Deuteronomy 19

Numbers  «  Deuteronomy 18  ‹  Deuteronomy 19  ›  Deuteronomy 20  »  Joshua

ԱՊԱՍՏԱՆԻ ՔԱՂԱՔՆԵՐԸ (Թիւ. 35. 9-34։ Յես. 20. 1-9)

«Երբ Տէրը՝ քու Աստուածդ՝ կոտորէ այն ազգերը, որոնց երկիրը Տէրը՝ քու Աստուածդ՝ քեզի պիտի տայ, ու դուն զանոնք վտարելով՝ անոնց քաղաքներուն եւ տուներուն մէջ բնակիս,

քեզի երե՛ք քաղաք զատէ երկրիդ մէջտեղը, որ Տէրը՝ քու Աստուածդ՝ քեզի կու տայ անոր տիրանալու համար։

Քեզի ճամբա՛յ պատրաստէ, ու Տէրոջ՝ քու Աստուծոյդ քեզի ժառանգութեան համար տուած երկրիդ հողամասը երեքի՛ բաժնէ, որպէսզի ամէն մարդասպան հոն փախչի։

Ահա՛ւասիկ մարդասպանին հոն փախչելու եւ ողջ մնալու ¹կանոնը. ո՛վ որ անգիտակցաբար ²սպաննէ իր ընկերը՝ որ առաջուընէ չէր ատեր,

— ինչպէս երբ մէկը իր ընկերին հետ անտառը երթայ՝ փայտ կտրելու համար, եւ իր ձեռքով ծառ կտրելու համար տապարը վերցուցած ատեն՝ երկաթը կոթէն խուսափելով ընկերին հանդիպի ու զայն մեռցնէ,— անիկա այդ քաղաքներէն մէկը թող փախչի եւ ողջ մնայ.

որպէսզի արիւնի վրէժխնդիրը՝ մինչ սիրտը տաքցած է՝ մարդասպանը չհետապնդէ, ճամբան երկայն ըլլալով՝ անոր չհասնի ու զայն ³չմեռցնէ։ Ան մեռնելու արժանի չէ, քանի որ առաջուընէ զայն չէր ատեր.

ուստի քեզի կը պատուիրեմ. “Քեզի երե՛ք քաղաք զատէ”։

Երբ Տէրը՝ քու Աստուածդ՝ հողամասդ ընդարձակէ, ինչպէս հայրերուդ երդում ըրաւ, եւ հայրերուդ խոստացած բոլոր երկիրները քեզի տայ,

— եթէ պահես ու գործադրես այս բոլոր պատուիրանները՝ որ այսօր քեզի կը հրամայեմ, Տէրը՝ քու Աստուածդ՝ սիրելով եւ միշտ անոր ճամբաներէն ընթանալով,— այս երեքին վրայ քեզի ուրի՛շ երեք քաղաք ալ աւելցուր.

որպէսզի երկրիդ մէջ, որ Տէրը՝ քու Աստուածդ՝ քեզի կու տայ իբր ժառանգութիւն, անմեղ արիւն չթափուի ու ⁴դուն արիւնի պարտական չըլլաս՝՝։

Բայց եթէ մարդ մը իր ընկերը ատելով՝ անոր համար դարան մտնէ, եւ անոր դէմ կանգնելով ⁵զայն զարնէ՝՝ ու ան մեռնի, ապա այդ քաղաքներէն մէկը փախչի,

իր քաղաքին երէցները մարդ թող ղրկեն, զայն անկէ բերեն եւ արիւնի վրէժխնդիրին ձեռքը մատնեն, որպէսզի մեռնի։

Աչքդ անոր վրայ թող չխղճայ. անմեղ արիւնը Իսրայէլի մէջէն բնաջնջէ՛, որպէսզի քեզի բարիք ըլլայ»։

ՀԻՆ ԿԱԼՈՒԱԾԻ ՍԱՀՄԱՆՆԵՐ

«Մի՛ տեղափոխեր ⁶դրացիիդ սահմանաքարը՝ որ նախնիքները հաստատած պիտի ըլլան քու ⁷կալուածիդ մէջ, որ պիտի ժառանգես այն երկրին մէջ՝ որ Տէրը՝ քու Աստուածդ՝ քեզի կու տայ անոր տիրանալու համար»։

ՎԿԱՆԵՐՈՒ ՄԱՍԻՆ

«Մէկ վկայ ⁸բաւական մի՛ սեպեր՝՝ մարդու մը դէմ՝ որեւէ անօրէնութեան կամ մեղքի համար — անոր գործած որեւէ մեղքին համար. երկու վկաներու ⁹խօսքով, կամ երեք վկաներու խօսքով թող հաստատուի ամէն բան։

Եթէ մարդու մը դէմ սուտ վկայ մը կանգնի՝ անոր ապստամբութեան մասին ¹⁰վկայելու համար,

այդ երկու մարդիկը, որոնց միջեւ վէճ կայ, թող կայնին Տէրոջ առջեւ, ու քահանաներուն եւ այդ օրերու դատաւորներուն առջեւ։

Դատաւորները թող լա՛ւ որոնեն, ու ¹¹եթէ այդ վկան ¹²սուտ վկայ է եւ իր եղբօր դէմ ¹³սուտ վկայութիւն տուեր՝՝ է,

ըրէ՛ք անոր՝ ինչպէս անիկա խորհեցաւ իր եղբօր ընել։ Չարութիւնը քու մէջէդ բնաջնջէ՛,

որպէսզի ¹⁴ուրիշները լսելով վախնան, եւ ասկէ ետք՝ անգա՛մ մըն ալ ձեր մէջ այսպիսի չար արարք մը չգործեն։

Աչքդ անոր վրայ թող չխղճայ. ¹⁵կեանքի տեղ կեանք՝՝ պիտի տրուի, աչքի տեղ աչք, ակռայի տեղ ակռայ, ձեռքի տեղ ձեռք, ու ոտքի տեղ ոտք»։