Genesis 30

Genesis 29  ‹  Genesis 30  ›  Genesis 31  »  Exodus

Ռաքէլ տեսաւ թէ ինք Յակոբի զաւակներ չծնաւ։ Ուստի Ռաքէլ իր քրոջ նախանձեցաւ ու Յակոբի ըսաւ. «Ինծի որդինե՛ր տուր, թէ ոչ՝ կը մեռնիմ»։

Յակոբի բարկութիւնը բորբոքեցաւ Ռաքէլի դէմ, եւ ըսաւ. «Միթէ ես Աստուծոյ տե՞ղն եմ, որ ¹արգանդի պտուղը մերժեց քեզի տալ»։

Ան ալ ըսաւ. «Ահա՛ իմ աղախինս՝ Բաղղա, անո՛ր մտիր. ան իմ ծունկերուս վրայ պիտի ծնանի, ու ես ալ ²անկէ՛ որդի պիտի ստանամ՝՝»։

Իր Բաղղա ստրկուհին անոր տուաւ իբր կին, եւ Յակոբ անոր մտաւ։

Բաղղա յղացաւ ու Յակոբի որդի մը ծնաւ։

Ռաքէլ ըսաւ. «Աստուած դատս պաշտպանեց. իմ ձայնս ալ լսեց եւ ինծի որդի մը տուաւ»։ Ատոր համար անոր անունը ³Դան կոչեց։

Ռաքէլի ստրկուհին՝ Բաղղա դարձեալ յղացաւ ու Յակոբի երկրորդ որդի մը ծնաւ։

Ռաքէլ ըսաւ. «Իմ քրոջս հետ ⁴հզօր ըմբշամարտութեամբ մարտնչեցայ եւ յաղթեցի»։ Ուստի անոր անունը ⁵Նեփթաղիմ կոչեց։

Երբ Լիա տեսաւ թէ ինք ծնանելէ դադրեցաւ, իր ստրկուհին՝ Զեղփան առաւ, ու զայն Յակոբի տուաւ՝ իբր կին։

Լիայի ստրկուհին՝ Զեղփա Յակոբի որդի մը ծնաւ։

Լիա ըսաւ. «Բախտս յաջողեցաւ», եւ անոր անունը ⁶Գադ կոչեց։

Լիայի ստրկուհին՝ Զեղփա երկրորդ որդի մը ծնաւ Յակոբի։

Լիա ըսաւ. «Երանելի՛ եմ, քանի որ աղջիկները երանելի պիտի կոչեն զիս». ու անոր անունը ⁷Ասեր կոչեց։

Ռուբէն գնաց ցորենի հունձքի օրերը, արտին մէջ մանրագորներ գտաւ եւ իր մօր՝ Լիայի բերաւ։ Ռաքէլ Լիայի ըսաւ. «Կ’աղերսե՛մ, տո՛ւր ինծի որդիիդ մանրագորներէն»։

Ան ալ անոր ըսաւ. «Իմ ամուսինս առնելդ քի՞չ բան է, որ որդիիս մանրագորներն ալ պիտի առնես»։ Ռաքէլ ըսաւ. «Ուստի՝ որդիիդ մանրագորներուն համար՝ այս գիշեր քեզի հետ պիտի պառկի»։

Իրիկունը, երբ Յակոբ դաշտէն կու գար, Լիա դուրս ելաւ՝ զայն դիմաւորելու, եւ ըսաւ. «Ինծի՛ պիտի մտնես, քանի որ ի՛րապէս վարձեցի քեզ՝ իմ որդիիս մանրագորներով»։ Այդ գիշերը անոր հետ պառկեցաւ։

Աստուած Լիայի մտիկ ըրաւ. ան ալ յղացաւ եւ Յակոբի հինգերորդ որդի մը ծնաւ։

Լիա ըսաւ. «Աստուած ⁸զիս վարձատրեց՝՝, որովհետեւ ստրկուհիս իմ ամուսինիս տուի». ու անոր անունը ⁹Իսաքար կոչեց։

Լիա դարձեալ յղացաւ եւ Յակոբի վեցերորդ որդի մը ծնաւ։

Լիա ըսաւ. «Աստուած ինծի լաւ պարգեւ մը շնորհեց. այս անգամ ամուսինս ինծի հետ պիտի բնակի, որովհետեւ իրեն վեց որդի ծնայ». ու անոր անունը ¹⁰Զաբուղոն կոչեց։

Անկէ ետք աղջիկ մը ծնաւ, եւ անոր անունը ¹¹Դինա կոչեց։

Աստուած յիշեց Ռաքէլը. Աստուած անոր մտիկ ըրաւ ու անոր արգանդը բացաւ.

ուստի յղացաւ եւ որդի մը ծնաւ, ու ըսաւ. «Աստուած իմ նախատինքս ¹²վերցուց»։

Անոր անունը ¹³Յովսէփ կոչեց եւ ըսաւ. «Տէրը ինծի ուրիշ որդի մըն ալ պիտի աւելցնէ»։

ՅԱԿՈԲ ԿԸ ՍԱԿԱՐԿԷ ԼԱԲԱՆԻ ՀԵՏ

Երբ Ռաքէլ Յովսէփը ծնաւ, Յակոբ Լաբանի ըսաւ. «Ուղարկէ՛ զիս՝ որ իմ տեղս ու երկիրս երթամ։

Տո՛ւր ինծի իմ կիներս՝ որոնց համար քեզի ծառայեցի, եւ զաւակներս, որպէսզի երթամ. քանի որ քեզի ըրած ծառայութիւնս դո՛ւն գիտես»։

Լաբան անոր ըսաւ. «Եթէ քու ¹⁴առջեւդ շնորհք գտայ, կ’աղերսե՛մ, կեցի՛ր. քանի ¹⁵նկատեցի թէ Տէրը քու պատճառովդ զիս օրհնեց»։

Եւ ըսաւ. «Իմացո՛ւր ինծի քու վարձքդ, ու պիտի վճարեմ»։

Ան ալ անոր ըսաւ. «Դուն գիտես թէ ի՛նչպէս ծառայեցի քեզի, եւ քու խաշինքդ ի՛նչպէս էր իմ քովս.

որովհետեւ իմ գալէս առաջ քիչ էր քու ունեցածդ, ու յոյժ շատցաւ եւ Տէրը քեզ օրհնեց իմ գալովս։ Հիմա ես ալ ի՛մ տանս համար ե՞րբ պիտի աշխատիմ»։

Ան ալ ըսաւ. «Քեզի ի՞նչ տամ»։ Յակոբ ըսաւ. «Ինծի ոչի՛նչ տուր։ Եթէ սա՛ բանը ինծի ընես, դարձեալ քու հօտերդ կ’արածեմ ու կը պահեմ։

Այսօր քու բոլոր հօտերուդ մէջէն անցնիմ, անկէ բոլոր պիսակաւոր ու խայտաբղէտ ոչխարները, բոլոր սեւ ոչխարները, եւ խայտաբղէտ ու պիսակաւոր այծերը զատեմ. իմ վարձքս անո՛նք ըլլան։

Եւ իմ արդարութիւնս քու առջեւդ սա՛պէս պիտի ¹⁶յայտնուի ¹⁷ասկէ ետք՝՝, երբ վարձքս ստուգես։ Իմ քովս գտնուող ամէն պիսակաւոր ու խայտաբղէտ չեղող այծ, եւ սեւ չեղող ոչխար՝ թող գողցուած սեպուի»։

Լաբան ըսաւ. «Քու ըսածիդ համաձայն թող ըլլայ»։

Եւ այդ օրը ¹⁸զատեց բոլորախայտ ու խայտաբղէտ նոխազները, բոլոր պիսակաւոր եւ խայտաբղէտ այծերը, ամէն ճերմակ ունեցողը, ու բոլոր սեւ ոչխարները, եւ իր որդիներուն ձեռքը տուաւ.

ու երեք օրուան ճամբայի միջոց մը դրաւ իր եւ Յակոբի միջեւ։ Յակոբ Լաբանի մնացեալ հօտերը կ’արածէր։

Յակոբ իրեն կաղամախիի, նշենիի ու սօսիի դալար ճպոտներ առաւ, եւ անոնց կեղեւները տեղ-տեղ հանեց, այնպէս որ ճպոտներուն մէջ եղած ճերմակը կ’երեւնար։

Իր կեղուած ճպոտները գուռերուն՝ այսինքն ¹⁹ջրարբներուն մէջ դրաւ, խմելու եկող հօտերուն առջեւ. որպէսզի ոչխարները տաքնան, երբ խմելու գան։

Ոչխարները ճպոտներուն առջեւ կը տաքնային, ու բոլորախայտ, պիսակաւոր եւ խայտաբղէտ ²⁰գառներ կը ծնանէին։

Յակոբ կը զատէր գառները, ու հօտերուն երեսը կը ²¹դարձնէր դէպի Լաբանի հօտերուն մէջ եղած բոլորախայտ եւ բոլոր սեւ ոչխարներուն. իր հօտերը զատ դրաւ, ու զանոնք Լաբանի ոչխարներուն քով չդրաւ։

Երբ զօրաւոր ոչխարները կը տաքնային, Յակոբ այդ ճպոտները ոչխարներուն աչքերուն առջեւ՝ գուռերուն մէջ կը դնէր, որպէսզի ճպոտներուն առջեւ տաքնան.

բայց թալկացած ոչխարներուն համար չէր դներ։ Այսպէս՝ թալկացածները Լաբանի, ու զօրաւորները՝ Յակոբի կ’ըլլային։

Եւ մարդը չափազանց բարգաւաճեցաւ, ու շատ ոչխարներ, ստրկուհիներ եւ ստրուկներ, ուղտեր ու էշեր ունեցաւ։