Deuteronomy 22

Numbers  «  Deuteronomy 21  ‹  Deuteronomy 22  ›  Deuteronomy 23  »  Joshua

«Երբ տեսնես թէ եղբօրդ եզը կամ ոչխարը իր ճամբայէն խոտորած է, անոնցմէ մի՛ թաքնուիր. ա՛նպատճառ զանոնք եղբօրդ վերադարձուր։

Բայց եթէ եղբայրդ քու մօտդ չէ, կամ զինք չես ճանչնար, տո՛ւնդ ¹տար զայն, ու մինչեւ որ եղբայրդ զայն պահանջէ՝ քովդ թող ²մնայ. յետոյ զայն իրե՛ն վերադարձուր։

Անոր իշո՛ւն նոյնպէս ըրէ. անոր հանդերձի՛ն ալ այդպէս ըրէ։ Նաեւ եղբօրդ ամէն կորսուած բանին,— որ ինք կորսնցուցած է եւ դուն կը գտնես,— նո՛յնպէս ըրէ. չես կրնար թաքնուիլ։

Երբ տեսնես թէ եղբօրդ էշը կամ իր եզը ճամբային վրայ ինկած են, անոնցմէ մի՛ թաքնուիր. ա՛նպատճառ ³օգնէ՛ իրեն՝ որ զանոնք վերցնէ՝՝։

Կնոջ մը վրայ ⁴այր մարդու՝՝ ⁵հագուստ թող չըլլայ, ո՛չ ալ այր մարդ մը կնոջ հանդերձ հագնի. որովհետեւ ո՛վ որ ասոնք կ’ընէ, Տէրոջ՝ քու Աստուծոյդ առջեւ գարշելի է։

Եթէ առջեւդ՝ ճամբան, ծառի մը վրայ կամ գետինին վրայ, թռչնազգիի մը բոյնին հանդիպիս՝ ձագերով կամ հաւկիթներով, ու մայրը ձագերուն կամ հաւկիթներուն վրայ նստած ըլլայ, մայրը իր ձագերուն հետ մի՛ առներ։

Ա՛նպատճառ մայրը արձակէ եւ ձագե՛րը քեզի առ, որպէսզի քեզի բարիք ըլլայ եւ օրերդ երկար ըլլան։

Երբ նոր տուն մը կառուցանես, տանիքիդ չորս կողմը շրջապա՛տ մը շինէ, որպէսզի մէկը անկէ վար չիյնայ ու ⁶տունդ արիւնի պարտական չըլլայ՝՝։

Այգիիդ մէջ ⁷այլեւայլ սերմեր՝՝ մի՛ ցաներ, որպէսզի ցանած սերմիդ ⁸արդիւնքը եւ այգիիդ բերքը ⁹չսրբացուին։

Եզ մը ու էշ մը միասին մի՛ գործածեր՝ երկիրը հերկելու։

Բուրդով եւ վուշով միասին գործուած այլախառն հանդերձ մի՛ հագնիր։

Հագած հանդերձիդ չորս ծայրերը ծոպե՛ր շինէ դուն քեզի»։

ՍԵՌԱՅԻՆ ՄԱՔՐՈՒԹԵԱՆ ՄԱՍԻՆ ՕՐԷՆՔՆԵՐ

«Եթէ մարդ մը կին առնէ եւ անոր մտնելէն ետք զայն ատէ,

եւ անոր դէմ զրպարտութեան խօսքերու առիթ տալով՝ զայն ¹⁰անուանարկէ ու ըսէ. “Ես այս կինը առի, բայց երբ անոր մերձեցայ՝ զայն կոյս չգտայ”,

երիտասարդուհիին հայրն ու մայրը երիտասարդուհիին կուսութեան նշանը թող առնեն եւ քաղաքին երէցներուն առջեւ հանեն՝ քաղաքին դուռը։

Երիտասարդուհիին հայրը երէցներուն թող ըսէ. “Իմ աղջիկս այս մարդուն կին տուի, ու զայն կ’ատէ.

ահա՛ անոր դէմ զրպարտութեան խօսքերու առիթ կու տայ՝ ըսելով. "Ես քու աղջիկդ կոյս չգտայ". բայց ահա՛ իմ աղջիկիս կուսութեան նշանը”. եւ լաթը քաղաքին երէցներուն առջեւ թող փռեն։

Յետոյ այդ քաղաքին երէցները թող առնեն այդ մարդը ու ¹¹պատժեն զայն,

եւ իսրայելացի կոյս մը անուանարկելուն համար՝ անկէ հարիւր սիկղ արծաթ թող առնեն իբր տուգանք, ու երիտասարդուհիին հօր թող տան. ան իր կինը պիտի ըլլայ, եւ իր կեանքին բոլոր օրերուն մէջ պիտի չկարենայ զայն արձակել։

Բայց եթէ այս խօսքը ճշմարիտ է ու երիտասարդուհիին վրայ կուսութեան նշանը չէ գտնուեր,

երիտասարդուհին դուրս պիտի հանեն՝ իր հօր տան մուտքը, եւ իր քաղաքին մարդիկը ¹²պիտի քարկոծեն՝՝ զայն՝ որպէսզի մեռնի. որովհետեւ Իսրայէլի մէջ անզգամութիւն գործած է՝ իր հօր տան մէջ պոռնկելով։ Այսպէս՝ չարութիւնը քու մէջէդ պիտի բնաջնջես։

Եթէ մէկը ¹³ամուսնացած կնոջ մը հետ պառկած գտնուի, երկուքն ալ պիտի մեռնին, թէ՛ այդ կնոջ հետ պառկող մարդը, թէ՛ ալ այդ կինը։ Այսպէս՝ չարութիւնը Իսրայէլէն պիտի բնաջնջես։

Եթէ կոյս երիտասարդուհի մը մարդու մը նշանուած ըլլայ, եւ ուրիշ մարդ մը քաղաքի մէջ գտնելով զայն՝ անոր հետ պառկի,

երկո՛ւքն ալ դուրս պիտի հանէք՝ այդ քաղաքին դուռը, ու պիտի քարկոծէք՝՝ զանոնք՝ որպէսզի մեռնին. երիտասարդուհին՝ քանի որ քաղաքին մէջ ըլլալով՝ չաղաղակեց, եւ մարդը՝ քանի որ ընկերին ¹⁴նշանածը լլկեց։ Այսպէս՝ չարութիւնը քու մէջէդ պիտի բնաջնջես։

Բայց եթէ մարդ մը դաշտի մէջ գտնէ նշանուած երիտասարդուհի մը, ու զայն բռնադատելով անոր հետ պառկի, միայն անոր հետ պառկող մարդը պիտի մեռնի.

երիտասարդուհիին ոչի՛նչ ըրէ։ Երիտասարդուհին մահուան արժանի մեղք մը չունի. որովհետեւ ինչպէս մէկը իր ընկերին վրայ ¹⁵կը յարձակի՝՝ եւ զայն կը մեռցնէ, այս խնդիրն ալ այնպէս է.

արդարեւ դաշտի մէջ գտաւ զայն ու նշանուած երիտասարդուհին աղաղակեց, բայց ո՛չ մէկը կար՝ զինք ազատելու համար։

Եթէ մարդ մը չնշանուած կոյս երիտասարդուհի մը գտնէ եւ զայն բռնելով անոր հետ պառկի, ու ¹⁶բանը իմացուի՝՝,

անոր հետ պառկող մարդը՝ երիտասարդուհիին հօր յիսուն սիկղ արծաթ պիտի տայ, եւ ան իր կինը պիտի ըլլայ, քանի որ լլկեց զայն։ Իր կեանքին բոլոր օրերուն մէջ պիտի չկարենայ զայն արձակել։

Մարդ մը իր ¹⁷հօր կինը՝՝ թող չառնէ ու հօր քղանցքը չբանայ»։