1 Chronicles 29

2 Kings  «  1 Chronicles 28  ‹  1 Chronicles 29  ›  2 Chronicles 1  »  2 Chronicles

ՏԱՃԱՐԻՆ ՇԻՆՈՒԹԵԱՆ ՀԱՄԱՐ ՆՈՒԷՐՆԵՐ

Դաւիթ թագաւորը ամբողջ համախմբումին ըսաւ. «Իմ որդիս՝ Սողոմոն, միակը՝ որ Աստուած ընտրեց, փափուկ տղայ մըն է, իսկ գործը մեծ է. արդարեւ այս պալատը մարդու համար չէ, հապա Տէրոջ՝ Աստուծոյ համար է։

Ուստի ես՝ իմ Աստուծոյս տան համար՝ ամբողջ կարողութեամբս պատրաստեցի ոսկեղէններուն համար՝ ոսկի, արծաթեղէններուն համար՝ արծաթ, պղնձեղէններուն համար՝ պղինձ, երկաթեղէններուն համար՝ երկաթ, փայտեղէններուն համար՝ փայտ, նաեւ եղնգնաքարեր, ագուցանուելիք քարեր, ¹երանգաւոր քարեր, գոյնզգոյն քարեր, ամէն տեսակ պատուական քարեր, եւ առատ մարմար քար։

Նաեւ իմ Աստուծոյս տան վրայ մեծ սէր ունենալով՝ իմ յատուկ գանձիս մէջ եղած ոսկին ու արծաթն ալ իմ Աստուծոյս տան համար տուի, սրբարանին տան համար բոլոր պատրաստածներէս զատ.—

ոփիրի ոսկիէն՝ երեք հազար տաղանդ ոսկի, եւ եօթը հազար տաղանդ զուտ արծաթ՝ որպէսզի անոնցմով տուներուն որմերը պատեն։

Ոսկեղէններուն համար՝ ոսկի, արծաթեղէններուն համար՝ արծաթ, եւ արհեստաւորներու ձեռքով կատարուող ամէն տեսակ գործի համար հարկաւոր եղածը տուի։ Այսօր ձեզմէ ո՞վ յօժարակամ Տէրոջ ²կը նուիրէ՝՝»։

Այն ատեն ³նահապետները, Իսրայէլի տոհմապետները, հազարապետներն ու հարիւրապետները, եւ թագաւորին գործին վերահսկիչները յօժարակամ ընծաներ բերին,

Աստուծոյ տան ծառայութեան համար տալով հինգ հազար տաղանդ ոսկի, տասը հազար ⁴դրամ, տասը հազար տաղանդ արծաթ, տասնութ հազար տաղանդ պղինձ, եւ հարիւր հազար տաղանդ երկաթ։

Անոնք՝ որոնց քով պատուական քարեր գտնուեցան, Գերսոնացի Յեքիէլի ձեռքով Տէրոջ տան գանձարանին ⁵նուիրեցին։

Ժողովուրդը յօժարակամ ընծաներուն համար ուրախացաւ, քանի որ կատարեալ սիրտով՝ յօժարակամ ընծայեցին Տէրոջ։ Դաւիթ թագաւորն ալ մեծապէս ուրախացաւ։

ԴԱՒԻԹ ԿԸ ՓԱՌԱԲԱՆԷ ԱՍՏՈՒԱԾ

Դաւիթ ամբողջ համախմբումին աչքին առջեւ Տէրը օրհնեց ու ըսաւ. «Ո՛վ Տէր, մեր հօր՝ Իսրայէլի Աստուածը, ⁶դարէ դար՝՝ օրհնեա՜լ ես։

Ո՛վ Տէր, մեծութիւնը, զօրութիւնը, շքեղութիւնը, յաղթութիւնը եւ փառաւորութիւնը քո՛ւկդ են. արդարեւ երկինքի մէջ ու երկրի վրայ եղած ամէն ինչ քուկդ է։ Ո՛վ Տէր, թագաւորութիւնը քո՛ւկդ է, եւ դուն բոլորի՛ն վրայ բարձրացած ես իբր գլուխ։

Հարստութիւնն ու փառքը քեզմէ՛ են, եւ բոլորը դո՛ւն կը կառավարես։ Կարողութիւնն ու զօրութիւնը քո՛ւ ձեռքիդ մէջ են. ամէն ինչ մեծցնելը եւ ուժովցնելը քո՛ւ ձեռքդ է։

Ուստի հիմա, ո՛վ մեր Աստուածը, քեզմէ շնորհակալ կ’ըլլանք ու քու պանծալի անունդ կը գովաբանենք։

Բայց ես ո՞վ եմ, եւ իմ ժողովուրդս ո՞վ է, որ այսպէս յօժարակամ ընծայելու կարող ըլլանք. արդարեւ ամէն բան քեզմէ՛ է, ու ⁷քուկիններէ՛դ տուինք քեզի։

Արդարեւ մենք քու առջեւդ պանդուխտներ եւ հիւրեր ենք՝ մեր բոլոր հայրերուն պէս. երկրի վրայ մեր օրերը շուքի պէս են, ու ⁸մնայուն բան՝՝ մը չկայ։

Ո՛վ Տէր, մեր Աստուածը, այս ամբողջ մթերքը՝ որ պատրաստեցինք, որպէսզի քեզի տուն մը կառուցանենք՝ քու սուրբ անունիդ համար, քո՛ւ ձեռքէդ են. բոլո՛րն ալ քուկդ են։

Նաեւ գիտեմ, ո՛վ իմ Աստուածս, որ դուն սիրտը կը քննես եւ ուղղամտութեան կը հաճիս։ Ես ուղիղ սիրտով ու յօժարակամ ընծայեցի ասոնք բոլորը. եւ հիմա ուրախութեամբ տեսայ թէ հոս գտնուող ժողովուրդդ ալ յօժարակամ կ’ընծայէ քեզի։

Ո՛վ Տէր, մեր հայրերուն՝ Աբրահամի, Իսահակի եւ Իսրայէլի Աստուածը, ասիկա յաւիտեա՛ն պահէ քու ժողովուրդիդ սիրտին մտածումներուն նպատակին մէջ, ու անոր սիրտը ⁹քեզի՛ ուղղէ՝՝։

Եւ իմ որդիիս՝ Սողոմոնի կատարեա՛լ սիրտ տուր, որպէսզի քու պատուիրաններդ, վկայութիւններդ եւ կանոններդ պահէ, բոլորը գործադրէ, ու կառուցանէ այն պալատը՝ որուն համար պատրաստութիւն տեսած եմ»։

Յետոյ Դաւիթ ամբողջ համախմբումին ըսաւ. «Հիմա օրհնեցէ՛ք Տէրը՝ ձեր Աստուածը»։ Ամբողջ համախմբումը օրհնեց Տէրը, իրենց հայրերուն Աստուածը, եւ խոնարհելով՝ Տէրոջ ու թագաւորին երկրպագեցին։

Հետեւեալ օրը զոհեր մատուցանեցին եւ ողջակէզներ զոհեցին Տէրոջ — հազար զուարակ, հազար խոյ, հազար գառ՝ անոնց թափելիք նուէրներով —, բազմաթիւ զոհեր՝ ամբողջ Իսրայէլի համար։

Այդ օրը Տէրոջ առջեւ մեծ ուրախութեամբ կերան ու խմեցին, եւ Դաւիթի որդին՝ Սողոմոնը երկրորդ անգամ թագաւոր հռչակեցին։ Զայն Տէրոջ համար առաջնորդ օծեցին, ու Սադովկը՝ քահանայ։

Սողոմոն Տէրոջ գահին վրայ բազմեցաւ իբր թագաւոր, իր հօր՝ Դաւիթի տեղ, եւ յաջողեցաւ. ամբողջ Իսրայէլը իրեն հնազանդեցաւ։

Բոլոր իշխանաւորներն ու զօրաւոր մարդիկը, նաեւ Դաւիթ թագաւորին բոլոր որդիները Սողոմոն թագաւորին ¹⁰ենթարկուեցան։

Տէրը ամբողջ Իսրայէլի ¹¹առջեւ Սողոմոնը չափազանց մեծցուց, եւ անոր այնպիսի թագաւորական փառաւորութիւն մը տուաւ՝ որ իրմէ առաջ Իսրայէլի ո՛չ մէկ թագաւորի եղած էր։

ԴԱՒԻԹԻ ԹԱԳԱՒՈՐՈՒԹԵԱՆ ԱՄՓՈՓՈՒՄԸ

Այսպէս, Յեսսէի որդին՝ Դաւիթ ամբողջ Իսրայէլի վրայ թագաւորեց։

¹²Ան քառասուն տարի թագաւորեց՝՝ Իսրայէլի վրայ. Քեբրոնի մէջ եօթը տարի թագաւորեց, ու Երուսաղէմի մէջ երեսուներեք տարի թագաւորեց։

Լա՛ւ ալեւորութեան մէջ մեռաւ, իր օրերէն, հարստութենէն եւ փառքէն կշտացած. անոր տեղ իր որդին՝ Սողոմոն թագաւորեց։

Դաւիթ թագաւորին առաջին ու վերջին արարքները ահա՛ գրուած են Սամուէլ տեսանողին ¹³Գիրքին մէջ, Նաթան մարգարէին Գիրքին մէջ եւ Գադ տեսանողին Գիրքին մէջ,

նաեւ անոր ամբողջ թագաւորութիւնն ու քաջութիւնը, եւ թէ՛ անոր, թէ՛ Իսրայէլի, թէ՛ ալ ուրիշ երկիրներու բոլոր թագաւորութիւններուն ¹⁴պատահած դէպքերը՝՝։