1 Chronicles 27

2 Kings  «  1 Chronicles 26  ‹  1 Chronicles 27  ›  1 Chronicles 28  »  2 Chronicles

ԶԻՆՈՒՈՐԱԿԱՆ ԵՒ ՔԱՂԱՔԱՅԻՆ ԿԱԶՄԱԿԵՐՊՈՒԹԻՒՆ

Ահա՛ւասիկ Իսրայէլի որդիները՝ իրենց թիւով.— նահապետները, հազարապետներն ու հարիւրապետները, նաեւ իրենց ոստիկանները, որոնք իրենց բաժանմունքներուն բոլոր գործերուն մէջ թագաւորին կը սպասարկէին, ամիսէ ամիս մտնելով ու ելլելով՝ տարուան բոլոր ամիսներուն մէջ. իւրաքանչիւր բաժանմունք քսանչորս հազար մարդ ունէր։

Առաջին ամսուան համար, առաջին բաժանմունքին վրայ Զաբդիէլի որդին՝ Յեսբաամ նշանակուած էր. անոր բաժանմունքը քսանչորս հազար մարդ ունէր։

Առաջին ամսուան բոլոր սպարապետներուն գլխաւորը՝ Փարէսի որդիներէն էր։

Երկրորդ ամսուան բաժանմունքին վրայ Աքուքացի Դովդա նշանակուած էր. Մակեղոթ անոր բաժանմունքին առաջնորդն էր։ Անոր բաժանմունքն ալ քսանչորս հազար մարդ ունէր։

Երրորդ ամսուան համար, երրորդ սպարապետն էր Յովիադա աւագ քահանային որդին՝ Բանեա. անոր բաժանմունքը քսանչորս հազար մարդ ունէր։

Այս Բանեան երեսունին մէջ զօրաւոր էր, ու երեսունին վրայ նշանակուած էր։ Անոր որդին՝ Ամիզաբադ իր բաժանմունքին մէջ էր։

Չորրորդ ամսուան համար, չորրորդ սպարապետն էր Յովաբի եղբայրը՝ Ասայէլ, եւ անկէ ետք իր որդին՝ Զաբադիա. անոր բաժանմունքը քսանչորս հազար մարդ ունէր։

Հինգերորդ ամսուան համար, հինգերորդ պետն էր՝ Յեզրացի Սամաւովթ. անոր բաժանմունքը քսանչորս հազար մարդ ունէր։

Վեցերորդ ամսուան համար, վեցերորդ սպարապետն էր Թեկուացի Եկգէսի որդին՝ Իրաս. անոր բաժանմունքը քսանչորս հազար մարդ ունէր։

Եօթներորդ ամսուան համար, եօթներորդ սպարապետն էր Եփրեմի որդիներէն՝ Փելոնացի Քեղղէս. անոր բաժանմունքը քսանչորս հազար մարդ ունէր։

Ութերորդ ամսուան համար, ութերորդ սպարապետն էր Զարայեաններէն՝ Ովսացի Սովբաք. անոր բաժանմունքը քսանչորս հազար մարդ ունէր։

Իններորդ ամսուան համար, իններորդ սպարապետն էր Բենիամինեաններէն՝ Անաթովթացի Աբիեզեր. անոր բաժանմունքը քսանչորս հազար մարդ ունէր։

Տասներորդ ամսուան համար, տասներորդ սպարապետն էր Զարայեաններէն՝ Նետոփաթացի Մաարա. անոր բաժանմունքը քսանչորս հազար մարդ ունէր։

Տասնմէկերորդ ամսուան համար, տասնմէկերորդ սպարապետն էր Եփրեմի որդիներէն՝ Փարաթոնացի Բանեա. անոր բաժանմունքը քսանչորս հազար մարդ ունէր։

Տասներկրորդ ամսուան համար, տասներկրորդ սպարապետն էր Գոթոնիէլի զարմէն՝ Նետոփաթացի Ալադ. անոր բաժանմունքը քսանչորս հազար մարդ ունէր։

ԻՍՐԱՅԷԼԻ ՏՈՀՄԵՐՈՒՆ ՎԱՐՉՈՒԹԻՒՆԸ

Ահա՛ւասիկ Իսրայէլի տոհմերուն վրայ նշանակուածները.— Ռուբէնեաններուն առաջնորդն էր Զեքրիի որդին՝ Եղիազար, Շմաւոնեաններունը՝ Մաաքայի որդին՝ Սափատիա,

Ղեւտացիներունը՝ Կամուէլի որդին՝ Ասաբիա, Ահարոնեաններունը՝ Սադովկ,

Յուդայինը՝ Դաւիթի եղբայրներէն ¹Եղիուս, Իսաքարինը՝ Միքայէլի որդին՝ Ամրի,

Զաբուղոնինը՝ Աբդիայի որդին՝ Իսմայիա, Նեփթաղիմինը՝ Եզրիէլի որդին՝ Յերիմովթ,

Եփրեմի որդիներունը՝ Ազազիայի որդին՝ Ովսէէ, Մանասէի կէս տոհմինը՝ Փադայիայի որդին՝ Յովէլ,

Գաղաադ եղող Մանասէի կէս տոհմինը՝ Զաքարիայի որդին՝ Յեդդով, Բենիամինինը՝ Աբենների որդին՝ Յեսիէլ,

Դանինը՝ Յերոհամի որդին՝ Ազարիէլ։ Ասո՛նք էին Իսրայէլի տոհմապետները։

Դաւիթ քսան տարեկանէն վար եղողները չթուարկեց, որովհետեւ Տէրը ըսեր էր թէ Իսրայէլը երկինքի աստղերուն չափ պիտի շատցնէ։

Շարուհեայի որդին՝ Յովաբ սկսաւ համրել, բայց չաւարտեց, քանի որ ատոր համար Իսրայէլի վրայ զայրոյթ եղաւ. այդ թուարկումը Դաւիթ թագաւորին Ժամանակագրութեան գիրքին թուարկումներուն մէջ չմտաւ։

ԹԱԳԱՒՈՐԱԿԱՆ ԿԱԼՈՒԱԾՆԵՐՈՒ ՎԱՐՉՈՒԹԻՒՆԸ

Թագաւորին գանձերուն վրայ Ադիէլի որդին Ազամօթ նշանակուած էր։ Դաշտին, քաղաքներուն, գիւղերուն եւ աշտարակներուն մէջ եղող շտեմարաններուն վրայ՝ Ոզիայի որդին՝ Յովնաթան։

²Արտը բանող՝՝ հողամշակներուն վրայ՝ Քեղուբի որդին՝ Եզրի։

Այգիներուն վրայ՝ Արիմաթացի Սեմէի. այգիներու ³բերքերուն ու գինիի շտեմարաններուն վրայ՝ Սեփամացի Զաբդի։

Դաշտագետինի մէջ եղող ձիթենիներուն եւ ժանտաթզենիներուն վրայ՝ Գադերացի Բահաղանան. իւղի շտեմարաններուն վրայ՝ Յովաս։

Սարոնի մէջ արածող արջառներուն վրայ՝ Սարոնացի Սետրա. հովիտներու մէջ եղող արջառներուն վրայ՝ Ադղիի որդին՝ Սափատ։

Ուղտերուն վրայ՝ Իսմայելացի Ոբիլ. էշերուն վրայ՝ Մերոնոթացի Յադայիա.

հօտերուն վրայ՝ Հագարացի Յազիզ։ Ասոնք բոլորը Դաւիթ թագաւորին ինչքին վերահսկիչներն էին։

ԴԱՒԻԹԻ ԱՆՁՆԱԿԱՆ ԽՈՐՀՐԴԱԿԱՆՆԵՐԸ

Դաւիթի հօրեղբայրը՝ Յովնաթան խորհրդական էր. ան խելացի մարդ էր, եւ ատենադպիր։ Հաքեմոնիի որդին՝ Յեքիէլ թագաւորին որդիներուն հետ էր։

Աքիտոփէլ թագաւորին խորհրդականն էր, եւ Արաքացի Քուսի՝ թագաւորին բարեկամը։

Աքիտոփէլէն ետք, Բանեայի որդին՝ Յովիադա, եւ Աբիաթար խորհրդական եղան։ Յովաբ թագաւորին սպարապետն էր։