1 Chronicles 17
2 Kings « 1 Chronicles 16 ‹ 1 Chronicles 17 › 1 Chronicles 18 » 2 Chronicles
ՆԱԹԱՆԻ ՊԱՏԳԱՄԸ ԴԱՒԻԹԻ (Բ. Թագ. 7. 1-17)
1Երբ Դաւիթ իր տունը բնակեցաւ, Դաւիթ Նաթան մարգարէին ըսաւ. «Ահա՛ ես մայրիի փայտէ շինուած տան մը մէջ կը բնակիմ, բայց Տէրոջ ուխտին տապանակը 1վրանի տակ է»։
2Նաթան Դաւիթի պատասխանեց. «Սիրտիդ մէջ եղած ամէ՛ն ինչ ըրէ, քանի Աստուած քեզի հետ է»։
3Նոյն գիշերը 2Աստուած խօսեցաւ՝՝ Նաթանի՝ ըսելով.
4«Գնա՛, իմ ծառայիս՝ Դաւիթի ըսէ՛. “Տէրը սա՛ կը յայտարարէ. "Դուն ինծի տուն պիտի չկառուցանես, որ մէջը բնակիմ։
5Արդարեւ Իսրայէլը Եգիպտոսէն բարձրացուցած օրէս մինչեւ այսօր տան մէջ չբնակեցայ, հապա վրանէ վրան 3շրջեցայ, ու խորանէ խորան։
6Ամէն ուր որ շրջեցայ ամբողջ Իսրայէլի հետ, միթէ խօսք մը ըսի՞ Իսրայէլի դատաւորներէն մէկուն, որոնց պատուիրեր էի իմ ժողովուրդս հովուել. արդեօք ըսի՞. «Ինչո՞ւ ինծի մայրիի փայտէ տուն մը չկառուցանեցիք»"”։
7Հիմա իմ ծառայիս՝ Դաւիթի սա՛ ըսէ. “Զօրքերու Տէրը սա՛ կը յայտարարէ. "Ե՛ս քեզ արօտավայրէն՝ ոչխարներու ետեւէն առի, որպէսզի իմ ժողովուրդիս՝ Իսրայէլի վրայ առաջնորդ ըլլաս։
8Ո՛ւր որ կ’երթայիր՝ քեզի հետ էի. քու առջեւէդ բոլոր թշնամիներդ կոտորեցի, ու երկրի վրայ եղող մեծերուն անունին պէս ըրի քու անունդ։
9Իմ ժողովուրդիս՝ Իսրայէլի ալ տեղ մը պիտի որոշեմ ու զայն պիտի տնկեմ, որ իր տեղը բնակի եւ ա՛լ չսասանի։ Անիրաւութեան որդիները առաջուան պէս անգա՛մ մըն ալ պիտի չսպառեն զայն,
10ինչպէս իմ ժողովուրդիս՝ Իսրայէլի վրայ դատաւորներ 4նշանակած օրէս ի վեր եղաւ։ Քու բոլոր թշնամիներդ պիտի ընկճեմ, ու քեզի կ’իմացնեմ թէ Տէ՛րը քեզի տուն պիտի կառուցանէ։
11Երբ քու օրերդ լրանան եւ հայրերուդ քով երթաս, քեզմէ ետք զարմդ պիտի բարձրացնեմ, քու որդիներէդ մէկը, ու անոր թագաւորութիւն պիտի հաստատեմ։
12Անիկա՛ ինծի տուն պիտի կառուցանէ, եւ անոր գահը յաւիտեան պիտի հաստատեմ.
13Ես անոր հայր պիտի ըլլամ, ան ալ ինծի որդի պիտի ըլլայ. իմ կարեկցութիւնս անկէ պիտի չհեռացնեմ, ինչպէս քեզմէ առաջ եղողէն հեռացուցի։
14Զայն յաւիտեան իմ տանս մէջ ու իմ թագաւորութեանս մէջ պիտի 5հաստատեմ, եւ անոր գահը յաւիտեան անշարժ պիտի ըլլայ"”»։
15Նաթան այս բոլոր խօսքերուն եւ այս ամբողջ տեսիլքին համաձայն խօսեցաւ Դաւիթի։
ԴԱՒԻԹԻ ՇՆՈՐՀԱԿԱԼՈՒԹԵԱՆ ԱՂՕԹՔԸ (Բ. Թագ. 7. 18-29)
16Դաւիթ թագաւորը գնաց, Տէրոջ ներկայացաւ եւ ըսաւ. «Ո՛վ Տէր Աստուած, ես ո՞վ եմ ու իմ տունս ի՞նչ է, որ զիս մինչեւ հոս բերիր։
17Սակայն ասիկա քու աչքերուդ պզտիկ 6երեւցաւ, ո՛վ Աստուած, եւ քու ծառայիդ տան մասին հեռաւոր ժամանակի համար խօսեցար. ինծի նայեցար, ո՛վ Տէր Աստուած, որպէս թէ բարձր աստիճանի մարդու։
18Դաւիթ աւելի ի՞նչ ըսէ քեզի՝ ծառայիդ տրուած փառքին համար. որովհետեւ դուն ծառադ կը ճանչնաս։
19Ո՛վ Տէր, քու ծառայիդ սիրոյն համար ու քու սիրտիդ փափաքին համաձայն այս բոլոր մեծագործութիւնները կատարեցիր, որպէսզի այս բոլոր մեծագործութիւնները գիտցնես։
20Ո՛վ Տէր, ո՛չ մէկը քեզի նման է, եւ քեզմէ զատ ուրիշ Աստուած չկայ՝ մեր ականջներով մեր բոլոր լսածներուն համաձայն։
21Ո՞ր ազգը երկրի վրայ քու ժողովուրդիդ՝ Իսրայէլի նման է, որուն համար նոյնինքն Աստուած եկաւ զայն փրկելու՝ որպէսզի իրեն ժողովուրդ ընէ. Եգիպտոսէն ազատած ժողովուրդիդ առջեւէն ազգեր վռնտելով՝ քեզի մեծ ու ահաւոր անուն ստացար,
22քու ժողովուրդդ՝ Իսրայէլը յաւիտեան քեզի ժողովուրդ ըրիր, եւ դուն, ո՛վ Տէր, անոնց Աստուածը եղար։
23Ուստի հիմա, ո՛վ Տէր, քու ծառայիդ մասին ու անոր տան մասին ըսած խօսքդ թող յաւիտեան հաստատուի, եւ ըրէ՛ ինչպէս ըսիր։
24Թող հաստատուի, որ քու անունդ յաւիտեան մեծնայ, ու ըսեն. “Զօրքերու Տէրը, Իսրայէլի Աստուածը, Իսրայէլի համար Աստուած է”. եւ քու ծառայիդ՝ Դաւիթի տունը քու առջեւդ անշարժ մնայ։
25Արդարեւ դո՛ւն, ո՛վ իմ Աստուածս, քու ծառայիդ 7յայտնեցիր թէ անոր տուն պիտի կառուցանես. հետեւաբար ծառադ իր սիրտին մէջ համարձակութիւն գտաւ քու առջեւդ այսպէս աղօթելու։
26Եւ հիմա, ո՛վ Տէր, դո՛ւն ես այդ Աստուածը, ու դո՛ւն ծառայիդ խոստացար այս բարիքը։
27Ուստի հիմա բարեհաճէ՛ ծառայիդ տունը օրհնել, որպէսզի յաւիտեան քու առջեւդ ըլլայ. արդարեւ դո՛ւն օրհնեցիր, ո՛վ Տէր, ու յաւիտեան օրհնեալ պիտի ըլլայ»։