Judges 13

Joshua  «  Judges 12  ‹  Judges 13  ›  Judges 14  »  Ruth

ՍԱՄՓՍՈՆԻ ԾՆՈՒՆԴԸ

Իսրայէլի որդիները Տէրոջ ¹առջեւ վերստին չարիք գործեցին. ուստի Տէրը զանոնք քառասուն տարի Փղշտացիներուն ձեռքը մատնեց։

Դանի գերդաստանէն Մանուէ անունով սարաացի մարդ մը կար, որուն կինը ամուլ էր ու զաւակ չէր ծնաներ։

Տէրոջ հրեշտակը այս կնոջ երեւցաւ եւ անոր ըսաւ. «Ահա՛ դուն այժմ ամուլ ես ու չես ծնանիր. բայց պիտի յղանաս եւ որդի մը պիտի ծնանիս։

Ուստի հիմա ²զգուշացի՛ր որ գինի կամ օղի չխմես, ո՛չ ալ անմաքուր բան մը ուտես.

արդարեւ ահա՛ պիտի յղանաս ու որդի մը պիտի ծնանիս, եւ անոր գլուխին վրայ ածելի պիտի ³չանցնի, քանի որ այդ տղան իր մօր ⁴արգանդէն Աստուծոյ ⁵ուխտաւորը պիտի ըլլայ. ի՛նք պիտի սկսի Իսրայէլը ազատել Փղշտացիներուն ձեռքէն»։

Յետոյ կինը գնաց ու իր ամուսինին պատմեց՝ ըսելով. «Աստուծոյ մարդ մը ինծի եկաւ. անոր տեսքը Աստուծոյ հրեշտակի տեսքին պէս յոյժ ահարկու էր. անոր ուրկէ՛ ըլլալը չհարցուցի, ո՛չ ալ ան իր անունը ինծի հաղորդեց։

Բայց ինծի ըսաւ. “Ահա՛ պիտի յղանաս եւ որդի մը պիտի ծնանիս։ Ուստի հիմա գինի կամ օղի մի՛ խմեր, ու ո՛չ մէկ անմաքուր բան կեր. քանի որ այդ տղան իր մօր արգանդէն մինչեւ իր մահուան օրը՝ Աստուծոյ ուխտաւորը պիտի ըլլայ”»։

Մանուէ Տէրոջ թախանձեց՝ ըսելով. «Ո՜վ Տէր, կ’աղերսե՛մ, այն Աստուծոյ մարդը՝ որ դո՛ւն ղրկեցիր, անգա՛մ մըն ալ մեզի թող գայ ու մեզի սորվեցնէ թէ այդ ծնելիք տղային ի՛նչ ընենք»։

Աստուած Մանուէի խօսքը մտիկ ըրաւ, եւ Աստուծոյ հրեշտակը անգամ մըն ալ կնոջ եկաւ՝ երբ արտին մէջ նստած էր, բայց անոր ամուսինը՝ Մանուէ՝ իրեն հետ չէր։

Կինը շուտով վազեց, ամուսինին պատմեց ու անոր ըսաւ. «Ահա՛ այն օրը ինծի եկող մարդը դարձեալ ինծի երեւցաւ»։

Մանուէ կանգնեցաւ, իր կնոջ հետեւեցաւ, այն մարդուն քով եկաւ եւ անոր ըսաւ. «Այս կնոջ հետ խօսող մարդը դո՞ւն ես»։ Ան ալ ըսաւ. «Ես եմ»։

Մանուէ ըսաւ. «Երբ քու խօսքդ իրագործուի, տղային կանոնը ի՞նչ պիտի ըլլայ, ⁶ի՞նչ ընելու է՝՝»։

Տէրոջ հրեշտակը Մանուէի ըսաւ. «Կինը բոլոր ըսածներէս թող զգուշանայ.

⁷որթատունկէն ելած ո՛չ մէկ բան թող ուտէ, գինի կամ օղի թող չխմէ, ո՛չ մէկ անմաքուր բան թող ուտէ. ամէն ինչ որ իրեն պատուիրեցի՝ թող պահէ»։

Մանուէ Տէրոջ հրեշտակին ըսաւ. «Կ’աղերսե՛մ, քեզ մեր ⁸քով պահենք՝՝, մինչեւ որ քեզի այծերէն ուլ մը պատրաստենք»։

Տէրոջ հրեշտակը Մանուէի ըսաւ. «Եթէ զիս քովդ պահես ալ՝ քու հացէդ պիտի չուտեմ. բայց եթէ ողջակէզ պիտի մատուցանես, զայն Տէրո՛ջ մատուցանէ»։ Արդարեւ Մանուէ չէր գիտեր թէ ան Տէրոջ հրեշտակն է։

Մանուէ Տէրոջ հրեշտակին ըսաւ. «Անունդ ի՞նչ է, որպէսզի երբ խօսքդ իրագործուի՝ քեզ պատուենք»։

Տէրոջ հրեշտակը անոր ըսաւ. «Ինչո՞ւ անունս այսպէս կը հարցնես. ան սքանչելի է»։

Մանուէ ⁹ուլը եւ հացի ընծան առաւ, ու վէմին վրայ Տէրոջ մատուցանեց. հրեշտակն ալ սքանչելիք մը ըրաւ, մինչ Մանուէ եւ իր կինը կը նայէին։

Արդարեւ երբ բոցը զոհասեղանէն դէպի երկինք կը բարձրանար, Տէրոջ հրեշտակն ալ զոհասեղանին բոցով բարձրացաւ. ասիկա տեսնելով՝ Մանուէ ու իր կինը երեսի վրայ գետին ինկան։

Տէրոջ հրեշտակը ա՛լ Մանուէի եւ անոր կնոջ չերեւցաւ. այն ատեն Մանուէ հասկցաւ թէ ան Տէրոջ հրեշտակն էր։

Մանուէ իր կնոջ ըսաւ. «Անշուշտ պիտի մեռնինք, որովհետեւ Աստուած տեսանք»։

Իսկ իր կինը իրեն ըսաւ. «Եթէ Տէրը բաղձար մեզ մեռցնել, մեր ձեռքէն չէր ընդուներ ողջակէզն ու հացի ընծան. այս բոլոր բաները մեզի ցոյց չէր տար, եւ այս ատեն մեզի լսել չէր տար այսպիսի խօսքեր»։

Կինը որդի մը ծնաւ, ու անոր անունը Սամփսոն կոչեց. տղան մեծցաւ, Տէրը զինք օրհնեց,

եւ Տէրոջ Հոգին սկսաւ զինք մղել Սարաայի ու Եսթաւուղի մէջտեղ՝ ¹⁰Դանի բանակավայրին մէջ։