Genesis 13
Genesis 12 ‹ Genesis 13 › Genesis 14 » Exodus
ԱԲՐԱՄ ԵՒ ՂՈՎՏ ԿԸ ԲԱԺՆՈՒԻՆ
1Աբրամ իր կնոջ հետ ու իր ամբողջ ունեցածով Եգիպտոսէն բարձրացաւ դէպի Քանանի հարաւային կողմը, Ղովտ ալ իրեն հետ։
2Աբրամ շատ հարուստ էր խաշինքով, արծաթով եւ ոսկիով։
3Իր իջեւաններով՝ հարաւային կողմէն գնաց մինչեւ Բեթէլ, այն տեղը՝ ուր առաջին անգամ իր վրանը լարած էր, Բեթէլի ու Գայիի մէջտեղ,
4այն զոհասեղանին տեղը՝ որ հոն նախապէս շիներ էր. եւ Աբրամ հոն Տէրոջ անունը կանչեց։
5Աբրամի հետ գացող Ղովտն ալ ոչխարներ, արջառներ ու վրաններ ունէր.
6եւ այդ երկիրը 1բաւական չէր անոնց՝՝ որ միասին բնակին, քանի որ անոնց ինչքը շատ ըլլալով՝ չէին կրնար միասին բնակիլ։
7Աբրամի խաշինքին հովիւներուն ու Ղովտի խաշինքին հովիւներուն միջեւ կռիւ կ’ըլլար, եւ այն ատեն Քանանացիներ ու Փերեզացիներ ալ կը բնակէին այդ երկրին մէջ։
8Աբրամ ըսաւ Ղովտի. «Կ’աղերսե՛մ, իմ ու քու միջեւ, եւ իմ հովիւներուս ու քու հովիւներուդ միջեւ վիճաբանութիւն թող չըլլայ, որովհետեւ մենք եղբայր ենք։
9Ամբողջ երկիրը քու առջեւդ չէ՞. կ’աղերսե՛մ, զատուէ՛ ինձմէ. եթէ դուն ձախ կողմը երթաս՝ ես աջ կողմը կ’երթամ, եւ եթէ աջ կողմը երթաս՝ ես ձախ կողմը կ’երթամ»։
10Ղովտ իր աչքերը վերցուց ու Յորդանանի ամբողջ դաշտին նայեցաւ. ամէն տեղ ջրարբի էր. Տէրը Սոդոմն ու Գոմորը կործանելէն առաջ՝ մինչեւ Սեգովր Տէրոջ 2դրախտին պէս էր, Եգիպտոսի երկրին նման։
11Ղովտ իրեն համար ընտրեց Յորդանանի ամբողջ դաշտը. Ղովտ դէպի արեւելք մեկնեցաւ, եւ իրարմէ զատուեցան։
12Աբրամ Քանանի երկրին մէջ բնակեցաւ. Ղովտ ալ դաշտի քաղաքներուն մէջ բնակեցաւ, ու իր վրանը Սոդոմի քով լարեց։
13Իսկ Սոդոմի մարդիկը չափազանց չար եւ մեղաւոր էին Տէրոջ առջեւ։
ԱԲՐԱՄ ԿԸ ՃԱՄԲՈՐԴԷ ԴԷՊԻ ՔԵԲՐՈՆ
14Տէրը Աբրամի ըսաւ՝ Ղովտի իրմէ զատուելէն ետք. «Այժմ աչքե՛րդ վերցուր, ու քու եղած տեղէդ դիտէ՛ դէպի հիւսիս եւ հարաւ, ու դէպի արեւելք եւ արեւմուտք.
15որովհետեւ այդ ամբողջ երկիրը՝ որ կը տեսնես, քեզի՛ ու քու զարմի՛դ պիտի տամ յաւիտեան։
16Եւ քու զարմդ երկրի 3հողին պէս անթիւ պիտի ընեմ, այնպէս որ եթէ մէկը կարենայ երկրի հողը համրել, քու զարմդ ալ համրէ։
17Կանգնէ՛, այդ երկիրը պտըտէ՛ անոր երկայնքին ու լայնքին համեմատ, քանի որ զայն քեզի պիտի տամ»։
18Աբրամ վերցուց իր վրանը, ու գնաց եւ բնակեցաւ Մամբրէի կաղնիներուն քով, որոնք Քեբրոնի մէջ են. ու հոն զոհասեղան կառուցանեց Տէրոջ։