Judges 17

Joshua  «  Judges 16  ‹  Judges 17  ›  Judges 18  »  Ruth

Եփրեմի լեռնակողմէն Միքա անունով մարդ մը կար։

Ան իր մօր ըսաւ. «Քեզմէ առնուած այն հազար հարիւր կտոր արծաթը, որուն համար անիծեցիր եւ ականջներուս ալ խօսեցար, ահա՛ այդ արծաթը իմ քովս է. զայն ե՛ս առեր էի»։ Մայրը անոր ըսաւ. «Օրհնեա՜լ ըլլաս Տէրոջմէն, որդեա՛կս»։

Երբ հազար հարիւր կտոր արծաթը իր մօր վերադարձուց, մայրը ըսաւ. «Ես այդ արծաթը իմ ձեռքէս բոլորովին Տէրոջ ¹ընծայեր էի՝ որդիիս համար, որպէսզի անով քանդակուած ու ²ձուլածոյ կուռք՝՝ շինուին. ուստի հիմա զայն քեզի կը վերադարձնեմ»։

Երբ Միքա այդ արծաթը իր մօր վերադարձուց, մայրը երկու հարիւր կտոր արծաթ առաւ եւ զանոնք ձուլագործին տուաւ. ան ալ անոնցմով քանդակուած ու ձուլածոյ կուռք շինեց, եւ անոնք Միքայի տունը ³դրուեցան։

Այս մարդը՝ Միքա աստուածներու տուն մը ունեցաւ, ⁴եփուտ եւ ⁵ընտանեկան կուռքեր՝՝ շինեց, ու իր որդիներէն մէկը նուիրեց, որ իր քահանան եղաւ։

Այդ օրերը Իսրայէլի մէջ թագաւոր չկար. իւրաքանչիւրը իր աչքերուն ուղիղ եղածը կ’ընէր։

Յուդայի գերդաստանէն եւ Յուդայի Բեթլեհէմէն երիտասարդ մը կար. ինք Ղեւտացի էր, ու հոն պանդխտացած էր։

Այս մարդը Յուդայի Բեթլեհէմէն գնաց՝ որպէսզի ապրուստ գտած տեղը պանդխտանայ, ու ճամբորդելով՝ մինչեւ Եփրեմի լեռնակողմը, Միքայի տունը հասաւ։

Միքա իրեն ըսաւ. «Ուրկէ՞ կու գաս»։ Ինք ալ անոր ըսաւ. «Ես Ղեւտացի եմ, Յուդայի Բեթլեհէմէն կու գամ, եւ ապրուստ գտած տեղս պանդխտանալու կ’երթամ»։

Միքա իրեն ըսաւ. «Իմ քո՛վս բնակէ, ինծի հա՛յր ու քահանա՛յ եղիր, եւ քեզի ամէն տարի տասը կտոր արծաթ, ձեռք մը փոխելիք հագուստ ու ապրուստդ կու տամ»։

Ղեւտացին գնաց։ Յետոյ Ղեւտացին հաւանեցաւ այդ մարդուն հետ բնակիլ, եւ այս երիտասարդը անոր որդիներէն մէկուն պէս եղաւ անոր։

Միքա Ղեւտացին նուիրեց, ու երիտասարդը անոր քահանան եղաւ եւ Միքայի տունը ⁶բնակեցաւ։

Միքա ըսաւ. «Հիմա լաւ գիտեմ թէ Տէրը ինծի բարիք պիտի ընէ, որովհետեւ Ղեւտացի մը ունիմ իբր քահանայ»։