Deuteronomy 24

Numbers  «  Deuteronomy 23  ‹  Deuteronomy 24  ›  Deuteronomy 25  »  Joshua

ԱՄՈՒՍՆԱԼՈՒԾՈՒՄ ԵՒ ՎԵՐԱՄՈՒՍՆՈՒԹԻՒՆ

«Եթէ մէկը կին մը առնէ եւ անոր հետ ամուսնանայ, յետոյ անոր վրայ անվայելուչ բան մը գտնելով՝ ան իր աչքերուն առջեւ շնորհք չգտնէ, անոր ամուսնալուծումի վկայագիր մը թող գրէ, անոր ձեռքը տայ ու իր տունէն ուղարկէ։

Երբ ան իր տունէն ելլելով երթայ եւ ուրիշ մարդու մը կինը ըլլայ,

եթէ վերջին ամուսինն ալ զայն ատելով՝ անոր ամուսնալուծումի վկայագիր մը գրէ, անոր ձեռքը տայ ու իր տունէն ուղարկէ, կամ եթէ անոր վերջին ամուսինը — որ զայն իրեն կին առեր էր — մեռնի,

անոր առաջին ամուսինը — որ զայն ուղարկեր էր — պիտի չկարենայ զայն դարձեալ իրեն կին առնել՝ անոր պղծուելէն ետք. արդարեւ ատիկա Տէրոջ առջեւ գարշութիւն է, ուստի մեղանչել մի՛ տար այն երկրին՝ որ Տէրը, քու Աստուածդ, քեզի կու տայ իբր ժառանգութիւն»։

ԶԱՆԱԶԱՆ ՕՐԷՆՔՆԵՐ

«Նոր ¹ամուսնացած մարդը զինուորութեան պիտի ²չերթայ, եւ անոր ո՛չ մէկ ³պաշտօն պիտի տրուի՝՝. տարի մը զերծ թող ըլլայ՝ որ իր տան մէջ կենայ ու իր առած կինը ուրախացնէ։

Ո՛չ մէկը ջաղացքը կամ անոր երկանաքարը թող գրաւ առնէ, քանի որ իր ընկերին ⁴կեանքը գրաւ առած կ’ըլլայ։

Եթէ մարդ մը գտնուի, որ իր եղբայրներէն — Իսրայէլի որդիներէն — մէկը գողնալով զայն ծառայ դարձուցեր կամ ծախեր է, այդ գողը պիտի մեռնի. այսպէս՝ չարութիւնը քու մէջէդ պիտի բնաջնջես։

Զգուշացի՛ր բորոտութեան ախտէն, շա՛տ ուշադիր ըլլալով եւ գործադրելով ամէն ինչ որ Ղեւտացի քահանաները ձեզի պիտի սորվեցնեն. զգուշութեա՛մբ գործադրեցէք ինչ որ անոնց պատուիրեր եմ։

Յիշէ՛ ինչ որ Տէրը՝ քու Աստուածդ՝ Մարիամի ըրաւ ճամբան՝ երբ Եգիպտոսէն ելաք։

Երբ դրացիիդ որեւէ բան փոխ տաս, անոր գրաւը առնելու համար իր տունը մի՛ մտներ.

Դո՛ւրսը կայնէ, ու մարդը՝ որուն փոխ կու տաս՝ գրաւը թող դուրս բերէ քեզի։

Եթէ այդ մարդը դժբախտ է, անոր գրաւը պահել ով մի՛ պառկիր.

երբ արեւը մայր մտնէ՝ ա՛նպատճառ անոր գրաւը վերադարձուր, որպէսզի ան իր հանդերձով պառկի եւ քեզ օրհնէ, ու Տէրոջ՝ քու Աստուծոյդ առջեւ ⁵արդար ըլլաս՝՝։

Դժբախտ եւ աղքատ վարձկանը մի՛ հարստահարեր, քու եղբայրներէդ ըլլայ ան, թէ երկրիդ մէջ — քաղաքներուդ մէջ — եղող քու գաղթականներէդ։

Նո՛յն օրը վճարէ անոր վարձքը, արեւը ⁶մայր չմտած՝՝ — արդարեւ ան դժբախտ է, ու իր ⁷մտածումը անոր վրայ է՝՝ —, որպէսզի քեզի դէմ Տէրոջ չգոչէ, ու ⁸մեղաւոր չըլլաս՝՝։

Որդիներուն մեղքին համար հայրերը պիտի չմեռցուին, եւ հայրերուն մեղքին համար որդիները պիտի չմեռցուին. ամէն մարդ իր մեղքին համար պիտի մեռցուի։

Գաղթականին ու որբին իրաւունքը մի՛ ծռեր. այրիին հագուստը գրաւ մի՛ առներ։

Յիշէ՛ թէ դուն Եգիպտոսի մէջ ստրուկ էիր, բայց Տէրը՝ քու Աստուածդ՝ քեզ անկէ ազատեց. այս պատճառով քեզի կը պատուիրեմ որ այս բանը ընես։

Երբ արտիդ մէջ հունձքդ հնձես եւ արտին մէջ որայ մը մոռցած ըլլաս, զայն առնելու համար մի՛ վերադառնար. ան գաղթականին, որբին ու այրիին թող ըլլայ, որպէսզի Տէրը՝ քու Աստուածդ՝ ձեռքերուդ ամբողջ գործին մէջ քեզ օրհնէ։

Ձիթենիդ թօթուելէդ ետք՝ ոստերուն վրայ մնացածները մի՛ ժողվեր. անոնք գաղթականին, որբին եւ այրիին թող ըլլան։

Այգիիդ խաղողները կթելէդ ետք ճռաքաղ մի՛ ըներ. ⁹մնացածը գաղթականին, որբին ու այրիին թող ըլլայ։

Յիշէ՛ թէ Եգիպտոսի երկրին մէջ ստրուկ էիր. այս պատճառով քեզի կը պատուիրեմ որ այս բանը ընես»։