Genesis 38

Genesis 37  ‹  Genesis 38  ›  Genesis 39  »  Exodus

ՅՈՒԴԱ ԵՒ ԹԱՄԱՐ

Այն ատեն Յուդա իր եղբայրներուն քովէն իջաւ ու Ոդողոմացիի մը քով ¹գնաց, որուն անունը Իրաս էր։

Յուդա Շաւա անունով Քանանացիի մը աղջիկը տեսաւ, առաւ զայն եւ անոր մտաւ։

Ան ալ յղացաւ, որդի մը ծնաւ ու անոր անունը Էր կոչեց։

Դարձեալ յղացաւ, որդի մը ծնաւ եւ անոր անունը Օնան կոչեց։

Վերստին որդի մըն ալ ծնաւ, ու անոր անունը Սելոմ կոչեց։ Երբ զայն ծնաւ՝ Յուդա Քեզիբի մէջ էր։

Յուդա իր անդրանիկ որդիին՝ Էրի կին մը առաւ, որուն անունը Թամար էր։

Յուդայի անդրանիկը՝ Էր չար էր Տէրոջ ²առջեւ. ուստի Տէրը մեռցուց զայն։

Յուդա Օնանի ըսաւ. «Մտի՛ր քու եղբօրդ կնոջ, տագրութեան իրաւունքը գործադրէ՛ անոր, եւ եղբօրդ զա՛րմ հանէ»։

Օնան գիտցաւ թէ զարմը իրը պիտի չըլլար. ատոր համար երբ իր եղբօր կնոջ կը մտնէր՝ սերմը գետին կը թափէր, որպէսզի իր եղբօր զարմ չտայ։

Այս ըրած բանը Տէրոջ ³անհաճոյ եղաւ. ուստի զինք ալ մեռցուց։

Յուդա իր Թամար հարսին ըսաւ. «Այրի՛ կեցիր քու հօրդ տունը, մինչեւ որ իմ Սելոմ որդիս մեծնայ». որովհետեւ ըսաւ. «Ասիկա ալ թող չմեռնի իր եղբայրներուն պէս»։ Թամար գնաց եւ իր հօր տունը բնակեցաւ։

Ժամանակէ մը ետք, Շաւայի աղջիկը՝ Յուդայի կինը մեռաւ։ Երբ Յուդա մխիթարուեցաւ, Թամնա բարձրացաւ՝ իր հօտերը խուզողներուն քով, ինք ու իր բարեկամը՝ Ոդողոմացի Իրաս։

Թամարի պատմուեցաւ՝ ըսելով. «Ահա՛ քու կեսրայրդ Թամնա կը բարձրանայ՝ իր ոչխարները խուզելու»։

Ան ալ իր այրիութեան հագուստները հանեց իր վրայէն, քօղով մը ծածկուեցաւ ու փաթթուեցաւ, եւ Թամնայի ճամբային մէջ եղող Ենայիմի մուտքը նստաւ. քանի տեսաւ թէ Սելոմ մեծցաւ, բայց ինք անոր չտրուեցաւ՝ իբր կին։

Երբ Յուդա տեսաւ զայն՝ պոռնիկ կարծեց, որովհետեւ իր երեսը ծածկած էր։

Ուստի ճամբան անոր ⁴գնաց ու ըսաւ. «Կ’աղերսե՛մ, քեզի մտնեմ», քանի չէր գիտեր թէ ան իր հարսն է։ Ան ալ ըսաւ. «Ինծի մտնելու համար՝ ի՞նչ կու տաս ինծի»։

Ինք ալ ըսաւ. «Հօտերէն այծի ուլ մը կը ղրկեմ քեզի»։ Կինը ըսաւ. «Գրաւ մը կու տա՞ս մինչեւ ղրկելդ»։

Յուդա ըսաւ. «Ի՞նչ գրաւ տամ քեզի»։ Ան ալ ըսաւ. «Քու կնիքդ, երիզդ եւ ձեռքիդ գաւազանը տո՛ւր»։ Ինք ալ տուաւ անոր ու մտաւ անոր. Թամար անկէ յղացաւ։

Ան կանգնեցաւ եւ գնաց, վրայէն քօղը հանեց ու իր այրիութեան հագուստները հագաւ։

Իսկ Յուդա իր բարեկամին՝ Ոդողոմացիին ձեռքով այծի ուլը ղրկեց, որպէսզի կնոջ ձեռքէն գրաւը առնէ. բայց չգտաւ զայն։

Այդ տեղի մարդոց հարցուց. «Ճամբային վրայ՝ Ենայիմի մէջ եղած ⁵բոզը ո՞ւր է»։ Անոնք ըսին. «Հոս բոզ չկար»։

Բարեկամը Յուդայի վերադարձաւ եւ ըսաւ. «Չգտայ զայն, եւ այդ տեղի մարդիկն ալ ըսին թէ “Հոս բոզ չկար”»։

Յուդա ըսաւ. «Իրե՛ն թող ըլլայ, որպէսզի խայտառակ չըլլանք. ահա՛ ես այս ուլը ղրկեցի, բայց դուն չգտար զայն»։

Մօտ երեք ամիս ետք Յուդայի պատմուեցաւ՝ ըսելով. «Քու հարսդ՝ Թամար պոռնկեցաւ. նաեւ ահա՛ յղի մնաց պոռնկութենէն»։ Յուդա ըսաւ. «Դո՛ւրս հանեցէք զայն, ու թող այրուի»։

Երբ զինք դուրս կը հանէին, գրաւները իր կեսրայրին ղրկեց՝ ըսելով. «Ես այս բաներուն տիրոջմէն յղի եմ»։ Նաեւ ըսաւ. «Կ’աղերսե՛մ, ճանչցի՛ր թէ այս կնիքը, երիզն ու գաւազանը որո՛ւ կը պատկանին»։

Յուդա ճանչցաւ եւ ըսաւ. «Ան ինձմէ արդար է, որովհետեւ զայն իմ Սելոմ որդիիս չտուի»։ Յետոյ անգա՛մ մըն ալ չգիտցաւ զայն։

Անոր ծննդաբերութեան ատենը՝ ահա՛ անոր ⁶արգանդին մէջ երկուորեակ էին։

Երբ կը ծնանէր, մէկը ձեռքը երկարեց։ Մանկաբարձը առաւ ու անոր ձեռքին վրայ կրկնակի կարմիր դերձան մը կապեց՝ ըսելով. «Առաջ ասիկա՛ ելաւ»։

Բայց երբ ան իր ձեռքը ետ քաշեց՝ ահա՛ անոր եղբայրը ելաւ։ Մանկաբարձը ըսաւ. «Ինչո՞ւ սաղմընկերը պատռեցիր. այս պատռուածքը վրա՛դ ըլլայ»։ Ուստի անոր անունը ⁷Փարէս կոչուեցաւ։

Յետոյ ձեռքին վրայ կրկնակի կարմիր դերձանը ունեցող եղբայրը ելաւ, եւ անոր անունը Զարա կոչուեցաւ։