Deuteronomy 21

Numbers  «  Deuteronomy 20  ‹  Deuteronomy 21  ›  Deuteronomy 22  »  Joshua

ԱՆՅԱՅՏ ՄԱՐԴԱՍՊԱՆՈՒԹԻՒՆՆԵՐՈՒ ՄԱՍԻՆ

«Եթէ այն հողին վրայ, որ Տէրը՝ քու Աստուածդ՝ քեզի կու տայ անոր տիրանալու համար, սպաննուած մարդ մը գտնուի՝ դաշտի վրայ ինկած, բայց չգիտցուի թէ ո՛վ զայն սպաններ է,

քու երէցներդ ու դատաւորներդ թող դուրս ելլեն եւ սպաննուած մարդուն եղած տեղէն մինչեւ շրջակայ քաղաքները չափեն։

Երբ սպաննուած մարդուն ամենամօտ քաղաքը հաստատուի, այդ քաղաքին երէցները արջառներէն երինջ մը թող առնեն, որ աշխատած չէ ու լուծի տակ ¹մտած չէ,

եւ այդ քաղաքին երէցները երինջը թող իջեցնեն ²մշտահոս վտակի մը քով, չհերկուած ու չսերմանուած տեղ մը, եւ հոն՝ վտակին մէջ՝ երինջին ծոծրակը թող կոտրեն։

Այն ատեն Ղեւիի որդիները՝ քահանաները թող մօտենան, որովհետեւ Տէրը՝ քու Աստուածդ զանո՛նք ընտրեց՝ իրեն պաշտօն կատարելու եւ Տէրոջ անունով օրհնելու համար, ու ամէն վէճ եւ ամէն հարուած ³անո՛նք թող դատեն՝՝։

Այդ սպաննուածին ամենամօտ քաղաքին բոլոր երէցները իրենց ձեռքերը թող լուան վտակին մէջ՝ ծոծրակը կոտրուած երինջին վրայ,

ու վկայեն. «Մեր ձեռքերը չթափեցին այս արիւնը, եւ մեր աչքերը չտեսան։

Ո՛վ Տէր, քաւութի՛ւն ըրէ քու ժողովուրդիդ՝ Իսրայէլի, որ դո՛ւն ազատեցիր, ու անմեղ արիւնը քու ժողովուրդիդ՝ Իսրայէլի ⁴մի՛ վերագրեր՝՝»։ Այսպէս՝ այդ արիւնին համար քաւութիւն պիտի ըլլայ անոնց,

եւ դուն անմեղ արիւնը քու մէջէդ պիտի բնաջնջես, ընելով ինչ որ Տէրոջ ⁵առջեւ ուղիղ է»։

ՊԱՏԵՐԱԶՄԱԿԱՆ ԳԵՐԻ ԿԻՆԵՐՈՒ ՄԱՍԻՆ

«Երբ քու թշնամիներուդ դէմ պատերազմելու ⁶երթաս, ու Տէրը՝ քու Աստուածդ՝ զանոնք քու ձեռքդ մատնէ եւ անոնցմէ գերեվարես,

եթէ գերիներուն մէջէն գեղեցիկ կազմով կին մը տեսնես ու զայն հաւնելով ուզես զայն քեզի կին առնել,

զայն տո՛ւնդ տար. իր գլուխը թող ածիլէ եւ եղունգները կտրէ,

իր վրայէն գերութեան հանդերձները թող հանէ ու տունդ բնակի։ Լման ամիս մը իր հօր ու մօր համար թող լայ. անկէ ետք անոր մտիր եւ անոր ամուսինը եղիր, ան ալ՝ քու կինդ թող ըլլայ։

Եթէ անկէ չախորժիս, զայն ազա՛տ արձակէ. բայց բնաւ դրամի համար մի՛ ծախեր զայն, ո՛չ ալ ծառայ դարձուր, որովհետեւ լլկեցիր զայն»։

ԱՆԴՐԱՆԻԿԻՆ ԺԱՌԱՆԳՈՒԹԵԱՆ ՄԱՍԻՆ

«Եթէ մարդ մը երկու կին ունենայ՝ մէկը սիրելի ու միւսը ատելի, եւ անոնք որդիներ ծնանին անոր, թէ՛ սիրելին, թէ՛ ալ ատելին, եթէ անդրանիկ որդին ատելի կնոջմէն ծնած է,

իր ունեցածը որդիներուն ⁷բաժնելու օրը պիտի չկարենայ սիրելիին որդին անդրանիկ նկատել ատելիին որդիին առջեւ, որ անդրանիկն է.

հապա ատելիին որդին անդրանիկ ճանչնալով՝ իր ամբողջ ⁸ունեցածէն երկու բաժին պիտի տայ անոր. որովհետեւ ա՛ն է իր կորովին սկիզբը, անո՛րն է անդրանկութեան իրաւունքը»։

ԱՆՀՆԱԶԱՆԴ ԶԱՒԱԿԻՆ ՄԱՍԻՆ

«Եթէ մարդ մը ապստամբ եւ անհնազանդ որդի մը ունենայ, որ իր հօր խօսքը մտիկ չ’ըներ, ո՛չ ալ իր մօր խօսքը, ու երբ զինք խրատեն՝ անոնց չի հնազանդիր,

անոր հայրն ու մայրը զայն թող բռնեն եւ դուրս հանեն՝ իր քաղաքին երէցներուն քով, իր բնակած տեղին դուռը,

ու իր քաղաքին երէցներուն ըսեն. “Մեր այս որդին ապստամբ եւ անհնազանդ է, մեր խօսքը մտիկ չ’ըներ, որկրամոլ ու արբեցող է”։

Հետեւաբար անոր քաղաքին բոլոր մարդիկը թող ⁹քարկոծեն զայն, որպէսզի մեռնի. այսպէս՝ չարութիւնը քու մէջէդ պիտի բնաջնջես, եւ ամբողջ Իսրայէլը լսելով պիտի վախնայ»։

ԶԱՆԱԶԱՆ ՕՐԷՆՔՆԵՐ

«Եթէ մարդ մը մահուան արժանի մեղք մը գործեր է, զայն մեռցնելու համար ծառէ՛ մը կախէ։

Անոր ¹⁰մարմինը ծառին վրայ թող չմնայ գիշերը, հապա ա՛նպատճառ նո՛յն օրը թաղէ զայն — որովհետեւ կախուածը Աստուծոյ անէծքն է —, որպէսզի հողդ չպղծես, որ Տէրը՝ քու Աստուածդ քեզի կու տայ՝ ժառանգելու համար»։