Deuteronomy 28

Numbers  «  Deuteronomy 27  ‹  Deuteronomy 28  ›  Deuteronomy 29  »  Joshua

ՀՆԱԶԱՆԴՈՒԹԵԱՆ ՕՐՀՆՈՒԹԻՒՆՆԵՐԸ (Ղեւ. 26. 3-13։ Բ. Օր. 7. 12-24)

«Եթէ Տէրոջ՝ քու Աստուծոյդ խօսքը ուշադրութեամբ մտիկ ընելով՝ զգուշութեամբ գործադրես անոր բոլոր պատուիրանները, որ այսօր քեզի կը հրամայեմ, Տէրը՝ քու Աստուածդ՝ երկրի բոլոր ազգերէն վեր պիտի բարձրացնէ քեզ,

եւ սա՛ բոլոր օրհնութիւնները վրադ պիտի գան ու քեզի պիտի հասնին, եթէ Տէրոջ՝ քու Աստուծոյդ խօսքը մտիկ ընես.—

քաղաքի մէջ՝ օրհնեալ, եւ դաշտի մէջ օրհնեալ պիտի ըլլաս.

քու որովայնիդ պտուղը, հողիդ պտուղը, անասուններուդ պտուղը, կովերուդ ծնունդն ու ոչխարներուդ բազմացումը օրհնեալ պիտի ըլլան.

քու կողովդ ու տաշտդ օրհնեալ պիտի ըլլան։

Մտած ատենդ՝ օրհնեալ, ու ելած ատենդ օրհնեալ պիտի ըլլաս։

Տէրը քու առջեւդ պարտութեան պիտի մատնէ քեզի դէմ կանգնող թշնամիներդ. անոնք քեզի դէմ մէկ ճամբայով դուրս պիտի ելլեն, եւ առջեւէդ եօթը ճամբայով պիտի փախչին։

Տէրը քու ամբարներուդ ու բոլոր ձեռնարկներուդ մէջ օրհնութիւն պիտի ղրկէ քեզի, եւ Տէրոջ՝ քու Աստուծոյդ քեզի տուած երկրին մէջ պիտի օրհնէ քեզ։

Եթէ Տէրոջ՝ քու Աստուծոյդ հրամանները պահելով՝ անոր ճամբաներուն մէջ ընթանաս, Տէրը պիտի հաստատէ քեզ՝ իրեն սուրբ ժողովուրդ ըլլալու, ինչպէս քեզի երդում ըրաւ։

Երկրի բոլոր ժողովուրդները պիտի տեսնեն թէ Տէրոջ ¹անունով կը կոչուիս՝՝, ու քեզմէ պիտի վախնան։

Տէրը քու բարօրութեանդ համար յորդառատ պիտի ընէ որովայնիդ պտուղը, անասուններուդ պտուղը եւ հողիդ պտուղը՝ այն ²երկրին վրայ, որուն համար Տէրը հայրերուդ երդում ըրաւ՝ քեզի տալու։

Տէրը քեզի պիտի բանայ իր բարի գանձարանը, այսինքն՝ երկինքը, որպէսզի երկրիդ անձրեւը ժամանակին տայ, ու ձեռքիդ բոլոր գործերը օրհնէ. դուն շատ ազգերու փոխ պիտի տաս, բայց փոխ պիտի չառնես։

Տէրը ժողովուրդներու գլո՛ւխ պիտի ընէ քեզ, եւ ո՛չ թէ պոչ։ Մի՛շտ վրան պիտի ըլլաս. բնա՛ւ տակը պիտի չըլլաս, եթէ Տէրոջ՝ քու Աստուծոյդ պատուիրաններուն հնազանդիս, որ այսօր քեզի կը հրամայեմ, զանոնք պահելով ու գործադրելով։

Ուրիշ աստուածներու հետեւելու համար ու զանոնք պաշտելու համար՝ աջ կողմ կամ ձախ կողմ մի՛ շեղիր այն բոլոր խօսքերէն, որ այսօր քեզի կը պատուիրեմ»։

ԱՆՀՆԱԶԱՆԴՈՒԹԵԱՆ ՀԵՏԵՒԱՆՔՆԵՐԸ (Ղեւ. 26. 14-46)

«Բայց եթէ Տէրոջ՝ քու Աստուծոյդ խօսքը մտիկ չընելով՝ զգուշութեամբ չգործադրես անոր բոլոր պատուիրաններն ու կանոնները, որ այսօր քեզի կը հրամայեմ, սա՛ բոլոր անէծքները վրադ պիտի գան ու քեզի պիտի հասնին.—

քաղաքի մէջ՝ անիծեալ, եւ դաշտի մէջ անիծեալ պիտի ըլլաս.

քու կողովդ ու տաշտդ անիծեալ պիտի ըլլան.

քու որովայնիդ պտուղը, հողիդ պտուղը, կովերուդ ծնունդն ու ոչխարներուդ բազմացումը անիծեալ պիտի ըլլան։

Մտած ատենդ՝ անիծեալ, ու ելած ատենդ անիծեալ պիտի ըլլաս։

Տէրը քու բոլոր ձեռնարկներուդ եւ գործերուդ մէջ անէծք, խռովութիւն ու սաստ պիտի ղրկէ քեզի՝ քու չար արարքներուդ ու զիս լքելուդ համար, մինչեւ որ շուտով բնաջնջուիս ու կորսուիս։

Տէրը քեզի ժանտախտը պիտի փակցնէ, մինչեւ որ քեզ սպառէ այն ³երկրին վրայէն, ուր կը մտնես անոր տիրանալու համար։

Տէրը քեզ պիտի զարնէ ծիւրախտով, տենդախտով, ջերմով եւ այրող տաքութեամբ, ⁴երաշտով, խորշակահարութեամբ ու արմտիքի դալուկով. եւ ասոնք քեզ պիտի հետապնդեն՝ մինչեւ որ կորսուիս։

Գլուխիդ վրայի երկինքդ պղինձէ պիտի ըլլայ, ու տակդ եղող երկիրը՝ երկաթէ։

Անձրեւի տեղ՝ Տէրը փոշի եւ հող պիտի տայ քու երկրիդ. անոնք երկինքէն վրադ պիտի իջնեն՝ մինչեւ որ բնաջնջուիս։

Տէրը թշնամիներուդ առջեւ պարտութեան պիտի մատնէ քեզ. անոնց դէմ մէկ ճամբայով դուրս պիտի ելլես, եւ անոնց առջեւէն եօթը ճամբայով պիտի փախչիս, ու երկրի բոլոր թագաւորութիւններուն մէջ սոսկումի պիտի մատնուիս։

Քու դիակդ երկինքի բոլոր թռչուններուն ու երկրի գազաններուն ուտելիք պիտի ըլլայ, եւ զանոնք ⁵վռնտող մը պիտի չըլլայ։

Տէրը Եգիպտոսի պալարներով, թութքով, քոսոտութեամբ ու եռքով պիտի զարնէ քեզ, որոնցմէ պիտի չկարենաս բուժուիլ։

Տէրը խելագարութեամբ, կուրութեամբ ու սիրտի սոսկումով պիտի զարնէ քեզ։

Ինչպէս կոյրը մթութեան մէջ ձեռքով կը խարխափէ, դուն ալ կէսօրին պիտի խարխափես, ու ճամբաներուդ մէջ պիտի չյաջողիս։ ⁶Ամէն ատեն՝՝ պիտի հարստահարուիս եւ յափշտակութեան ենթարկուիս, բայց քեզ ազատող պիտի չըլլայ։

Դուն կնոջ մը պիտի նշանուիս, բայց անոր հետ ուրի՛շ մարդ մը պիտի ⁷պառկի. տուն պիտի կառուցանես, բայց անոր մէջ պիտի չբնակիս. այգի պիտի տնկես, բայց անոր խաղողը պիտի չուտես.

Քու եզդ աչքի՛դ առջեւ պիտի մորթուի, բայց դուն անկէ պիտի չուտես. քու էշդ առջե՛ւդ պիտի յափշտակուի, բայց քեզի պիտի չվերադարձուի. քու ոչխարներդ թշնամիներո՛ւդ պիտի մատնուին, բայց զանոնք ազատող պիտի չըլլայ։

Քու որդիներդ եւ աղջիկներդ ուրի՛շ ժողովուրդի պիտի մատնուին, աչքերդ պիտի տեսնեն ու ամբողջ օրը անոնց համար ունեցած կարօտէդ պիտի նուաղիս, բայց ձեռքիդ մէջ ոյժ պիտի չըլլայ։

Քու հողիդ պտուղը եւ ամբողջ վաստակդ քեզի անծանօթ ժողովուրդ մը պիտի ուտէ. միայն պիտի հարստահարուիս ու ճնշուիս՝ ամէն օր։

Աչքերուդ տեսած բաներէն պիտի խելագարիս.

Տէրը քու ծունկերդ եւ սրունքներդ, ու ոտքիդ ներբանէն մինչեւ գլուխիդ գագաթը՝ ⁸չարչարալից պալարներով պիտի զարնէ, ու պիտի չկարենաս բուժուիլ։

Տէրը քեզ եւ վրադ նշանակած թագաւորդ պիտի տանի այնպիսի ազգի մը, որ ո՛չ դուն ճանչցած ես, ո՛չ ալ քու հայրերդ։ Հոն ուրիշ աստուածներ — փայտէ ու քարէ — պիտի պաշտես,

եւ ապշութեան, առակի ու կատակի առարկայ պիտի ըլլաս այն բոլոր ժողովուրդներուն մէջ՝ ուր Տէրը քեզ պիտի տանի։

Արտին մէջ շատ սերմ պիտի ⁹ցանես, բայց քիչ բերք պիտի ժողվես. քանի որ մարախնե՛րը պիտի սպառեն զայն։

Այգիներ պիտի տնկես ու մշակես, բայց գինին պիտի չխմես եւ խաղողը պիտի չժողվես. որովհետեւ ճճինե՛րը պիտի ուտեն զանոնք։

Քու ամբողջ հողամասիդ մէջ ձիթենիներ պիտի ունենաս, բայց իւղով պիտի չօծուիս. քանի որ ձիթապտուղներդ պիտի թափին։

Որդիներ ու աղջիկներ պիտի ծնանիս, բայց քուկդ պիտի չըլլան. որովհետեւ անոնք գերութեան պիտի երթան։

Խառնի՛ճը պիտի տիրանայ բոլոր ծառերուդ եւ հողիդ պտուղին։

Քու մէջդ եղող գաղթականը քեզմէ շատ վեր պիտի բարձրանայ, իսկ դուն շատ վար պիտի իջնես։

Ա՛ն քեզի փոխ պիտի տայ, բայց դուն անոր փոխ պիտի չտաս. ա՛ն գլուխ պիտի ըլլայ, իսկ դուն պոչ պիտի ըլլաս։

Այս բոլոր անէծքները վրադ պիտի գան, քեզ պիտի հետապնդեն ու քեզի պիտի հասնին, մինչեւ որ բնաջնջուիս. որովհետեւ Տէրոջ՝ քու Աստուծոյդ խօսքը մտիկ չըրիր, եւ քեզի հրամայած պատուիրաններն ու կանոնները չպահեցիր։

Անոնք քու վրադ եւ զարմիդ վրայ նշան ու հրաշք պիտի ըլլան՝ յաւիտեան։

Քանի ուրախութեամբ եւ ¹⁰յօժար սիրտով Տէրոջ՝ քու Աստուծոյդ ¹¹չծառայեցիր՝ ամէն բանի առատութեան մէջ,

անօթութեան, ծարաւի, մերկութեան ու ամէն բանի կարօտութեան մէջ պիտի ծառայես քու թշնամիներուդ՝ որ Տէրը քեզի դէմ պիտի ղրկէ։ Քու վիզիդ վրայ երկաթէ լուծ պիտի դնէ, մինչեւ որ քեզ բնաջնջէ։

Տէրը հեռուէն՝ երկրի ծայրէն՝ քեզի դէմ ազգ մը պիտի բերէ, որ արծիւի պէս կը սաւառնի. ազգ մը՝ որուն լեզուն չես հասկնար.

պնդերես ազգ մը, որ ծերերը պիտի չյարգէ եւ երիտասարդներուն պիտի չողորմի։

Ան անասուններուդ պտուղն ու հողիդ պտուղը պիտի ուտէ, մինչեւ որ բնաջնջուիս. քեզի ոչինչ պիտի մնայ ցորենէն, քաղցուէն, իւղէն, կովերուդ ծնունդէն ու ոչխարներուդ բազմացումէն, մինչեւ որ քեզ կորսնցնէ։

Ան բոլոր քաղաքներուդ մէջ քեզ պիտի պաշարէ, մինչեւ որ՝ ամբողջ երկրիդ մէջ՝ փլին բարձր եւ ամուր պարիսպներդ, որոնց վստահած ես։ Քեզ պիտի պաշարէ բոլոր քաղաքներուդ մէջ, ամբողջ երկրիդ մէջ՝ որ Տէրը, քու Աստուածդ, քեզի տուաւ։

Պաշարումի մէջ, տուայտանքի ընթացքին՝ որուն մէջ թշնամիդ քեզ պիտի ձգէ, որովայնի՛դ պտուղը, Տէրոջ՝ քու Աստուծոյդ քեզի տուած որդիներուդ եւ աղջիկներուդ մի՛սը պիտի ուտես։

Քու մէջդ եղող փափուկ ու յոյժ քնքուշ մարդը՝ ¹²ծուռ աչքով պիտի նայի՝՝ իր եղբօր, ծոցի կնոջ եւ ¹³ողջ թողուցած որդիներուն,

որպէսզի անոնցմէ ո՛չ մէկուն տայ իր ուտելիք որդիներուն միսէն. արդարեւ պաշարումի մէջ, տուայտանքի ընթացքին՝ որուն մէջ թշնամիդ քեզ պիտի ձգէ բոլոր քաղաքներուդ մէջ, ուրիշ ոչինչ պիտի մնայ իրեն։

Քու մէջդ եղող փափուկ եւ քնքուշ կինը, որ իր քնքշութենէն ու փափկութենէն՝ չէր փորձեր ոտքին ներբանը գետինին վրայ դնել, ծուռ աչքով պիտի նայի իր ծոցի ամուսինին, իր որդիին եւ աղջիկին,

սաղմընկերին համար՝ որ իր ոտքերուն մէջտեղէն դուրս պիտի ելլէ, ու որդիներուն համար՝ որ ինք պիտի ծնանի. արդարեւ պաշարումի մէջ, տուայտանքի ընթացքին՝ որուն մէջ թշնամիդ քեզ պիտի ձգէ քաղաքներուդ մէջ, ամէն բանի կարօտ ըլլալով՝ զանոնք ծածկաբար պիտի ուտէ։

Եթէ այս գիրքին մէջ գրուած այս Օրէնքին բոլոր խօսքերը զգուշութեամբ չգործադրես, քու Աստուծոյդ՝ Եհովայի այս փառաւոր եւ ահաւոր անունէն վախնալով,

Տէրն ալ ¹⁴արտասովոր պատուհասներով, մեծ ու երկարատեւ պատուհասներով, չարչարալից ու երկարատեւ հիւանդութիւններով պիտի զարնէ քեզ եւ քու զարմդ։

Եգիպտոսի բոլոր ախտերը, որոնցմէ դուն կը վախնաս, քու վրադ պիտի վերադարձնէ, ու անոնք քեզի պիտի փակչին։

Նաեւ այս Օրէնքի գիրքին մէջ չգրուած ամէն հիւանդութիւն եւ ամէն պատուհաս՝ Տէրը քու վրադ պիտի բերէ, մինչեւ որ բնաջնջուիս։

Դուք՝ որ երկինքի աստղերուն չափ շատ էիք՝ սակաւաթիւ ¹⁵մարդիկ պիտի մնաք, քանի որ Տէրոջ՝ քու Աստուծոյդ խօսքը մտիկ չըրիր։

Ինչպէս Տէրը ձեզի բարիք ընելով ու ձեզ բազմացնելով բերկրեցաւ ձեզի համար, նոյնպէս ձեզ կորսնցնելով եւ բնաջնջելով պիտի ուրախանայ ձեզի համար, ու պիտի խլուիք այն ¹⁶երկրին վրայէն, ուր հիմա կ’երթաս՝ անոր տիրանալու համար։

Տէրը բոլոր ժողովուրդներուն մէջ պիտի ցրուէ քեզ, երկրի մէկ ծայրէն մինչեւ միւս ծայրը, եւ հոն ուրիշ աստուածներ — փայտէ ու քարէ — պիտի պաշտես, որ ո՛չ դուն ճանչցեր էիր, ո՛չ ալ քու հայրերդ։

Այս ազգերուն մէջ անդորրութիւն պիտի չունենաս, ու ոտքիդ ներբանին հանգստավայր պիտի չըլլայ. հոն Տէրը քեզի դողացող սիրտ, աչքի նուաղում եւ անձի կսկիծ պիտի տայ։

Քու կեանքդ առկախ պիտի ըլլայ առջեւդ. գիշեր-ցերեկ պիտի վախնաս, ու կեանքդ ապահով պիտի չըլլայ։

Սիրտիդ ¹⁷երկիւղէն եւ աչքերուդ տեսած բաներէն՝ առտուն պիտի ըսես. “Երանի՜ թէ իրիկուն ըլլար”, իսկ իրիկունն ալ պիտի ըսես. “Երանի՜ թէ առտու ըլլար”։

Տէրը նաւերով Եգիպտոս պիտի վերադարձնէ քեզ, այն ճամբայով՝ որուն համար քեզի ըսի թէ զայն ա՛լ վերստին պիտի չտեսնես. հոն դուք ձեզ պիտի ծախէք ձեր թշնամիներուն՝ ստրուկներ եւ ստրկուհիներ ըլլալու համար, բայց գնող պիտի չըլլայ»։