1 Chronicles 14
2 Kings « 1 Chronicles 13 ‹ 1 Chronicles 14 › 1 Chronicles 15 » 2 Chronicles
ԴԱՒԻԹԻ ԳՈՐԾՈՒՆԷՈՒԹԻՒՆԸ ԵՐՈՒՍԱՂԷՄԻ ՄԷՋ (Բ. Թագ. 5. 11-16)
1Տիւրոսի Քիրամ թագաւորը Դաւիթի պատգամաւորներ ղրկեց, նաեւ մայրիի փայտեր, 1որմնադիրներ ու հիւսներ, որպէսզի անոր տունը կառուցանեն։
2Այն ատեն Դաւիթ գիտցաւ թէ Տէրը զինք Իսրայէլի վրայ թագաւոր հաստատած է. արդարեւ իր ժողովուրդին՝ Իսրայէլի համար անոր թագաւորութիւնը բարձրացաւ։
3Դաւիթ Երուսաղէմի մէջ ուրիշ կիներ ալ առաւ։ Դաւիթ ուրիշ որդիներ եւ աղջիկներ ալ ծնաւ։
4Ահա՛ւասիկ Երուսաղէմի մէջ անոր 2ծնած զաւակներուն անունները.— Սամաա, Սովբաբ, Նաթան,
5Սողոմոն, Յեբաար, Եղիսուա,
6Եղփաղէտ, Նոքա, Նափեկ,
7Յափիէ, Եղիսամա, Բաղիադա, Եղիփաղէտ։
ՅԱՂԹԱՆԱԿ՝ ՓՂՇՏԱՑԻՆԵՐՈՒՆ ՎՐԱՅ (Բ. Թագ. 5. 17-25)
8Երբ Փղշտացիները լսեցին Դաւիթի թագաւոր օծուիլը ամբողջ Իսրայէլի վրայ, բոլոր Փղշտացիները բարձրացան՝ որպէսզի Դաւիթը փնտռեն։ Ասիկա լսելով՝ Դաւիթ դուրս ելաւ, անոնց դիմաց։
9Փղշտացիները եկան եւ Ռափայիններու հովիտին մէջ տարածուեցան։
10Դաւիթ Աստուծոյ հարցուց. «Փղշտացիներուն դէմ բարձրանա՞մ, զանոնք իմ ձեռքս պիտի մատնե՞ս»։ Տէրը անոր ըսաւ. «Բարձրացի՛ր, զանոնք քու ձեռքդ պիտի մատնեմ»։
11Անոնք Բահաղ-Փարասին բարձրացան, ու Դաւիթ զանոնք հոն զարկաւ։ Դաւիթ ըսաւ. «Աստուած թշնամիներս իմ ձեռքովս պատռտեց, ինչպէս ջուրերը թումբերը կը պատռտեն»։ Հետեւաբար այդ տեղին անունը 3Բահաղ-Փարասին կոչեցին։
12Փղշտացիները հոն լքեցին իրենց աստուածները. Դաւիթ ալ հրամայեց որ զանոնք կրակով այրեն։
13Փղշտացիները 4վերստին հովիտին մէջ տարածուեցան։
14Դաւիթ անգա՛մ մըն ալ Աստուծոյ հարցուց, եւ Աստուած անոր ըսաւ. «Անոնց ետեւէն մի՛ բարձրանար. հապա անոնց շուրջը դառնալով՝ թթենիներո՛ւն դիմաց անոնց դէմ գնա։
15Երբ թթենիներուն գագաթը քալուածքի ձայն մը լսես, ա՛յն ատեն դուրս ելիր՝ պատերազմելու, քանի որ Աստուած քու առջեւէդ դուրս ելած պիտի ըլլայ՝ Փղշտացիներուն բանակը զարնելու համար»։
16Ուստի Դաւիթ այնպէս ըրաւ, ինչպէս Աստուած իրեն հրամայեց, ու Փղշտացիներուն բանակը զարկին՝ Գաբաւոնէն մինչեւ Գազեր։
17Դաւիթի համբաւը բոլոր երկիրներուն մէջ տարածուեցաւ. Տէրը բոլոր ազգերուն վրայ անոր երկիւղը 5ձգեց։