Judges 18

Joshua  «  Judges 17  ‹  Judges 18  ›  Judges 19  »  Ruth

ՄԻՔԱ ԵՒ ԴԱՆԻ ՏՈՀՄԸ

Այդ օրերը Իսրայէլի մէջ թագաւոր չկար. այդ օրերը Դանի տոհմը իրեն ժառանգութիւն մը կը փնտռէր՝ բնակելու համար, քանի որ մինչեւ այդ օրը՝ անոր բաւական ժառանգութիւն վիճակուած չէր Իսրայէլի տոհմերուն մէջ։

Դանի որդիները իրենց գերդաստանէն եւ իրենց ¹մէջէն՝ Սարաայէն ու Եսթաւուղէն՝ հինգ ²կտրիճ մարդ ղրկեցին, որպէսզի երկիրը լրտեսեն եւ հետազօտեն։ Անոնց ըսին. «Գացէ՛ք, երկիրը հետազօտեցէ՛ք»։ Անոնք Եփրեմի լեռնակողմը՝ Միքայի տունը հասան, ու հոն գիշերեցին։

Երբ անոնք Միքայի տան քով էին, Ղեւտացի երիտասարդին ձայնը ճանչցան. ուստի դէպի հոն ³ուղղուեցան եւ ըսին. «Ո՞վ քեզ հոս բերաւ. դուն հոս ի՞նչ կ’ընես. ⁴ինչո՞ւ հոս կեցած ես՝՝»։

Ինք ալ անոնց ըսաւ. «Միքա ինծի այսպէս եւ այսպէս ըրաւ, ու զիս վարձեց՝ որպէսզի իրեն քահանայ ըլլամ»։

Անոր ըսին. «Այժմ Աստուծո՛յ հարցուր, որպէսզի գիտնանք թէ արդեօք մեր գացած ճամբային մէջ պիտի յաջողի՛նք»։

Քահանան անոնց ըսաւ. «Խաղաղութեա՛մբ գացէք. ձեր երթալիք ճամբան Տէրոջ առջեւ հաճելի է»։

Այս հինգ մարդիկը գացին, Լայիս հասան, եւ անոր մէջ եղող ժողովուրդը տեսան. անոնք Սիդոնացիներուն պէս ապահովութեան մէջ կը բնակէին, հանդարտ ու ապահով։ Այդ երկրին մէջ իշխանութեան տիրացած մէկը չկար, որ զիրենք խայտառակէր որեւէ բանով. Սիդոնացիներէն հեռու ըլլալով՝ ո՛չ մէկ մարդու հետ ⁵գործ ունէին։

Այս հինգ մարդիկը Սարաա եւ Եսթաւուղ ⁶վերադարձան՝ իրենց եղբայրներուն. անոնց եղբայրները իրենց ըսին. «Դուք ի՞նչ լուր բերիք»։

Իրենք ալ ըսին. «Կանգնի՛նք ու բարձրանա՛նք անոնց դէմ, քանի որ մենք երկիրը տեսանք, ահա՛ շատ լաւ է. իսկ դուք հանդա՞րտ կը կենաք։ Երթալու, մտնելու եւ երկրին տիրանալու համար ծոյլ մի՛ ըլլաք։

Երբ հոն երթաք, ապահով ժողովուրդի մը քով պիտի հասնիք, որովհետեւ Աստուած զայն ձեր ձեռքը մատնած է։ Երկիրը շատ ընդարձակ է. այնպիսի տեղ մըն է, ուր երկրի վրայ եղող բոլոր բաներէն ոչինչ կը պակսի»։

Անկէ, այսինքն՝ Սարաայէն ու Եսթաւուղէն, Դանի գերդաստանէն վեց հարիւր մարդիկ գացին, իրենց պատերազմական զէնքերով գօտեւորուած։

Բարձրացան եւ Յուդայի Կարիաթ-Յարիմը բանակեցան. հետեւաբար այդ տեղը մինչեւ այսօր ⁷Մահանէ- Դան կը կոչուի. ահա՛ ան Կարիաթ-Յարիմի ետեւն է։

Անկէ Եփրեմի լեռնակողմը անցան, ու Միքայի տունը հասան։

Լայիսի երկիրը լրտեսելու գացող այն հինգ մարդիկը իրենց եղբայրներուն ըսին. «Գիտէ՞ք թէ այս տուներուն մէջ ⁸եփուտ, ⁹ընտանեկան կուռքեր՝՝, նաեւ քանդակուած ու ¹⁰ձուլածոյ կուռք՝՝ կայ. ուստի հիմա գիտցէ՛ք թէ ի՛նչ պիտի ընէք»։

Անոնք ալ դէպի հոն ¹¹ուղղուեցան, այն Ղեւտացի երիտասարդին տունը՝ այսինքն Միքայի տունը մտան, եւ անոր ¹²որպիսութիւնը հարցուցին։

Դանի որդիներէն եղող այդ վեց հարիւր մարդիկը, իրենց պատերազմական զէնքերով գօտեւորուած, դրան մուտքը կայնեցան։

Երկիրը լրտեսելու գացող հինգ մարդիկը բարձրացան, հոն մտան եւ ¹³քանդակուած կուռքը՝՝, եփուտը, ընտանեկան կուռքերն ու ձուլածոյ կուռքը առին. իսկ քահանան դրան մուտքը կայնած էր՝ իրենց պատերազմական զէնքերով գօտեւորուած այդ վեց հարիւր մարդոց հետ։

Երբ անոնք Միքայի տունը մտան եւ քանդակուած կուռքը, եփուտը, ընտանեկան կուռքերն ու ձուլածոյ կուռքը առին, քահանան անոնց ըսաւ. «Ի՞նչ կ’ընէք»

Անոնք ալ անոր ըսին. «Լռէ՛, ձեռքդ բերանի՛դ վրայ դիր, մեզի՛ հետ եկուր, եւ մեզի՛ հայր ու քահանայ եղիր։ Քեզի աւելի լաւ է մէ՞կ մարդու տան քահանայ ըլլալ, թէ Իսրայէլի մէկ տոհմին ու մէկ գերդաստանին քահանայ ըլլալ»։

Քահանային սիրտը զուարթանալով՝ եփուտը, ընտանեկան կուռքերը եւ քանդակուած կուռքը առաւ, ու ժողովուրդին մէջ մտաւ։

Անոնք դարձան ու գացին, իրենց առջեւ դնելով մանուկները, խաշինքն ու ¹⁴պատուական բաները։

Երբ անոնք Միքայի տունէն հեռացան, Միքայի տան մօտ եղող տուներուն մարդիկը ¹⁵կանչուեցան եւ Դանի որդիներուն ետեւէն հասան։

Երբ Դանի որդիներուն պոռացին, անոնք իրենց երեսը դարձուցին ու Միքայի ըսին. «Քեզի ի՞նչ եղաւ, որ այսպէս ¹⁶բազմութեամբ կու գաս՝՝»։

Ան ալ ըսաւ. «Իմ շինած աստուածներս եւ քահանան առած էք ու կ’երթաք, ա՛լ ինծի ի՞նչ կը մնայ. եւ ի՞նչպէս ինծի կ’ըսէք. “Քեզի ի՞նչ եղաւ”»։

Դանի որդիները անոր ըսին. «Մեր մէջ քու ձայնդ թող չլսուի, որ դառնահոգի մարդիկ վրադ չյարձակին, ու քու ¹⁷կեանքդ եւ ընտանիքիդ կեանքը ¹⁸չկորսնցնես»։

Դանի որդիները իրենց ճամբան գացին։ Միքա, տեսնելով թէ անոնք իրմէ ուժեղ են, դարձաւ ու իր տունը ¹⁹գնաց։

Անոնք Միքայի շինածները եւ անոր քահանան առին ու Լայիս հասան, հանդարտ եւ ապահով ժողովուրդի մը վրայ. զանոնք սուրի բերանէ անցուցին, ու քաղաքը կրակով այրեցին։

Զայն ազատող մը չկար, քանի որ Սիդոնէն հեռու էր եւ ո՛չ մէկ մարդու հետ գործ ունէին. ան Բեթրոհոբի հովիտին մէջ էր։ Քաղաքը կառուցանեցին եւ անոր մէջ բնակեցան։

Քաղաքին անունը իրենց հօր՝ Իսրայէլեան Դանի անունով Դան կոչեցին. բայց քաղաքին անունը նախապէս Լայիս էր։

Դանի որդիները իրենց համար կանգնեցուցին քանդակուած կուռքը. ու ²⁰Մանասէի որդիին՝ Գերսոնի որդին Յովնաթան, ինք եւ իր որդիները, մինչեւ երկրին տարագրութեան օրը՝ Դանի տոհմին քահանաները եղան։

Անոնք իրենց համար դրին Միքայի քանդակուած կուռքը՝ որ ինք շիներ էր, որքան ժամանակ որ Աստուծոյ տունը Սելովի մէջ էր։