1 Chronicles 19

2 Kings  «  1 Chronicles 18  ‹  1 Chronicles 19  ›  1 Chronicles 20  »  2 Chronicles

ԴԱՒԻԹ ԿԸ ՅԱՂԹԷ ԱՄՄՈՆԱՑԻՆԵՐՈՒՆ ԵՒ ԱՍՈՐԻՆԵՐՈՒՆ (Բ. Թագ. 10. 1-19)

¹Ատկէ ետք, Ամմոնի որդիներուն թագաւորը՝ Նաաս՝ մեռաւ, եւ անոր տեղ իր որդին թագաւոր եղաւ։

Դաւիթ ըսաւ. «Նաասի որդիին՝ Անոնի հետ կարեկցութեամբ վարուիմ, քանի որ անոր հայրը ինծի հետ կարեկցութեամբ վարուեցաւ»։ Ուստի Դաւիթ պատգամաւորներ ղրկեց, որպէսզի զայն իր հօր համար մխիթարեն։ Երբ Դաւիթի ծառաները Ամմոնի որդիներուն երկիրը հասան՝ Անոնի քով, զինք մխիթարելու համար,

Ամմոնի որդիներուն իշխանաւորները Անոնի ըսին. «²Կը կարծե՞ս՝՝ թէ Դաւիթ քու հայրդ պատուելու համար քեզի մխիթարիչներ ղրկեց։ Միթէ իր ծառաները այս երկիրը հետազօտելու, կործանելու եւ լրտեսելու համար չեկա՞ն քեզի»։

Անոն ալ Դաւիթի ծառաները բռնեց, զանոնք ածիլել տուաւ, նաեւ անոնց հանդերձները կէսէն կտրել տուաւ՝ մինչեւ յետոյքը, ու այդպէս զանոնք ղրկեց։

Ոմանք գացին եւ այդ մարդոց պատահած Դաւիթի պատմեցին. ան ալ զանոնք դիմաւորելու համար մարդ ղրկեց, քանի որ այդ մարդիկը յոյժ խայտառակուած էին։ Թագաւորը ըսաւ. «Երիքո՛վ կեցէք՝ մինչեւ որ ձեր մօրուքը աճի, ու յե՛տոյ վերադարձէք»։

Ամմոնի որդիները տեսան թէ Դաւիթի ³ատելի եղան։ Ուստի Անոն եւ Ամմոնի որդիները հազար տաղանդ արծաթ ղրկեցին, որպէսզի Միջագետքէն, Մաաքայի Սուրիայէն ու Սուբայէն կառքեր եւ ձիաւորներ վարձեն։

Անոնք երեսուներկու հազար կառք վարձեցին, նաեւ Մաաքայի թագաւորը եւ անոր ժողովուրդը, որոնք եկան ու Մեդաբայի առջեւ բանակեցան։ Ամմոնի որդիներն ալ իրենց քաղաքներէն հաւաքուեցան եւ պատերազմելու եկան։

Երբ Դաւիթ ասիկա լսեց, Յովաբն ու բոլոր զօրաւոր զօրքերը ղրկեց։

Ամմոնի որդիները դուրս ելան եւ քաղաքին մուտքին առջեւ պատերազմի շարուեցան, բայց օգնութեան եկող թագաւորները դաշտին մէջ՝ զատ կեցած էին։

Երբ Յովաբ տեսաւ թէ պատերազմը առջեւէն ու ետեւէն իր վրայ կը հասնի, Իսրայէլի ամբողջ ընտրանիէն մարդիկ ընտրեց եւ Ասորիներուն դէմ պատերազմի շարեց։

Մնացած ժողովուրդն ալ իր եղբօր՝ Աբեսսայի ձեռքը յանձնեց, ու անոնք Ամմոնի որդիներուն դիմաց շարուեցան։

Ապա ըսաւ. «Եթէ Ասորիները ինծի յաղթեն՝ ⁴ինծի օգնութեա՛ն հասիր՝՝. իսկ եթէ Ամմոնի որդիները քեզի յաղթեն, ե՛ս քեզի օգնութեան պիտի հասնիմ։

⁵Քաջասի՛րտ եղիր՝՝, ու մեր ժողովուրդին համար եւ մեր Աստուծոյն քաղաքներուն համար ուժովնա՛նք. ու Տէրը ⁶իրեն հաճելի՝՝ եղածը թող ընէ»։

Յովաբ իրեն հետ եղող ժողովուրդով Ասորիներուն մօտեցաւ, որպէսզի անոնց դէմ պատերազմի, բայց անոնք իր առջեւէն փախան։

Ամմոնի որդիները, Ասորիներուն փախչիլը տեսնելով, իրե՛նք ալ իր եղբօր՝ Աբեսսայի առջեւէն փախան, եւ քաղաքը մտան։ Այն ատեն Յովաբ Երուսաղէմ եկաւ։

Երբ Ասորիները տեսան թէ Իսրայէլի առջեւ պարտուեցան, պատգամաւորներ ղրկեցին եւ Գետին միւս կողմը եղող Ասորիները ⁷ոտքի հանեցին. անոնց առջեւէն Ադրազարի զօրագլուխը՝ Սովբակ կ’երթար։

Երբ Դաւիթի պատմեցին, ամբողջ Իսրայէլը հաւաքելով՝ Յորդանանէն անցաւ, անոնց վրայ հասաւ եւ անոնց դիմաց գունդեր շարեց։ Երբ Դաւիթ Ասորիներուն դէմ պատերազմելու համար գունդեր շարեց, անոնք իրեն դէմ պատերազմեցան։

Բայց Ասորիները Իսրայէլի առջեւէն փախան։ Դաւիթ Ասորիներէն եօթը հազար կառքի զօրք ու քառասուն հազար հետեւակ ⁸զօրք ջարդեց. Սովբակ զօրագլուխն ալ մեռցուց։

Երբ Ադրազարի ծառաները տեսան թէ Իսրայէլի առջեւ պարտուեցան, Դաւիթի հետ խաղաղութիւն ըրին ու անոր հպատակեցան։ Ասորիները ատկէ ետք ա՛լ Ամմոնի որդիներուն ⁹օգնել չուզեցին։