Deuteronomy 23

Numbers  «  Deuteronomy 22  ‹  Deuteronomy 23  ›  Deuteronomy 24  »  Joshua

ՏԷՐՈՋ ԺՈՂՈՎՈՒՐԴԷՆ ԱՐՏԱՔՍՈՒՄ

«Ամորձիքը ճզմուած կամ առնանդամը կտրուած մարդը Տէրոջ համախմբումը պէտք չէ մտնէ։

¹Պոռնկորդին Տէրոջ համախմբումը պէտք չէ մտնէ. մինչեւ անգամ անոր տասներորդ սերունդը Տէրոջ համախմբումը թող չմտնէ։

Ամմոնացին եւ Մովաբացին Տէրոջ համախմբումը պէտք չէ մտնեն, յաւիտեա՛ն. մինչեւ անգամ անոնց տասներորդ սերունդը Տէրոջ համախմբումը թող չմտնէ.

արդարեւ երբ դուք Եգիպտոսէն ելաք՝ ճամբային մէջ հացով ու ջուրով ձեզ չդիմաւորեցին, ու Միջագետքի Փաթուր քաղաքէն Բէովրի որդին Բաղաամը քեզի դէմ վարձեցին՝ որպէսզի քեզ անիծէ։

Բայց Տէրը՝ քու Աստուածդ՝ չուզեց Բաղաամի մտիկ ընել, հապա Տէրը՝ քու Աստուածդ՝ անէծքը քեզի համար օրհնութեան փոխեց, որովհետեւ Տէրը՝ քու Աստուածդ՝ քեզ սիրեց։

Քու կեանքիդ բոլոր օրերուն մէջ անոնց խաղաղութիւնն ու բարօրութիւնը մի՛ փնտռեր, յաւիտեա՛ն։

Եդովմայեցիէն մի՛ գարշիր, քանի որ ան եղբայրդ է։ Եգիպտացիէն ալ մի՛ գարշիր, քանի որ անոր երկրին մէջ պանդուխտ էիր։

Անոնցմէ ծնած որդիներուն միայն երրորդ սերունդը Տէրոջ համախմբումը թող մտնէ»։

ԲԱՆԱԿԱՎԱՅՐԸ ՄԱՔՈՒՐ ՊԱՀԵԼ

«Երբ թշնամիներուդ դէմ բանակով դուրս ելլես, ամէն գէշ բանէ զգուշացի՛ր։

Եթէ ձեր մէջ մարդ մը ²երազափորձութեան պատճառով մաքուր չէ, բանակավայրէն թող դուրս ելլէ. բանակավայրին մէջ թող չմտնէ,

հապա՝ իրիկուան դէմ՝ ջուրով թող լուացուի, ու երբ արեւը մայր մտնէ՝ բանակավայրին մէջ մտնէ։

Բանակավայրէն դուրս տե՛ղ մը ունեցիր, որպէսզի հոն դուրս ելլես։

Զէնքերուդ հետ ցի՛ց մը ունեցիր, որպէսզի երբ դուրսը նստիս, անով փորես ու ետեւ դառնալով կղկղանքդ ծածկես։

Արդարեւ Տէրը՝ քու Աստուածդ՝ բանակավայրիդ մէջ կը շրջի՝ քեզ ազատելու համար, եւ թշնամիներդ քու ձեռքդ մատնելու համար. ուստի բանակավայրդ թող մաքուր ըլլայ, որպէսզի ան վրադ անվայելուչ բան մը տեսնելով՝ քեզմէ չհեռանայ»։

ԶԱՆԱԶԱՆ ՕՐԷՆՔՆԵՐ

«Իր տիրոջ ձեռքը մի՛ մատներ ստրուկ մը՝ որ իր տիրոջմէն խուսափած է քու քովդ։

Քեզի հետ թող բնակի, ձեր մէջ, իր ընտրած տեղը՝ քաղաքներէդ մէկուն մէջ, ո՛ւր որ իրեն ³հաճելի ըլլայ. զայն մի՛ կեղեքեր։

Իսրայէլի աղջիկներէն ⁴բոզ պիտի չըլլայ, ո՛չ ալ Իսրայէլի որդիներէն՝ ⁵իգացեալ։

Որեւէ ուխտի համար Տէրոջ՝ քու Աստուծոյդ տունը մի՛ տանիր պոռնիկի վարձատրութիւնը կամ շունի ⁶հատուցումը, քանի որ Տէրոջ՝ քու Աստուծոյդ առջեւ երկուքն ալ գարշելի են։

Եղբօրդ վաշխով փոխ մի՛ տար.— դրամի վաշխ, պարէնի վաշխ, կամ որեւէ բանի վաշխ՝ որ փոխ կը տրուի վաշխով։

Օտարազգիէ՛ն վաշխ առ, բայց եղբօրմէդ վաշխ մի՛ առներ, որպէսզի Տէրը՝ քու Աստուածդ՝ քու ձեռնարկած բոլոր գործերուդ մէջ քեզ օրհնէ այն երկրին մէջ, ուր կը մտնես՝ անոր տիրանալու համար։

Երբ Տէրոջ՝ քու Աստուծոյդ ուխտ մը ընես, առանց ուշացնելու կատարէ՛, որովհետեւ Տէրը՝ քու Աստուածդ՝ ա՛նպատճառ զայն քեզմէ պիտի պահանջէ, ու ⁷մեղաւոր պիտի ըլլաս՝՝։

Բայց եթէ ուխտելէ հրաժարիս, ⁸մեղաւոր չես ըլլար՝՝։

Զգուշութեա՛մբ գործադրէ շրթունքէդ ելածը, այսինքն յօժարակամ ընծան՝ որ բերանովդ խոստացած ես, ինչպէս որ Տէրոջ՝ քու Աստուծոյդ ուխտած ես։

Երբ ընկերիդ այգին մտնես, խաղո՛ղ կեր՝ ⁹փափաքիդ համաձայն, ու կշտացի՛ր. բայց անօթիդ մէջ մի՛ դներ։

Երբ ընկերիդ հասուն ցորենին մէջ մտնես, ձեռքո՛վդ հասկերը փրցուր. բայց ընկերիդ հասուն ցորենին մանգաղ մի՛ ¹⁰զարներ»։