Genesis 41

Genesis 40  ‹  Genesis 41  ›  Genesis 42  »  Exodus

ՅՈՎՍԷՓ ԿԸ ՄԵԿՆԷ ՓԱՐԱՒՈՆԻ ԵՐԱԶԸ

Լման երկու տարի ետք, Փարաւոն երազին մէջ տեսաւ թէ ¹գետին եզերքը կայնած էր։

Եւ ահա՛ գետէն գեղեցիկ տեսքով ու գէր մարմինով եօթը երինջներ բարձրացան, եւ ²մարգագետինին վրայ՝՝ կ’արածէին։

Ահա՛ անոնց ետեւէն՝ գետէն ուրիշ եօթը երինջներ բարձրացան, վատ տեսքով ու նիհար մարմինով, եւ միւս երինջներուն քով՝ գետին եզերքը կայնեցան։

Վատ տեսքով ու նիհար մարմինով երինջները՝ լափեցին եօթը գեղեցիկ տեսքով եւ գէր երինջները։ Յետոյ Փարաւոն արթնցաւ։

Ապա քնացաւ, ու երկրորդ անգամ երազին մէջ տեսաւ թէ մէկ ծղօտի վրայ եօթը պարարտ եւ լաւ հասկեր կը բարձրանային։

Ահա՛ անոնց ետեւէն եօթը նիհար ու խորշակահար հասկեր կը բուսնէին։

Այս նիհար հասկերը կլլեցին եօթը պարարտ եւ լեցուն հասկերը։ Փարաւոն արթնցաւ, ու ահա՛ երազ էր։

Առտուն անոր հոգին խռովեցաւ, եւ կանչել տուաւ Եգիպտոսի բոլոր մոգերն ու անոր բոլոր իմաստունները. Փարաւոն պատմեց անոնց իր երազները, բայց ո՛չ մէկը կար՝ որ զանոնք Փարաւոնի մեկնէր։

Այն ատեն մատռուակապետը Փարաւոնի խօսեցաւ՝ ըսելով. «Այսօր ես իմ յանցանքներս կը յիշեմ։

Փարաւոն զայրացաւ իր ծառաներուն դէմ, եւ զիս բանտարկեց թիկնապահապետին տունը, զիս ու հացագործապետը.

Մէկ գիշերուան մէջ՝ ես եւ ան երազ տեսանք. իւրաքանչիւրս իր երազին նշանակութեան համաձայն՝ երազ տեսանք։

Հոն մեզի հետ թիկնապահապետին ստրուկը կար, երիտասարդ Եբրայեցի մը. անոր պատմեցինք, ու ան մեզի մեկնեց մեր երազները. իւրաքանչիւրիս՝ իր երազին համաձայն մեկնեց։

Եւ ինչպէս ան մեզի մեկնեց՝ ա՛յնպէս եղաւ. Փարաւոն զիս իմ պաշտօնիս վերադարձուց, ու զայն կախեց»։

Այն ատեն Փարաւոն մարդ ղրկեց եւ Յովսէփը կանչեց։ ³Շուտով բանտէն հանեցին՝՝ զայն, ածիլուեցաւ, իր հանդերձները փոխեց ու Փարաւոնի եկաւ։

Փարաւոն Յովսէփի ըսաւ. «Երազ տեսայ, եւ զայն մեկնո՛ղ մը չկայ. լսեցի թէ կ’ըսեն քու մասիդ, թէ կրնա՛ս երազ մը հասկնալ՝ զայն մեկնելու համար»։

Յովսէփ Փարաւոնի պատասխանեց. «Ո՛չ թէ ես, այլ Աստուա՛ծ Փարաւոնի պիտի տայ ⁴նպաստաւոր պատասխան մը»։

Փարաւոն Յովսէփի ըսաւ. «Երազիս մէջ տեսայ թէ գետին եզերքը կայնած էի։

Եւ ահա՛ գետէն եօթը երինջներ բարձրացան՝ գէր մարմինով ու գեղեցիկ տեսքով, եւ մարգագետինին վրայ կ’արածէին։

Ահա՛ անոնց ետեւէն ուրիշ եօթը երինջներ բարձրացան՝ վտիտ, շատ վատ տեսքով ու նիհար մարմինով. անոնց պէս վատ՝ բնա՛ւ տեսած չեմ Եգիպտոսի ամբողջ երկրին մէջ։

Նիհար եւ վատ երինջները՝ լափեցին առաջին եօթը գէր երինջները։

Անոնց փորը մտնելէն ետք՝ չէր գիտցուեր թէ անոնք անոնց փորը մտան. հապա անոնց տեսքը նախկինին պէս վատ էր։ Յետոյ արթնցայ։

Ու դարձեալ երազիս մէջ տեսայ թէ ահա՛ մէկ ծղօտի վրայ եօթը լեցուն եւ լաւ հասկեր կը բարձրանային։

Ահա՛ անոնց ետեւէն եօթը չոր, նիհար ու խորշակահար հասկեր կը բուսնէին։

Նիհար հասկերը կլլեցին այդ եօթը լաւ հասկերը։ Եւ պատմեցի մոգերուն, բայց ո՛չ մէկը կայ՝ որ ինծի բացատրէ»։

Յովսէփ Փարաւոնի ըսաւ. «Մէ՛կ է Փարաւոնի երազը. Աստուած իր ընելիքը յայտնեց Փարաւոնի։

Եօթը լաւ երինջները՝ եօթը տարի են, ու եօթը լաւ հասկերը՝ եօթը տարի են. երազը մէ՛կ է։

Եւ անոնց ետեւէն բարձրացած եօթը նիհար ու վատ երինջները՝ եօթը տարի են, եւ եօթը պարապ ու խորշակահար հասկերը՝ եօթը տարուան սով է։

Փարաւոնի ըսած խօսքս ա՛յս է. Աստուած իր ընելիքը Փարաւոնի ցոյց տուեր է։

Ահա՛ Եգիպտոսի ամբողջ երկրին մէջ եօթը տարի մեծ առատութիւն պիտի գայ,

իսկ անոնց ետեւէն՝ եօթը տարի սով պիտի ⁵գայ. Եգիպտոսի երկրին մէջ՝ ամբողջ առատութիւնը պիտի մոռցուի, եւ սովը պիտի սպառէ երկիրը։

Երկրին մէջ առատութիւնը պիտի չգիտցուի՝ այդ յետագայ սովին պատճառով, որովհետեւ յոյժ սաստիկ պիտի ըլլայ։

Երազը երկու անգամ Փարաւոնի կրկնուելուն պատճառը սա՛ է, որ այս բանը Աստուծմէ հաստատուեցաւ, ու Աստուած շուտով պիտի իրագործէ զայն։

Ուստի հիմա Փարաւոն թող գտնէ խելացի եւ իմաստուն մարդ մը, ու զայն Եգիպտոսի երկրին վրայ դնէ։

Փարաւոն սա՛ թող ընէ. երկրին վրայ վերատեսուչներ նշանակէ, եւ Եգիպտոսի երկրին արմտիքներէն՝ առատութեան եօթը տարիներուն մէջ հինգէն մէկը առնէ։

Այդ գալիք լաւ տարիներուն ամբողջ պարէնը ժողվեն, Փարաւոնի ձեռքին տակ ցորեն դիզեն ու քաղաքներուն մէջ պարէն պահեն։

Եգիպտոսի երկրին մէջ ըլլալիք եօթը տարուան սովին դէմ՝ այս պարէնը երկրին համար թող ամբարուի, որպէսզի երկիրը սովէն չկործանի»։

ՅՈՎՍԷՓ Կ’ԸԼԼԱՅ ԵԳԻՊՏՈՍԻ ԿԱՌԱՎԱՐԻՉԸ

Այս խօսքը Փարաւոնի աչքերուն եւ անոր բոլոր ծառաներուն աչքերուն լաւ երեւցաւ։

Փարաւոն իր ծառաներուն ըսաւ. «Կրնա՞նք գտնել ասոր պէս մէկը, որուն մէջ Աստուծոյ Հոգին կայ»։

Ու Փարաւոն Յովսէփի ըսաւ. «Որովհետեւ Աստուած այս բոլորը քեզի գիտցուց, քեզի պէս խելացի եւ իմաստուն ո՛չ մէկը կայ։

Իմ տանս վրայ կեցիր, ու ամբողջ ժողովուրդս քու ⁶հրամաններուդ թող հնազանդի՝՝։ Ես միա՛յն գահով քեզմէ աւելի մեծ ըլլամ»։

Եւ Փարաւոն Յովսէփի ըսաւ. «Ահա՛ քեզ Եգիպտոսի ամբողջ երկրին վրայ կարգեցի»։

Փարաւոն իր ձեռքէն մատանին հանեց ու Յովսէփի ձեռքը դրաւ. անոր բարակ քթանէ հագուստներ հագցուց եւ անոր վիզը ոսկի մանեակ անցուց։

Ապա՝ զայն իր երկրորդ կառքը նստեցուց, ու կը պոռային անոր առջեւէն. «Ծնրադրեցէ՛ք»։ Եգիպտոսի ամբողջ երկրին վրայ կարգեց զայն։

Եւ Փարաւոն Յովսէփի ըսաւ. «Ե՛ս եմ Փարաւոնը. առանց քեզի՝ ո՛չ մէկը իր ձեռքը կամ իր ոտքը պիտի վերցնէ Եգիպտոսի ամբողջ երկրին մէջ»։

Փարաւոն Յովսէփի անունը ⁷Փսոմփթոմփանէ կոչեց, եւ ⁸Արեգ քաղաքին՝՝ Պետափրա քուրմին աղջիկը՝ Ասանէթը անոր տուաւ՝ իբր կին։ Յովսէփ դուրս ելաւ՝ Եգիպտոսի երկիրը շրջելու։

Յովսէփ Եգիպտոսի Փարաւոն թագաւորին ներկայացած ատենը երեսուն տարեկան էր։ Յովսէփ Փարաւոնի առջեւէն դուրս ելաւ, ու Եգիպտոսի ամբողջ երկիրը շրջագայեցաւ։

Առատութեան եօթը տարիներուն մէջ՝ երկիրը ⁹յոյժ շատ՝՝ բերք տուաւ։

Եգիպտոսի երկրին մէջ եղած եօթը տարիներուն ամբողջ պարէնը ժողվեց, եւ քաղաքներու մէջ դրաւ պարէնը. ամէն քաղաքի շրջակայ արտերուն պարէնը՝ նո՛յն քաղաքին մէջ դրաւ։

Յովսէփ ծովու աւազին չափ յոյժ շատ ցորեն դիզեց. այնպէս որ հաշուելէ հրաժարեցաւ՝ անթիւ ըլլալուն համար։

Սովի տարիներուն գալէն առաջ՝ Յովսէփի երկու որդիներ ծնան, որ Արեգ քաղաքին Պետափրա քուրմին աղջիկը՝ Ասանէթ ծնաւ անոր։

Յովսէփ անդրանիկին անունը ¹⁰Մանասէ կոչեց, քանի որ ըսաւ. «Աստուած ինծի մոռցնել տուաւ իմ ամբողջ տաժանքս ու հօրս ամբողջ տունը»։

Իսկ երկրորդին անունը ¹¹Եփրեմ կոչեց, որովհետեւ ըսաւ. «Աստուած իմ տառապանքիս երկրին մէջ աճեցուց զիս»։

Եգիպտոսի երկրին մէջ եղած առատութեան եօթը տարիները վերջացան,

եւ Յովսէփի ըսածին համաձայն՝ սովի եօթը տարիները սկսան գալ։ Բոլոր երկիրներուն մէջ սով եղաւ, բայց Եգիպտոսի ամբողջ երկրին մէջ հաց կար։

Երբ Եգիպտոսի ամբողջ երկիրը անօթեցաւ, ժողովուրդը հացի համար Փարաւոնի աղաղակեց։ Փարաւոն բոլոր Եգիպտացիներուն ըսաւ. «Յովսէփի՛ գացէք. ի՛նչ որ ձեզի ըսէ՝ ըրէ՛ք»։

Երկրի ամբողջ մակերեսին վրայ սով եղաւ. Յովսէփ բացաւ բոլոր շտեմարանները, ու Եգիպտացիներուն հացահատիկ ծախեց։ Սովը սաստկացաւ Եգիպտոսի երկրին մէջ,

եւ բոլոր երկիրներէն Եգիպտոս կու գային՝ Յովսէփէ հացահատիկ գնելու, որովհետեւ ամէն երկրի մէջ սովը սաստկացաւ։