1 Chronicles 18

2 Kings  «  1 Chronicles 17  ‹  1 Chronicles 18  ›  1 Chronicles 19  »  2 Chronicles

ԴԱՒԻԹԻ ԶԻՆՈՒՈՐԱԿԱՆ ՅԱՂԹԱՆԱԿՆԵՐԸ (Բ. Թագ. 8. 1-18)

Ատկէ ետք՝ Դաւիթ Փղշտացիները զարկաւ ու զանոնք ընկճեց. Գէթը եւ անոր գիւղերը Փղշտացիներուն ձեռքէն առաւ։

Յետոյ Մովաբը զարկաւ, ու Մովաբացիները Դաւիթի ¹հարկատու հպատակներ եղան՝՝։

Դաւիթ Սուբայի Ադրազար թագաւորը Եմաթի կողմերը զարկաւ, երբ Եփրատ գետին վրայ իր ²իշխանութիւնը հաստատելու կ’երթար։

Դաւիթ անկէ հազար կառք, եօթը հազար ձիաւոր եւ քսան հազար հետեւակ ³զօրք բռնեց. Դաւիթ բոլոր ⁴կառքի ձիերուն ջիղերը կտրեց, բայց անոնցմէ միայն հարիւր ձի իրեն համար պահեց՝՝։

Դամասկոսի ⁵Ասորիները Սուբայի թագաւորին՝ Ադրազարի օգնութեան ⁶հասան. բայց Դաւիթ Ասորիներէն քսաներկու հազար մարդ զարկաւ։

Դաւիթ Դամասկոսի Սուրիային մէջ պահակազօրքեր դրաւ, եւ Ասորիները Դաւիթի հարկատու հպատակներ եղան։ Դաւիթ ուր որ կ’երթար՝ Տէրը ⁷իրեն յաղթութիւն կու տար՝՝։

Դաւիթ Ադրազարի ծառաներուն վրայ եղող ոսկիէ վահանները գրաւեց, ու զանոնք Երուսաղէմ բերաւ։

Ադրազարի քաղաքներէն՝ Տեբաթէն եւ Քունէն՝ Դաւիթ յոյժ շատ պղինձ գրաւեց. Սողոմոն անկէ շինեց պղինձէ ծովը, սիւներն ու պղինձէ գործիքները։

Երբ Եմաթի թագաւորը՝ Թովու լսեց թէ Դաւիթ Սուբայի Ադրազար թագաւորին բոլոր զօրագունդերը զարկեր է,

իր որդին՝ Ադորամը Դաւիթ թագաւորին ղրկեց, որպէսզի անոր ⁸որպիսութիւնը հարցնէ եւ զինք ⁹շնորհաւորէ, Ադրազարի դէմ պատերազմելուն ու զայն զարնելուն համար. (արդարեւ Ադրազար Թովուի դէմ կը պատերազմէր.) անոր հետ ամէն տեսակ ոսկիէ, արծաթէ, պղինձէ անօթներ ալ ղրկեց։

Դաւիթ թագաւորը զանոնք ալ Տէրոջ ¹⁰ընծայեց՝ այն արծաթով ու ոսկիով միասին, որ բոլոր ազգերէն փոխադրեր էր.— Եդովմէն, Մովաբէն, Ամմոնի որդիներէն, Փղշտացիներէն եւ Ամաղէկէն։

Շարուհեայի որդին՝ Աբեսսա Աղի ձորին մէջ տասնութ հազար Եդովմայեցի զարկաւ։

Եդովմի մէջ պահակազօրքեր դրաւ, ու բոլոր Եդովմայեցիները Դաւիթի ծառայ եղան։ Դաւիթ ուր որ կ’երթար՝ Տէրը իրեն յաղթութիւն կու տար։

Դաւիթ ամբողջ Իսրայէլի վրայ թագաւորեց, ու իր ամբողջ ժողովուրդին իրաւունք եւ արդարութիւն կը կիրարկէր։

Շարուհեայի որդին՝ Յովաբ զօրքերուն վրայ նշանակուած էր. Աքիղուդի որդին՝ Յովսափատ ¹¹դիւանադպիր էր.

Աքիտովբի որդին՝ Սադովկ ու Աբիաթարի որդին՝ Աբիմելէք քահանաներ էին. Սուսա ատենադպիր էր.

Յովիադայի որդին՝ Բանեա ¹²Քերեթիներուն ու ¹³Փելեթիներուն վրայ նշանակուած էր. իսկ Դաւիթի որդիները՝ թագաւորին քով ¹⁴նախարարներ էին։