Judges 14

Joshua  «  Judges 13  ‹  Judges 14  ›  Judges 15  »  Ruth

ՍԱՄՓՍՈՆ ԵՒ ԹԱՄՆԱԹԱՑԻ ԱՂՋԻԿԸ

Սամփսոն Թամնաթա իջաւ, եւ Թամնաթայի մէջ Փղշտացիներու աղջիկներէն կին մը տեսաւ։

Երբ իր տունը բարձրացաւ, իր հօր ու մօր պատմեց, եւ ըսաւ. «Թամնաթայի մէջ Փղշտացիներու աղջիկներէն կին մը տեսայ. հիմա զայն ինծի՛ առէք՝ իբր կին»։

Անոր հայրն ու մայրը իրեն ըսին. «Միթէ քու եղբայրներուդ աղջիկներուն մէջ, եւ իմ ամբողջ ժողովուրդիս մէջ կին չկա՞յ, որ դուն անթլփատ Փղշտացիներէն կին առնելու պիտի երթաս»։ Բայց Սամփսոն իր հօր ըսաւ. «Զա՛յն առ ինծի, քանի ան ¹ինծի հաճելի՝՝ է»։

Անոր հայրն ու մայրը չէին գիտեր թէ ասիկա Տէրոջմէն էր, քանի որ ան առիթ մը կը կը փնտռէր՝ Փղշտացիներուն դէմ կռուելու. այդ ատեն Փղշտացինե՛րը կը տիրէին Իսրայէլի վրայ։

Սամփսոն իր հօր ու մօր հետ Թամնաթա իջաւ։ Երբ Թամնաթայի այգիները հասան, ահա՛ առիւծի կորիւն մը մռնչելով իրեն դէմ եկաւ։

Տէրոջ Հոգին զինք համակեց, եւ ուլ մը ճեղքելու պէս՝ զայն ճեղքեց, թէպէտ ոչինչ ունէր ձեռքին մէջ. ըրածը իր հօր եւ մօր չպատմեց։

Յետոյ իջաւ, կնոջ հետ խօսեցաւ, ու կինը Սամփսոնի ²հաճելի թուեցաւ՝՝։

Ժամանակէ մը ետք, երբ վերադարձաւ ³կինը առնելու, առիւծին դիակը տեսնելու համար՝ իր ճամբայէն շեղեցաւ. եւ ահա՛ առիւծին մարմինին մէջ մեղուներու խումբ մը կար, նաեւ մեղր։

Անկէ ափին մէջ առաւ եւ ուտելով կ’երթար. իր հօր ու մօր գնաց եւ անոնց ալ տուաւ, ու կերան. բայց անոնց չիմացուց թէ մեղրը առիւծին մարմինէն հաներ էր։

Իր հայրը այդ կնոջ քով իջաւ, եւ Սամփսոն հոն խնճոյք մը սարքեց, քանի որ երիտասարդները այդպէս կ’ընէին։

Երբ զինք տեսան, երեսուն ընկեր բերին՝ որ իրեն հետ ըլլան։

Սամփսոն անոնց ըսաւ. «Այժմ ձեզի հանելուկ մը պիտի առաջարկեմ. եթէ զայն այս խնճոյքին եօթը օրուան մէջ ինծի բացատրէք եւ գտնէք, ես ալ ձեզի երեսուն ⁴շապիկ ու երեսուն փոխելիք հագուստ պիտի տամ։

Բայց եթէ չկարենաք զայն ինծի բացատրել, դո՛ւք ինծի երեսուն շապիկ ու երեսուն փոխելիք հագուստ պիտի տաք»։ Անոնք ալ իրեն ըսին. «Առաջարկէ՛ մեզի հանելուկդ, որպէսզի լսենք»։

Անոնց ըսաւ. «Ուտողէն ուտելիք ելաւ, եւ զօրեղէն քաղցրութիւն ելաւ»։ Անոնք այս հանելուկը երեք օրուան մէջ չկրցան բացատրել։

⁵Եօթներորդ օրը Սամփսոնի կնոջ ըսին. «Հրապուրէ՛ ամուսինդ՝ որ հանելուկը մեզի բացատրէ, որպէսզի քեզ ու հօրդ տունը կրակով չայրենք։ Մեզ թշուառացնելո՞ւ համար կանչեցիք. այդպէս չէ՞»։

Սամփսոնի կինը անոր քով կու լար եւ կ’ըսէր. «Դուն զիս միայն կ’ատես, բնա՛ւ չես սիրեր. իմ ժողովուրդիս որդիներուն հանելուկ մը առաջարկեցիր, բայց ինծի չբացատրեցիր»։ Ինք ալ անոր կ’ըսէր. «Ահա՛ իմ հօրս եւ մօրս չբացատրեցի, ու քեզի՞ պիտի բացատրեմ»։

Բայց ան իրենց խնճոյքին եօթը օրուան մէջ իր քով լացաւ. Սամփսոն եօթներորդ օրը անոր բացատրեց, քանի զինք կը տուայտեցնէր։ Ան ալ իր ժողովուրդին որդիներուն բացատրեց հանելուկը։

Քաղաքին մարդիկը եօթներորդ օրը՝ արեւին մայր մտնելէն առաջ անոր ըսին. «Մեղրէն քաղցր եւ առիւծէն զօրեղ ի՞նչ կայ»։ Ինք ալ անոնց ըսաւ. «Եթէ դուք իմ երինջովս չհերկէիք, հանելուկս չէիք կրնար գտնել»։

Տէրոջ Հոգին զինք համակեց, ու Ասկաղոն իջնելով՝ անոնցմէ երեսուն մարդ ⁶մեռցուց, անոնց ⁷հագուստները առաւ, եւ հանելուկը բացատրողներուն տուաւ իբր փոխնորդ։ Իր բարկութիւնը բորբոքած ըլլալով՝ իր հօր տունը բարձրացաւ։

Իսկ Սամփսոնի կինը անոր ընկերին տրուեցաւ, որուն հետ բարեկամացեր էր։