Judges 12

Joshua  «  Judges 11  ‹  Judges 12  ›  Judges 13  »  Ruth

ՅԵՓԹԱՅԷ ԵՒ ԵՓՐԵՄԵԱՆՆԵՐԸ

Եփրեմի մարդիկը ¹կանչուեցան, դէպի հիւսիսային կողմը անցան եւ Յեփթայէի ըսին. «Ինչո՞ւ Ամմոնի որդիներուն դէմ պատերազմելու գացած ատենդ մեզ չկանչեցիր, որպէսզի քեզի հետ երթայինք. ուստի տունդ կրակով պիտի այրենք քու վրադ»։

Յեփթայէ անոնց ըսաւ. «Ես ու իմ ժողովուրդս մեծ կռիւի մէջ էինք Ամմոնի որդիներուն հետ, բայց երբ ձեզ ²կանչեցի, դուք զիս անոնց ձեռքէն չազատեցիք։

Ես ալ, երբ տեսայ թէ դուք զիս չէք ազատեր, ³կեանքս վտանգելով՝՝ դէպի Ամմոնի որդիները անցայ, եւ Տէրը զանոնք իմ ձեռքս մատնեց։ Ինչո՞ւ այսօր իմ քովս բարձրացաք՝ ինծի դէմ պատերազմելու»։

Յեփթայէ Գաղաադի բոլոր մարդիկը հաւաքելով Եփրեմի դէմ պատերազմեցաւ։ Գաղաադի մարդիկը Եփրեմեանները զարկին, քանի որ ըսեր էին. «Դո՛ւք՝ Գաղաադացիներդ՝ Եփրեմի ազատածներն էք Եփրեմի մէջ ու Մանասէի մէջ»։

Գաղաադացիները Եփրեմի առջեւէն Յորդանանի անցքերը գրաւեցին, ու երբ Եփրեմի ազատածներէն մէկը ըսէր. «Թողուցէ՛ք որ անցնիմ», Գաղաադի մարդիկը անոր կ’ըսէին. «Եփրեմեա՞ն ես»։ Եթէ ան “ո՛չ” ըսէր,

իրենք անոր կ’ըսէին. «Այժմ ⁴“շիպպոլէթ” ըսէ»։ Եթէ ան “սիպպոլէթ” ըսէր, (քանի որ չէր կրնար շիտակ արտասանել,) զայն կը բռնէին եւ Յորդանանի անցքերուն մէջ կը մորթէին։ Այդ ատեն Եփրեմէն քառասուներկու հազար մարդ ինկաւ։

Յեփթայէ Իսրայէլի մէջ վեց տարի դատաւոր եղաւ. յետոյ Գաղաադացի Յեփթայէ մեռաւ, ու Գաղաադի քաղաքներէն մէկուն մէջ թաղուեցաւ։

ԱԲԵՍՍԱ, ԵԼՈՆ, ԱԲԴՈՆ

Անկէ ետք Իսրայէլի մէջ Բեթլեհեմացի Աբեսսան դատաւոր եղաւ։

Ան երեսուն որդի ունէր, նաեւ երեսուն աղջիկ՝ որ դուրս ղրկեց, եւ դուրսէն ալ իր որդիներուն երեսուն աղջիկ ներս բերաւ. Իսրայէլը եօթը տարի դատեց։

Երբ Աբեսսան մեռաւ՝ Բեթլեհէմի մէջ թաղուեցաւ։

Անկէ ետք Զաբուղոնացի Ելոն Իսրայէլի դատաւոր եղաւ, ու Իսրայէլը տասը տարի դատեց։

Երբ Զաբուղոնացի Ելոն մեռաւ, Զաբուղոնի երկիրը՝ Այեղոնի մէջ թաղուեցաւ։

Անկէ ետք Փարաթոնացի Հելլէլի որդին՝ Աբդոն Իսրայէլի դատաւոր եղաւ։

Ան քառասուն որդի ու երեսուն թոռ ունէր, որ եօթանասուն աւանակներու վրայ կը հեծնէին. Իսրայէլը ութ տարի դատեց։

Երբ Փարաթոնացի Հելլէլի որդին՝ Աբդոն մեռաւ, Եփրեմի երկիրը՝ Փարաթոնի մէջ թաղուեցաւ, Ամաղեկացիներու լերան վրայ։