Genesis 14

Genesis 13  ‹  Genesis 14  ›  Genesis 15  »  Exodus

ԱԲՐԱՄ ԿԸ ՓՐԿԷ ՂՈՎՏԸ

Սենաարի Ամարփաղ թագաւորին, Ելլասարի Արիովք թագաւորին, Եղամի Քոդողագոմոր թագաւորին եւ Գոյիմի Թադգաղ թագաւորին ժամանակները,

ասոնք պատերազմեցան Սոդոմի Բարա թագաւորին, Գոմորի Բարսա թագաւորին, Ադմայի Սենաբ թագաւորին, Սեբոյիմի Սիմոբոր թագաւորին ու Բաղայի (այսինքն Սեգովրի) թագաւորին դէմ։

Ասոնք բոլորը դաշնակցեցան Սիդդիմի հովիտին մէջ, որ Աղի ծովն է։

Տասներկու տարի Քոդողագոմորի հպատակեցան, եւ տասներեքերորդ տարին ըմբոստացան։

Տասնչորրորդ տարին՝ Քոդողագոմոր ու իրեն հետ եղող թագաւորները եկան եւ զարկին Աստարովթ-Կառնայիմի մէջ եղող Ռափայինները, Համի մէջ եղող Զուզեցիները, Շաւէ- Կարիաթեմի մէջ Էմիմները,

եւ Քոռեցիները իրենց Սէիրի լերան վրայ՝ մինչեւ անապատին քով եղող ¹Էլփառանը։

Ապա վերադարձան ու հասան ²Ենմասեփաթ, այսինքն՝ Կադէս, եւ զարկին Ամաղեկացիներուն ամբողջ դաշտավայրը, ու Ասասանթամար բնակող Ամորհացիներն ալ։

Եւ Սոդոմի թագաւորը, Գոմորի թագաւորը, Ադմայի թագաւորը, Սեբոյիմի թագաւորն ու Բաղայի (այսինքն Սեգովրի) թագաւորը դուրս ելլելով՝ Սիդդիմի հովիտին մէջ շարուեցան, անոնց դէմ պատերազմելու համար.

այսինքն՝ Եղամի Քոդողագոմոր թագաւորին, Գոյիմի Թադգաղ թագաւորին, Սենաարի Ամարփաղ թագաւորին եւ Ելլասարի Արիովք թագաւորին հետ, այս չորս թագաւորները այն հինգին դէմ։

Սիդդիմի հովիտը կուպրի հորերով լեցուն էր. Սոդոմի ու Գոմորի թագաւորները փախան եւ հոն ինկան, ու մնացածները լեռը փախան։

Իսկ անոնք Սոդոմի ու Գոմորի ամբողջ ինչքը, եւ անոնց բոլոր պարէնները առին ու գացին։

Սոդոմ բնակող Աբրամի եղբօրորդին Ղովտը, եւ անոր ինչքն ալ առին ու գացին։

Ազատած մը եկաւ եւ այս բաները եբրայեցի Աբրամի պատմեց։ Ան Եսքողի ու Աների եղբօր՝ Ամորհացի Մամբրէի կաղնիներուն քով կը բնակէր, որովհետեւ ասոնք Աբրամի դաշնակից էին։

Երբ Աբրամ իր եղբօր գերեվարուիլը լսեց, իր տան մէջ ծնած երեք հարիւր տասնութ ³մարզուած ծառաները հանեց ու զանոնք հետապնդեց մինչեւ Դան։

Ինք եւ իր ծառաները՝ գիշերուան մէջ ⁴գունդ-գունդ՝՝ յարձակեցան անոնց վրայ, զարկին զանոնք, ու հալածեցին զանոնք մինչեւ Քոբա, որ Դամասկոսի ⁵հիւսիսային կողմն է։

Ամբողջ ինչքը վերադարձուց. իր եղբայրը՝ Ղովտը եւ անոր ինչքը, նաեւ կիներն ու ժողովուրդն ալ վերադարձուց։

ՄԵԼՔԻՍԵԴԵԿ Կ’ՕՐՀՆԷ ԱԲՐԱՄԸ

Սոդոմի թագաւորը դուրս ելաւ դէպի Շաւէի հովիտը (այսինքն՝ Թագաւորի հովիտը) զինք դիմաւորելու, երբ ինք Քոդողագոմորն ու անոր հետ եղող թագաւորները զարնելէն ետք կը վերադառնար։

Եւ Սաղէմի թագաւորը՝ Մելքիսեդեկ՝ հաց ու գինի ⁶բերաւ — ան Ամենաբարձր Աստուծոյ քահանան էր —

եւ օրհնեց զայն ու ըսաւ. «Օրհնեա՜լ ըլլայ Աբրամ՝ երկինքի ու երկրի սեփականատէրը եղող Ամենաբարձր Աստուծմէն։

Օրհնեա՜լ ըլլայ Ամենաբարձր Աստուածը, որ հակառակորդներդ քու ձեռքդ մատնեց»։ Եւ ինք բոլորէն տասանորդ տուաւ անոր։

Սոդոմի թագաւորը ըսաւ Աբրամի. «Անձերը ինծի՛ տուր, բայց ինչքը դուն քեզի՛ առ»։

Աբրամ ըսաւ Սոդոմի թագաւորին. «⁷Տէրոջ՝ երկինքի ու երկրի սեփականատէրը եղող Ամենաբարձր Աստուծոյ վերցուցի ձեռքս,

որ դերձանէն մինչեւ կօշիկի կապը՝ ո՛չ մէկ բան առնեմ քու ունեցածներէդ, որ չըսես. “Աբրամը ե՛ս հարստացուցի”,

բացի երիտասարդներուն կերածէն եւ ինծի հետ գացող մարդոց՝ այսինքն Աների, Եսքողի ու Մամբրէի բաժիններէն. անոնք իրենց բաժինը թող առնեն»։