակել”,

անպատճառ Տէրոջ՝ քու Աստուծո՛յդ ընտրած մարդը վրադ թագաւոր նշանակէ. քու եղբայրներէ՛դ մէկը վրադ թագաւոր նշանակէ. քու եղբայրդ չեղող օտարազգին չես կրնար կարգել։

Սակայն ¹²թագաւորը իր ձիերը թող չշատցնէ, ո՛չ ալ ժողովուրդը Եգիպտոս վերադարձնէ՝ շատ ձիեր ունենալու համար. որովհետեւ Տէրը ձեզի ըսաւ. “Ասկէ ետք՝ անգա՛մ մըն ալ այդ ճամբայէն մի՛ վերադառնաք”։

Նաեւ ան իր կիները թող չշատցնէ, որպէսզի սիրտը չշեղի, ո՛չ ալ չափազանց արծաթ ու ոսկի ¹³դիզէ իրեն համար։

Երբ իր թագաւորութեան գահին վրայ բազմի, իրեն համար այս Օրէնքին մէկ օրինակը թող գրէ գիրքի մը մէջ՝ Ղեւտացի քահանաներուն քով եղող գիրքէն։

Ան իր քով թող ըլլայ, եւ իր կեանքին բոլոր օրերուն մէջ զայն թող կարդայ. որպէսզի Տէրոջմէն՝ իր Աստուծմէն վախնալ սորվի, այս Օրէնքին բոլոր խօսքերն ու այս կանոնները պահելով՝ զանոնք գործադրելու համար.

որպէսզի իր սիրտը եղբայրներուն վրայ չգոռոզանայ, եւ այս պատուիրաններէն աջ կողմ կամ ձախ կողմ չշեղի. որպէսզի Իսրայէլի մէջ իր թագաւորութեան օրերը երկար ըլլան, թէ՛ իրեն եւ թէ իր որդիներուն համար»։