Genesis 9

Genesis 8  ‹  Genesis 9  ›  Genesis 10  »  Exodus

ԱՍՏՈՒԾՈՅ ՈՒԽՏԸ ՆՈՅԻ ՀԵՏ

Աստուած Նոյը եւ անոր որդիները օրհնեց, ու անոնց ըսաւ. «Աճեցէ՛ք, բազմացէ՛ք, եւ լեցուցէ՛ք երկիրը։

Ձեր արհաւիրքն ու զարհուրանքը՝ երկրի բոլոր գազաններուն վրայ, երկինքի բոլոր թռչուններուն վրայ, գետինի բոլոր շարժողներուն վրայ եւ ծովու բոլոր ձուկերուն վրայ պիտի ըլլան. անոնք ձեր ձեռքը յանձնուած են։

Ամէն շարժող կենդանի՝ ձեզի կերակուր ըլլայ. կանաչ բոյսի պէս՝ բոլորը ձեզի տուի։

Բայց միսը իր ¹կեանքով՝ այսինքն իր արիւնով՝ մի՛ ուտէք։

Եւ անտարակոյս ձեր ²կեանքին՝ այսինքն արիւնին համար հաշիւ պիտի պահանջեմ. ամէն գազանի ձեռքէն պիտի պահանջեմ զայն, ու մարդուն ձեռքէն։ Մարդուն կեանքը իւրաքանչիւրին եղբօր ձեռքէն պիտի պահանջեմ։

Ո՛վ որ մարդու արիւն թափէ, իր արիւնն ալ մարդէ պիտի թափուի, քանի որ Աստուած իր պատկերով ³ստեղծեց մարդը։

Դուք աճեցէ՛ք, բազմացէ՛ք, երկրի վրայ ⁴շատցէ՛ք, եւ անոր մէջ բազմացէ՛ք»։

Եւ Աստուած Նոյի եւ իրեն հետ եղող իր որդիներուն խօսեցաւ՝ ըսելով.

«Ահա՛ ձեզի հետ, ու ձեզմէ ետք՝ ձեր զարմին հետ իմ ուխտս պիտի հաստատեմ,

նաեւ ձեզի հետ եղող ամէն շնչաւոր կենդանիի հետ, թէ՛ թռչունի, թէ՛ ընտանի անասունի, թէ՛ ալ ձեզի հետ եղող երկրի ամէն գազանի հետ, տապանէն դուրս ելածներէն բոլորին հետ, ու երկրի բոլոր գազաններուն հետ։

Ձեզի հետ իմ ուխտս պիտի հաստատեմ, որ անգա՛մ մըն ալ ամէն մարմին ջրհեղեղի ջուրերէն չբնաջնջուի, եւ ա՛լ ջրհեղեղ չըլլայ՝ երկիրը կործանելու համար»։

Եւ Աստուած ըսաւ. «Իմ ու ձեր միջեւ, եւ ձեզի հետ եղող ամէն շնչաւոր կենդանիի միջեւ՝ յաւիտենական սերունդներու համար դրած ուխտիս իբր նշան՝

իմ աղեղս ամպին մէջ պիտի դնեմ. ա՛ն պիտի ըլլայ իմ ու երկրի միջեւ եղող ուխտին նշանը։

Երբ երկրի վրայ ամպ բերեմ՝ աղեղը ամպին մէջ պիտի երեւնայ,

եւ իմ ու ձեր միջեւ, եւ ամէն մարմինէ իւրաքանչիւր շնչաւոր կենդանիի միջեւ եղող իմ ուխտս պիտի յիշեմ, ու անգա՛մ մըն ալ ջուրերը ջրհեղեղի պիտի չվերածուին՝ ամէն մարմին բնաջնջելու համար։

Աղեղը ամպին մէջ պիտի ըլլայ եւ անոր պիտի նայիմ, որպէսզի յիշեմ յաւիտենական ուխտը՝ Աստուծոյ ու ամէն մարմինէ իւրաքանչիւր շնչաւոր կենդանիի միջեւ, որ երկրի վրայ է»։

Աստուած Նոյի ըսաւ. «Ա՛յս է այն ուխտին նշանը, որ հաստատեցի իմ ու երկրի վրայ եղող ամէն մարմինի միջեւ»։

ՆՈՅ ԵՒ ԻՐ ՈՐԴԻՆԵՐԸ

Նոյի որդիները՝ որ տապանէն դուրս ելան, Սէմը, Քամը եւ Յափէթն էին. Քամ Քանանի հայրն էր։

Այս երեքը Նոյի որդիներն էին, ու ասոնցմէ տարածուեցան ամբողջ երկիրը։

Նոյ սկսաւ ⁵հողագործ ըլլալ. այգի տնկեց,

գինիէն խմեց, գինովցաւ եւ իր վրանին մէջ մերկացաւ։

Քանանի հայրը՝ Քամ՝ իր հօր մերկութիւնը տեսաւ, ու դուրս ելլելով՝ իր երկու եղբայրներուն պատմեց։

Սէմ եւ Յափէթ հանդերձ առին, իրենց երկուքին ուսերուն վրայ դրին, ու դէպի ետեւ երթալով՝ իրենց հօր մերկութիւնը ծածկեցին։ Իրենց երեսը ետեւ դարձած ըլլալով՝ իրենց հօր մերկութիւնը չտեսան։

Նոյ՝ իր գինովութենէն արթննալով՝ իր պզտիկ որդիին իրեն ըրածը գիտցաւ,

եւ ըսաւ. «Անիծեա՛լ ըլլայ Քանան. իր եղբայրներուն ստրուկներուն ստրուկը պիտի ըլլայ»։

Նաեւ ըսաւ. «Օրհնեա՜լ ըլլայ Տէրը, Սէմի Աստուածը, ու Քանան անոր ստրուկը ըլլայ։

Աստուած թող ընդարձակէ Յափէթը ու Սէմի վրանները բնակի, եւ Քանան ⁶անոր ստրուկը ըլլայ»։

Նոյ ջրհեղեղէն ետք երեք հարիւր յիսուն տարի ապրեցաւ։

Նոյի բոլոր օրերը ինը հարիւր յիսուն տարի եղան, ու մեռաւ։