Genesis 29

Genesis 28  ‹  Genesis 29  ›  Genesis 30  »  Exodus

ՅԱԿՈԲ ԿԸ ՀԱՍՆԻ ԼԱԲԱՆԻ ՏՈՒՆԸ

Յակոբ ¹մեկնեցաւ եւ ²արեւելքցիներուն երկիրը գնաց։

Նայեցաւ, ու ահա՛ դաշտին մէջ հոր մը կար, եւ ահա՛ հոն՝ անոր քով ոչխարներու երեք հօտ պառկած էր, քանի որ այդ հորէն կը խմցնէին հօտերուն, ու հորին բացուածքը մեծ քար մը կար։

Բոլոր հօտերը հոն կը հաւաքուէին. հովիւները հորին բացուածքէն քարը մէկդի կը գլորէին, ոչխարներուն կը խմցնէին, ապա քարը դարձեալ իր տեղը՝ հորին բացուածքը կը դնէին։

Յակոբ անոնց ըսաւ. «Եղբայրնե՛րս, ուրկէ՞ էք դուք»։ Անոնք ըսին. «Մենք Խառանէն ենք»։

Անոնց ըսաւ. «Նաքովրի որդին՝ Լաբանը կը ճանչնա՞ք»։ Անոնք ըսին. «Կը ճանչնանք»։

Անոնց ըսաւ. «Ողջ առո՞ղջ է»։ Անոնք ըսին. «Ողջ է, եւ ահա՛ անոր աղջիկը՝ Ռաքէլ ոչխարներուն հետ կու գայ»։

Ան ալ ըսաւ. «Ահա՛ տակաւին ³իրիկուն ըլլալու շատ ժամանակ կայ՝՝, ու խաշինքին հաւաքուելու ատենը չէ. խմցուցէ՛ք ոչխարներուն, եւ գացէ՛ք արածեցէ՛ք»։

Անոնք ըսին. «Մենք չենք կրնար, մինչեւ որ բոլոր հօտերը չհաւաքուին. երբ հորին բացուածքի քարը մէկդի գլորեն, այն ատեն ոչխարներուն կը խմցնենք»։

Երբ տակաւին անոնց հետ կը խօսէր, Ռաքէլ իր հօր ոչխարներուն հետ եկաւ, որովհետեւ ինք էր անոնց հովիւը։

Երբ Յակոբ տեսաւ իր մօրեղբօր՝ Լաբանի աղջիկը՝ Ռաքէլը, նաեւ իր մօրեղբօր՝ Լաբանի ոչխարները, Յակոբ մօտեցաւ, քարը հորին բացուածքէն գլորեց, ու իր մօրեղբօր՝ Լաբանի ոչխարներուն խմցուց։

Եւ Յակոբ համբուրեց Ռաքէլը, ու ձայնը բարձրացնելով լացաւ։

Յակոբ Ռաքէլի իմացուց թէ ինք անոր հօր ⁴ազգականը եւ Ռեբեկայի որդին է. ան ալ վազեց ու իր հօր պատմեց։

Երբ Լաբան լսեց իր քրոջ որդիին՝ Յակոբի մասին, վազեց զայն դիմաւորելու. զայն գրկեց ու համբուրեց, եւ իր տունը տարաւ. ան ալ Լաբանի պատմեց այս բոլոր բաները։

Լաբան անոր ըսաւ. «Ի՛րապէս դուն իմ ոսկորս ու միսս ես». եւ անոր հետ լման ամիս մը կեցաւ։

ՅԱԿՈԲ ԿԸ ԾԱՌԱՅԷ ԼԱԲԱՆԻ՝ ՌԱՔԷԼԻ ԵՒ ԼԻԱՅԻ ՀԱՄԱՐ

Լաբան Յակոբի ըսաւ. «Դուն իմ եղբայրս ըլլալուդ համար՝ ինծի ձրի՞ պիտի ծառայես։ Իմացո՛ւր ինծի, ի՞նչ պիտի ըլլայ քու վարձքդ»։

Լաբան երկու աղջիկ ունէր, մեծին անունը՝ Լիա էր, ու պզտիկին անունը՝ Ռաքէլ։

Լիայի աչքերը փափուկ էին, բայց Ռաքէլ՝ գեղեցիկ կազմ ու գեղեցիկ տեսք ունէր։

Յակոբ Ռաքէլը սիրեց եւ ըսաւ. «Քու պզտիկ աղջիկիդ՝ Ռաքէլի համար եօթը տարի քեզի կը ծառայեմ»։

Լաբան ըսաւ. «Զայն քեզի՛ տալը՝ ուրիշ մարդու մը տալէն լաւ է. բնակէ՛ ինծի հետ»։

Յակոբ Ռաքէլի համար եօթը տարի ծառայեց, ու զայն սիրելուն պատճառով՝ իրեն քանի մը օրուան չափ ⁵թուեցաւ։

Եւ Յակոբ Լաբանի ըսաւ. «Իմ կի՛նս տուր, քանի օրերս լրացած են, որպէսզի անոր մտնեմ»։

Լաբան այդ տեղին բոլոր մարդիկը հաւաքեց ու խնճոյք սարքեց։

Սակայն իրիկունը իր աղջիկը՝ Լիան առաւ եւ անոր բերաւ. ան ալ անոր մտաւ։

Լաբան իր ստրկուհին՝ Զեղփան իբր ստրկուհի տուաւ իր աղջիկին՝ Լիայի։

Առտուն՝ ահա՛ անիկա Լիան էր։ Յակոբ Լաբանի ըսաւ. «Ի՞նչ է այս ինծի ըրածդ. ես քեզի Ռաքէլի համար չծառայեցի՞. ուստի ինչո՞ւ զիս խաբեցիր»։

Լաբան ըսաւ. «Մեր երկրին մէջ այսպիսի բան չ’ըլլար՝ կրտսերը անդրանիկէն առաջ տալ։

Լրացո՛ւր ասոր հարսանիքին շաբաթը, ու զա՛յն ալ քեզի պիտի տանք այն ծառայութեան համար՝ որ դարձեալ իմ քովս պիտի ընես ուրիշ եօթը տարի»։

Յակոբ այնպէս ըրաւ, Լիայի շաբաթը լրացուց, եւ Լաբան իր աղջիկը՝ Ռաքէլը անոր տուաւ իբր կին։

Լաբան իր Բաղղա ստրկուհին իր աղջիկին՝ Ռաքէլի տուաւ իբր ստրկուհի։

Յակոբ Ռաքէլի ալ մտաւ, ու Ռաքէլը Լիայէն աւելի սիրեց. եւ դարձեալ ուրիշ եօթը տարի ծառայեց Լաբանի։

ՅԱԿՈԲԻ ԶԱՒԱԿՆԵՐ ԿԸ ԾՆԻՆ

Երբ Տէրը տեսաւ Լիայի ատելի ըլլալը, անոր արգանդը բացաւ. բայց Ռաքէլ ամուլ էր։

Լիա յղացաւ ու որդի մը ծնաւ, եւ անոր անունը ⁶Ռուբէն կոչեց, քանի որ ըսաւ. «Անպատճառ Տէրը իմ տառապանքս տեսաւ. հիմա անշուշտ ամուսինս զիս պիտի սիրէ»։

Դարձեալ յղացաւ ու որդի մը ծնաւ, եւ ըսաւ. «Որովհետեւ Տէրը իմ ատելի ըլլալս լսեց, ատոր համար ինծի այս որդին ալ տուաւ»։ Անոր անունը ⁷Շմաւոն կոչեց։

Դարձեալ յղացաւ ու որդի մը ծնաւ, եւ ըսաւ. «Հիմա՝ այս անգամ՝ ամուսինս ինծի պիտի յարի, քանի որ երեք որդի ծնայ իրեն»։ Ատոր համար անոր անունը ⁸Ղեւի կոչեց։

Դարձեալ յղացաւ ու որդի մը ծնաւ, եւ ըսաւ. «Այս անգամ շնորհակալ պիտի ըլլամ Տէրոջմէն»։ Ատոր համար անոր անունը ⁹Յուդա կոչեց, ու ծնանելէ դադրեցաւ։