Deuteronomy 18

Numbers  «  Deuteronomy 17  ‹  Deuteronomy 18  ›  Deuteronomy 19  »  Joshua

ՔԱՀԱՆԱՆԵՐՈՒՆ ԲԱԺԻՆԸ

«Ղեւտացի քահանաները, Ղեւիի ամբողջ տոհմը, Իսրայէլի հետ ո՛չ բաժին, ո՛չ ալ ժառանգութիւն պիտի ունենան. Տէրոջ պատարագներէն եւ անոր ժառանգութենէն պիտի ուտեն։

Անոնք իրենց եղբայրներուն մէջ ժառանգութիւն պիտի չունենան, քանի որ Տէ՛րն է անոնց ժառանգութիւնը, ինչպէս իրենց ըսաւ։

Ահա՛ւասիկ քահանաներուն իրաւունքը՝ որ պիտի ստանան ժողովուրդէն, անոնցմէ՝ որ զոհ կը մատուցանեն, արջառ ըլլայ թէ ոչխար. թեւը, ծնօտներն ու քաղիրթը քահանային պիտի տան։

Քու ցորենիդ, քաղցուիդ եւ իւղիդ ¹երախայրիքը, նաեւ ոչխարներուդ առաջին ²բուրդը անոր պիտի տաս,

որովհետեւ Տէրը՝ քու Աստուածդ՝ բոլոր տոհմերուդ մէջէն զա՛յն ընտրեց, զինք եւ իր որդիները, որպէսզի ³ամէն ատեն՝՝ իր առջեւ կայնի՝ Տէրոջ անունով պաշտօն կատարելու համար։

Երբ քու քաղաքներէդ որեւէ մէկուն մէջ պանդխտացած Ղեւտացի մը — ամբողջ Իսրայէլէն — երթայ ու իր անձին ⁴բուռն փափաքով հասնի Տէրոջ ընտրած տեղը,

Տէրոջ՝ իր Աստուծոյն անունով պաշտօն պիտի կատարէ իր բոլոր Ղեւտացի եղբայրներուն պէս, որ հոն կը կայնին՝ Տէրոջ առջեւ։

Անոնք ուտելիքի հաւասար բաժիններ պիտի ունենան, իր հօրենական ինչքին ⁵ծախուելէն՝՝ զատ»։

ԿՌԱՊԱՇՏԱԿԱՆ ՓՈՐՁԵՐՈՒ ԴԷՄ ԶԳՈՒՇԱՑՈՒՄ

«Երբ մտնես Տէրոջ՝ քու Աստուծոյդ քեզի տուած երկիրը, մի՛ սորվիր այդ ազգերուն գարշութիւններուն նմանները գործել։

Ձեր մէջ թող չգտնուի ոեւէ մէկը՝ որ իր որդին կամ աղջիկը կրակէ անցընէ, կամ դիւթութիւն, կամ գուշակութիւն, կամ հմայութիւն, եւ կամ կախարդութիւն ընէ.

նաեւ թովիչ, կամ վհուկ, կամ նշանագէտ, եւ կամ մեռելահարցուկ թող չգտնուի։

Արդարեւ ո՛վ որ այս բաները կ’ընէ՝ Տէրոջ առջեւ գարշելի է. այս գարշութիւններո՛ւն պատճառով Տէրը՝ քու Աստուածդ՝ առջեւէդ կը վտարէ զանոնք։

⁶Կատարե՛լապէս հետեւէ Տէրոջ՝ քու Աստուծոյդ՝՝.

որովհետեւ այդ ազգերը՝ որոնց պիտի տիրանաս՝ գուշակներուն եւ դիւթերուն մտիկ կ’ընեն, բայց Տէրը՝ քու Աստուածդ՝ քեզի չի թոյլատրեր այսպէս ընել»։

ՄԱՐԳԱՐԷ ՄԸ ՂՐԿԵԼՈՒ ԽՈՍՏՈՒՄ

«Տէրը՝ քու Աստուածդ՝ ⁷քու եղբայրներուդ մէջէն՝՝ ինծի նման մարգարէ մը պիտի հանէ քեզի։ Անո՛ր մտիկ ըրէք,

ինչպէս Քորեբ լեռը՝ համախմբումին օրը, Տէրոջմէն՝ քու Աստուծմէդ խնդրեցիր՝ ըսելով. “Տէրոջ՝ իմ Աստուծոյս ձայնը վերստին չլսեմ ու այս մեծ կրակը անգա՛մ մըն ալ չտեսնեմ, որպէսզի չմեռնիմ”։

Տէրն ալ ինծի ըսաւ. “Իրենց ըսած խօսքերը շիտակ են։

Քեզի նման մարգարէ մը պիտի հանեմ անոնց՝ իրենց եղբայրներուն մէջէն, եւ իմ խօսքերս անոր բերանը պիտի դնեմ։ Ամէ՛ն ինչ որ անոր պատուիրեմ՝ անոնց պիտի ըսէ,

եւ ո՛վ որ մտիկ չընէ խօսքերս՝ որ ան իմ անունովս պիտի ըսէ, իրմէ հաշիւ պիտի պահանջեմ։

Իսկ եթէ մարգարէ մը յանդգնի իմ անունովս ըսել խօսք մը՝ որ իրեն չեմ պատուիրեր ըսել, կամ ուրիշ աստուածներու անունով խօսի, այդ մարգարէն պիտի մեռնի”։

Եթէ սիրտիդ մէջ ըսես. “Ի՞նչպէս գիտնանք թէ այդ խօսքը Տէրը չէ ըսեր”,

երբ մարգարէ մը Տէրոջ անունով խօսի բայց այդ բանը ⁸չպատահի, ո՛չ ալ իրագործուի, ա՛յդ խօսքն է որ Տէրը չէ ըսեր. մարգարէն յանդգնութեամբ ըսեր է զայն, իրմէ մի՛ վախնար»։