Judges 6

Joshua  «  Judges 5  ‹  Judges 6  ›  Judges 7  »  Ruth

ԳԵԴԷՈՆ

Իսրայէլի որդիները Տէրոջ ¹առջեւ չարիք գործեցին. ուստի Տէրը զանոնք եօթը տարի Մադիանացիներուն ձեռքը մատնեց։

Մադիանացիներուն ձեռքը Իսրայէլի դէմ զօրացաւ, ու Մադիանացիներուն պատճառով՝ Իսրայէլի որդիները իրենց համար խոռոչներ, քարայրներ եւ ամրութիւններ շինեցին լեռներու մէջ։

Երբ Իսրայելացիները կը սերմանէին, Մադիանացիները անոնց դէմ կը բարձրանային, եւ Ամաղեկացիներն ու ²արեւելքցիներն ալ կը բարձրանային։

Անոնց դիմաց բանակելով՝ գետինին արգասիքը կը փճացնէին մինչեւ Գազա, ու Իսրայէլի ապրուստ մը չէին թողուր, ո՛չ ոչխար, ո՛չ արջառ, եւ ո՛չ էշ։

Արդարեւ անոնք իրենց խաշինքով ու վրաններով կը բարձրանային, եւ մարախի պէս՝ բազմութեամբ կու գային. թէ՛ իրենք եւ թէ իրենց ուղտերը անթիւ էին, ու Իսրայէլի երկիրը կու գային՝ զայն կործանելու համար։

Իսրայէլ Մադիանացիներուն պատճառով չափազանց ³թշուառացաւ. հետեւաբար Իսրայէլի որդիները Տէրոջ աղաղակեցին։

Երբ Իսրայէլի որդիները Տէրոջ աղաղակեցին Մադիանացիներուն պատճառով,

Տէրը Իսրայէլի որդիներուն մարգարէ մը ղրկեց՝ որ անոնց ըսաւ. «Տէրը՝ Իսրայէլի Աստուածը սա՛ կը յայտարարէ. “Ե՛ս ձեզ Եգիպտոսէն բարձրացուցի, ու ձեզ ստրկութեան տունէն դուրս հանեցի.

ձեզ Եգիպտացիներուն ձեռքէն եւ բոլոր ձեզ տանջողներուն ձեռքէն ազատեցի. զանոնք ձեր առջեւէն վռնտելով անոնց երկիրը ձեզի տուի,

ու ձեզի ըսի. "Ե՛ս եմ Եհովան՝ ձեր Աստուածը. մի՛ վախնաք Ամորհացիներուն աստուածներէն, որոնց երկրին մէջ կը բնակիք"։ Բայց դուք իմ խօսքս մտիկ չըրիք”»։

Տէրոջ հրեշտակը եկաւ եւ Աբիեզերեան Յովասի բեւեկնիին տակ նստաւ, որ Եփրայի մէջ էր. անոր որդին՝ Գեդէոն հնձանին մէջ ցորեն կը ծեծէր, Մադիանացիներուն ⁴առջեւէն փախցնելու համար։

Տէրոջ հրեշտակը իրեն երեւցաւ ու ըսաւ. «Ո՛վ զօրաւոր կտրիճ, Տէրը քեզի հետ է»։

Գեդէոն անոր ըսաւ. «Ո՜հ, իմ տէ՛րս, եթէ Տէրը մեզի հետ է, ինչո՞ւ այս բոլոր բաները մեզի պատահեցան։ Ո՞ւր են անոր բոլոր սքանչելիքները, որոնց մասին մեր հայրերը մեզի կը պատմեն՝ ըսելով. “Տէ՛րը մեզ Եգիպտոսէն բարձրացուց”։ Բայց հիմա Տէրը մեզ երեսէ ձգած է՝ մեզ Մադիանացիներուն ձեռքը մատնելով»։

Տէրը իրեն նայեցաւ եւ ըսաւ. «Ա՛յդ ոյժովդ գնա, որպէսզի Իսրայէլը Մադիանացիներուն ձեռքէն ազատես։ Ես չե՞մ քեզ ղրկողը»։

Գեդէոն անոր ըսաւ. «Ո՜հ, իմ Տէ՛րս, Իսրայէլը ինչո՞վ ազատեմ. ահա՛ իմ ⁵գերդաստանս Մանասէի տոհմին ամենէն տկարն է, ու ես իմ հօրս տան ամենէն փոքրն եմ»։

Տէրը իրեն ըսաւ. «Ես անշուշտ քեզի հետ պիտի ըլլամ, եւ Մադիամը մէկ մարդու պէս պիտի զարնես»։

Ինք ալ անոր ըսաւ. «Կ’աղերսե՛մ, եթէ քու աչքերուդ առջեւ շնորհք գտայ՝ ինծի նշա՛ն մը ⁶ցոյց տուր՝՝, որպէսզի գիտնամ թէ դո՛ւն ես ինծի հետ խօսողը։

Կ’աղերսե՛մ, ասկէ մի՛ հեռանար, մինչեւ որ քեզի գամ, իմ ընծաս ⁷բերեմ ու քու առջեւդ դնեմ»։ Ան ալ ըսաւ. «Կը սպասեմ՝ մինչեւ որ վերադառնաս»։

Գեդէոն ներս գնաց, այծերէն ուլ մը պատրաստեց, նաեւ բաղարջ՝ մէկ արդու ալիւրէ. միսը սակառի մը մէջ դրաւ, արգանակն ալ պտուկի մը մէջ դրաւ, անոր ⁸բերաւ՝ բեւեկնիին տակ, եւ մատուցանեց։

Աստուծոյ հրեշտակը իրեն ըսաւ. «Միսն ու բաղարջը ա՛ռ, այս ժայռին վրայ դի՛ր, եւ արգանակը թափէ՛»։ Ինք ալ այդպէս ըրաւ։

Յետոյ Տէրոջ հրեշտակը իր ձեռքը եղող ցուպին ծայրը երկարեց, ու միսին եւ բաղարջին դպաւ. վէմէն կրակ բարձրացաւ, միսն ու անխմոր կարկանդակը սպառեց, ապա Տէրոջ հրեշտակը անոր աչքերուն առջեւէն գնաց։

Երբ Գեդէոն տեսաւ թէ ան Տէրոջ հրեշտակն էր, Գեդէոն ըսաւ. «Վա՜յ ինծի, Տէ՛ր Եհովա, որովհետեւ Տէրոջ հրեշտակը երես առ երես տեսայ»։

Բայց Տէրը իրեն ըսաւ. «Խաղաղութի՜ւն քեզի. մի՛ վախնար, պիտի չմեռնիս»։

Գեդէոն հոն Տէրոջ զոհասեղան մը կառուցանեց եւ անոր անունը ⁹Եհովա-Շալոմ կոչեց, որ մինչեւ այսօր Աբիեզերեաններու Եփրային մէջ կեցած է։

Այդ գիշերը՝ Տէրը իրեն ըսաւ. «Ա՛ռ քու հօրդ զուարակը, եօթը տարեկան երկրորդ զուարակը, փլցո՛ւր հօրդ ունեցած Բահաղի բագինը, ու կտրէ՛ քովի աստարովթը։

Տէրոջ՝ քու Աստուծոյդ զոհասեղա՛ն մը կառուցանէ այս ¹⁰ապառաժին գագաթը՝ յարմար կերպով՝՝, ա՛ռ երկրորդ զուարակը, եւ ողջակէ՛զ մատուցանէ աստարովթին փայտով՝ որ պիտի կտրես»։

Գեդէոն իր ծառաներէն տասը մարդ առաւ, ու Տէրոջ իրեն ըսածին համաձայն ըրաւ. սակայն այս բանը ցերեկը չըրաւ՝ իր հօր ընտանիքէն եւ քաղաքին մարդոցմէն վախնալով, հապա գիշերը ըրաւ։

Երբ քաղաքին մարդիկը առտուն՝ կանուխ ելան, ահա՛ Բահաղի բագինը փլած էր, անոր քովի աստարովթը՝ կտրուած, ու երկրորդ զուարակը՝ կառուցանուած զոհասեղանին վրայ ողջակէզ մատուցանուած։

Ուստի իրարու ըսին. «Ո՞վ գործեց այս արարքը»։ Որոնեցին, փնտռեցին, եւ ըսուեցաւ. «Յովասի որդին՝ Գեդէոն գործեց այս արարքը»։

Քաղաքին մարդիկը Յովասի ըսին. «Դո՛ւրս հանէ որդիդ՝ որպէսզի մեռնի, քանի որ Բահաղի բագինը փլցուցեր ու անոր քովի աստարովթը կտրեր է»։

Յովաս իրեն ¹¹ընդդիմացող բոլոր մարդոց ըսաւ. «Միթէ Բահաղի իրաւունքը դո՞ւք պիտի պաշտպանէք, կամ թէ զայն դո՞ւք պիտի ազատէք. ո՛վ որ անոր իրաւունքը պաշտպանէ, անիկա՛ թող մեռցուի մինչեւ առտու։ Եթէ ան աստուած է, թող ի՛նք պաշտպանէ իր իրաւունքը անոր դէմ, քանի որ իր բագինը փլցուած է»։

Այդ օրը զայն ¹²Յերոբահաղ կոչեց, որովհետեւ ըսաւ. «Թող Բահա՛ղ պաշտպանէ իր իրաւունքը անոր դէմ, քանի որ ան իր բագինը փլցուց»։

Բոլոր Մադիանացիները, Ամաղեկացիներն ու ¹³արեւելքցիները միաբանութեամբ հաւաքուեցան, եւ Յորդանանէն անցնելով՝ Յեզրայէլի հովիտին մէջ բանակեցան։

Տէրոջ Հոգին ¹⁴Գեդէոնի վրայ հանգչեցաւ՝՝. երբ ան շեփոր հնչեցուց, Աբիեզերեանները իր ¹⁵քով ¹⁶կանչուեցան։

Ամբողջ Մանասէի պատգամաւորներ ղրկեց, ան ալ իր քով կանչուեցաւ. Ասերի, Զաբուղոնի ու Նեփթաղիմի ալ պատգամաւորներ ղրկեց, եւ անոնք բարձրացան զիրենք դիմաւորելու։

Գեդէոն Աստուծոյ ըսաւ. «Եթէ Իսրայէլը իմ ձեռքովս պիտի ազատես՝ ինչպէս ըսիր,

ահա՛ կալին մէջ բուրդի գզաթ մը կը դնեմ. եթէ միայն գզաթին վրայ ցօղ ըլլայ, իսկ ամբողջ գետինը չոր մնայ, այն ատեն պիտի գիտնամ թէ Իսրայէլը իմ ձեռքովս պիտի ազատես՝ ինչպէս ըսիր»։

Եւ այնպէս եղաւ. երբ առտուն՝ կանուխ ելաւ ու գզաթը ճմլեց, գզաթէն իր քամած ցօղը՝ լման գաւաթ մը ջուր եղաւ։

Գեդէոն Աստուծոյ ըսաւ. «Քու բարկութիւնդ ինծի դէմ թող չբորբոքի, եւ միայն այս անգամ խօսիմ։ Կ’աղերսե՛մ, միայն այս անգամ ալ գզաթով փորձեմ. այժմ միայն գզաթը թող չոր մնայ, իսկ ամբողջ գետինին վրայ թող ցօղ ըլլայ»։

Այդ գիշերը Աստուած այնպէս ըրաւ. միայն գզաթը չոր մնաց, իսկ ամբողջ գետինին վրայ ցօղ եղաւ։