Deuteronomy 27

Numbers  «  Deuteronomy 26  ‹  Deuteronomy 27  ›  Deuteronomy 28  »  Joshua

ՔԱՐԵՐՈՒ ՎՐԱՅ ԳՐՈՒԱԾ ԱՍՏՈՒԾՈՅ ՕՐԷՆՔՆԵՐԸ

Մովսէս՝ Իսրայէլի երէցներուն հետ՝ ժողովուրդին պատուիրեց. «Պահեցէ՛ք այն բոլոր պատուիրանները, որ այսօր ձեզի կը հրամայեմ։

Երբ Յորդանանէն անցնիք Տէրոջ՝ քու Աստուծոյդ քեզի տուած երկիրը, այդ օրը մե՛ծ քարեր կանգնեցուր դուն քեզի, ու զանոնք կիրո՛վ ծեփէ։

Այս Օրէնքին բոլո՛ր խօսքերը անոնց վրայ գրէ, երբ անցնիս՝ մտնելու համար այն երկիրը, որ Տէրը՝ քու Աստուածդ քեզի կու տայ, երկիր մը՝ որ կաթ ու մեղր կը հոսեցնէ, ինչպէս Տէրը՝ հայրերուդ Աստուածը քեզի խոստացաւ։

Ուստի երբ Յորդանանէն անցնիք, ինչպէս այսօր ձեզի կը պատուիրեմ՝ այս քարերը կանգնեցուցէ՛ք Գեբաղ լերան վրայ, ու զանոնք կիրո՛վ ծեփէ։

Նաեւ հոն Տէրոջ՝ քու Աստուծոյդ զոհասեղա՛ն մը կառուցանէ, քարերէ շինուած զոհասեղան մը. անոնց երկաթ մի՛ ¹դպցներ։

Տէրոջ՝ քու Աստուծոյդ զոհասեղանը ²անտա՛շ քարերէ կառուցանէ, եւ անո՛ր վրայ Տէրոջ՝ քու Աստուծոյդ ողջակէզներ մատուցանէ։

Խաղաղութեան զոհեր մատուցանելով՝ հո՛ն կեր ու Տէրոջ՝ քու Աստուծոյդ առջեւ ուրախացիր։

Այս Օրէնքին բոլոր խօսքերը քարերուն վրայ լա՛ւ գրէ, բացայայտօրէն»։

Մովսէս՝ Ղեւտացի քահանաներուն հետ՝ ամբողջ Իսրայէլի ըսաւ. «Ո՛վ Իսրայէլ, լո՛ւռ կեցիր եւ մտի՛կ ըրէ։ Դուն այսօր Տէրոջ՝ քու Աստուծոյդ ժողովուրդը եղար.

ուստի Տէրոջ՝ քու Աստուծոյդ խօսքը մտիկ ընելով՝ գործադրէ՛ անոր պատուիրաններն ու կանոնները, որ այսօր քեզի կը հրամայեմ»։

ԱՆՀՆԱԶԱՆԴՈՒԹԵԱՆ ԱՆԷԾՔՆԵՐԸ

Նոյն օրը Մովսէս ժողովուրդին պատուիրեց.

«Երբ Յորդանանէն անցնիք, ժողովուրդը օրհնելու համար՝ Գարիզին լերան վրայ հետեւեալները թող կայնին.— Շմաւոն, Ղեւի, Յուդա, Իսաքար, Յովսէփ ու Բենիամին։

Իսկ անէծքի համար՝ Գեբաղ լերան վրայ հետեւեալները թող կայնին.— Ռուբէն, Գադ, Ասեր, Զաբուղոն, Դան ու Նեփթաղիմ։

Ղեւտացիները՝ Իսրայէլի բոլոր մարդոց խօսելով՝ բարձր ձայնով թող ըսեն.

“Անիծեա՛լ ըլլայ այն մարդը՝ որ արհեստաւորի ձեռքերու գործ եւ Տէրոջ առջեւ գարշելի եղող քանդակուած կամ ³ձուլածոյ կուռք՝՝ մը կը շինէ ու ծածուկ տեղ մը կը դնէ”. եւ ամբողջ ժողովուրդը պատասխանելով՝ “ամէն” թող ըսէ։

“Անիծեա՛լ ըլլայ ա՛ն՝ որ իր հայրը կամ մայրը կ’անարգէ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ իր ⁴դրացիին սահմանաքարը կը տեղափոխէ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ կոյրը իր ճամբայէն կը մոլորեցնէ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ գաղթականին, որբին ու այրիին իրաւունքը կը ծռէ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ իր ⁵հօր կնոջ՝՝ հետ կը պառկի, քանի որ իր հօր քղանցքը կը բանայ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ որեւէ անասունի հետ կը պառկի”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ իր հօր աղջիկը կամ մօր աղջիկը եղող իր ⁶քրոջ հետ կը պառկի”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ իր զոքանչին հետ կը պառկի”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ իր ընկերը ծածկաբար կը ⁷սպաննէ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ անմեղ անձ մը սպաննելու համար կաշառք կը ստանայ”. եւ ամբողջ ժողովուրդը “ամէն” թող ըսէ։

“Անիծեա՛լ ըլլայ ա՛ն՝ որ այս Օրէնքին բոլոր խօսքերը չի հաստատեր, որպէսզի զանոնք գործադրէ”. եւ ամբողջ ժողովուրդը “ամէն” թող ըսէ»։