Numbers 8

Leviticus  «  Numbers 7  ‹  Numbers 8  ›  Numbers 9  »  Deuteronomy

ԼԱՊՏԵՐՆԵՐՈՒՆ ԶԵՏԵՂՈՒՄԸ

Տէրը խօսեցաւ Մովսէսի՝ ըսելով.

«Խօսէ՛ Ահարոնի ու ըսէ՛ անոր. “Երբ ճրագները վառես, եօթը ճրագները աշտանակին առջե՛ւը թող լուսաւորեն”»։

Ահարոն այնպէս ըրաւ. անոր ճրագները աշտանակին առջեւի կողմը վառեց, ինչպէս Տէրը Մովսէսի պատուիրեր էր։

Աշտանակը սա՛պէս շինուած էր. ¹կռածոյ ոսկիէ էր, իր բունէն մինչեւ իր ծաղիկները՝ կռածոյ էր։ Տէրոջ Մովսէսի ցոյց տուած ²կերպարին համաձայն շինեց աշտանակը։

ՂԵՒՏԱՑԻՆԵՐՈՒՆ ՍՐԲԱԳՈՐԾՈՒՄԸ ԵՒ ՆՈՒԻՐԱԳՈՐԾՈՒՄԸ

Տէրը խօսեցաւ Մովսէսի՝ ըսելով.

«Իսրայէլի որդիներուն մէջէն ա՛ռ Ղեւտացիները ու մաքրէ՛ զանոնք։

Զանոնք մաքրելու համար սա՛ ըրէ անոնց.— ³մաքրութեա՛ն ջուր սրսկէ անոնց վրայ, եւ անոնք իրենց ամբողջ մարմինը թող ածիլեն, իրենց հագուստները լուան ու մաքրուին։

Յետոյ արջառներէն զուարակ մը թող առնեն, եւ անոր հացի ընծային համար՝ իւղով շաղուած նաշիհ. դուն ալ արջառներէն ուրի՛շ զուարակ մը առ՝ մեղքի պատարագի համար։

Ղեւտացիները Հանդիպումի վրանին առջեւ մօտեցո՛ւր, ու Իսրայէլի որդիներուն ամբողջ համայնքը համախմբէ՛։

Ղեւտացիները Տէրո՛ջ առջեւ մօտեցուր, եւ Իսրայէլի որդիները իրենց ձեռքերը թող դնեն Ղեւտացիներուն վրայ։

Իսկ Ահարոն Ղեւտացիները իբր երերցնելիք ընծայ թող ⁴մատուցանէ՝՝ Տէրոջ առջեւ՝ Իսրայէլի որդիներուն կողմէն, որպէսզի անոնք Տէրոջ պաշտամունքը կատարեն։

Ղեւտացիները իրենց ձեռքերը թող դնեն զուարակներուն գլուխին վրայ, ու Ղեւտացիներուն քաւութիւն ընելու համար՝ մէկ զուարակը մատուցանէ՛ Տէրոջ իբր մեղքի պատարագ, իսկ միւսը՝ իբր ողջակէզ։

Ղեւտացիները կայնեցո՛ւր Ահարոնի եւ անոր որդիներուն առջեւ, ու զանոնք մատուցանէ՛ Տէրոջ իբր երերցնելիք ընծայ։

Այսպէս զատէ՛ Ղեւտացիները Իսրայէլի որդիներուն մէջէն, որպէսզի Ղեւտացիները իմս ըլլան։

Ատկէ՛ ետք Ղեւտացիները թող մտնեն՝ Հանդիպումի վրանին ծառայութիւնը ընելու։ Այսպէս մաքրէ՛ զանոնք եւ մատուցանէ՛ զանոնք իբր երերցնելիք ընծայ,

քանի որ անոնք ամբողջութեամբ ինծի տրուած են Իսրայէլի որդիներուն մէջէն։ Ինծի առի զանոնք՝ Իսրայէլի որդիներուն մէջ արգանդ բացող բոլոր անդրանիկներուն տեղը,

որովհետեւ Իսրայէլի որդիներուն բոլոր անդրանիկները, թէ՛ մարդու եւ թէ՛ անասունի, իմս են. Եգիպտոսի երկրին մէջ բոլոր անդրանիկները զարկած օրս՝ զանոնք սրբացուցի ինծի համար։

Իսրայէլի որդիներուն բոլոր անդրանիկներուն փոխարէն Ղեւտացիները առի,

ու Իսրայէլի որդիներուն մէջէն Ղեւտացիները ⁵ամբողջութեամբ տուի Ահարոնի եւ անոր որդիներուն, որպէսզի Հանդիպումի վրանին մէջ Իսրայէլի որդիներուն ծառայութիւնը ընեն ու Իսրայէլի որդիներուն համար քաւութիւն ընեն, որպէսզի Իսրայէլի որդիներուն վրայ հարուած չգայ՝ երբ Իսրայէլի որդիները սրբարանին մօտենան»։

Մովսէս, Ահարոն եւ Իսրայէլի որդիներուն ամբողջ համայնքը Ղեւտացիներուն ըրին Տէրոջ Մովսէսի բոլոր պատուիրածները՝ Ղեւտացիներուն մասին. Իսրայէլի որդիները այնպէս ըրին անոնց։

Ղեւտացիները ⁶մաքրուեցան ու իրենց հագուստները լուացին. Ահարոն ալ զանոնք իբր երերցնելիք ընծայ մատուցանեց Տէրոջ առջեւ։ Ահարոն անոնց համար քաւութիւն ըրաւ՝ որպէսզի զանոնք մաքրէ,

եւ ատկէ ետք Ղեւտացիները Հանդիպումի վրանը մտան՝ իրենց ծառայութիւնը ընելու Ահարոնի ու անոր որդիներուն առջեւ։ Ինչպէս Տէրը Մովսէսի պատուիրեր էր Ղեւտացիներուն մասին՝ ա՛յնպէս ըրին անոնց։

Տէրը խօսեցաւ Մովսէսի՝ ըսելով.

«Ահա՛ւասիկ Ղեւտացիներուն կանոնը.— քսանհինգ տարեկանէն վեր եղողները սպասարկութեան մէջ թող մտնեն՝ Հանդիպումի վրանին մէջ ծառայելու համար,

իսկ յիսուն տարեկան ըլլալէ ետք սպասարկութենէն թող դադրին, եւ ա՛լ թող չծառայեն։

Իրենց եղբայրներուն հետ թող պաշտօն կատարեն Հանդիպումի վրանին մէջ՝ ⁷պաշտամունքին համար, բայց թող ծառայութիւն չընեն։ Ա՛յսպէս ըրէ Ղեւտացիներուն՝ իրենց ⁸պաշտօնին համար»։