1 Samuel 1

Ruth  «  Ruth 4  ‹  1 Samuel 1  ›  1 Samuel 2  »  2 Samuel

ԵՂԿԱՆԱ ԵՒ ԻՐ ԸՆՏԱՆԻՔԸ ՍԵԼՈՎԻ ՄԷՋ

Եփրեմի լեռնէն՝ ¹Արիմաթէմ-Սոփիմէ Եղկանա անունով եփրաթացի մարդ մը կար, որ Սուփիի որդիին՝ Թովայի որդիին՝ Եղիուսի որդիին՝ Յերոհամի որդին էր։

Ան երկու կին ունէր. մէկուն անունը Աննա էր, ու միւսին անունը՝ Փենանա։ Փենանա զաւակներ ունէր, բայց Աննա զաւակ չունէր։

Այդ մարդը ամէն տարի իր քաղաքէն կը բարձրանար, որպէսզի Սելովի մէջ՝ զօրքերու ²Տէրոջ երկրպագութիւն ու զոհ մատուցանէ. հոն Հեղիի երկու որդիները՝ Ոփնի ու Փենեհէս՝ Տէրոջ քահանաներն էին։

Եղկանա իր զոհ մատուցանած օրը՝ իր կնոջ Փենանայի եւ անոր որդիներուն եւ աղջիկներուն մէկմէկ բաժին տուաւ.

իսկ Աննայի ³կրկին բաժին տուաւ, քանի որ Աննան կը սիրէր. բայց Տէրը անոր արգանդը գոցեր էր։

Անոր հակառակորդը՝ Փենանա՝ զայն կսկծեցնելու համար յոյժ վշտացուց, որովհետեւ Տէրը անոր արգանդը գոցեր էր։

Ամէն տարի Եղկանա այդպէս կ’ընէր, երբ Աննա Տէրոջ տունը բարձրանար. Փենանա ալ նոյնպէս Աննան կը վշտացնէր, եւ ան կու լար ու չէր ուտեր։

Անոր այրը՝ Եղկանա իրեն ըսաւ. «Աննա՛, ինչո՞ւ կու լաս, ինչո՞ւ չես ուտեր եւ ինչո՞ւ սիրտդ այդպէս տրտում է. միթէ ես քեզի տասը որդիէ աւելի լաւ չե՞մ»։

ԱՆՆԱ ԵՒ ՀԵՂԻ

Երբ Սելովի մէջ կերան ու խմեցին՝ Աննա ոտքի ելաւ, (Հեղի քահանան Տէրոջ տաճարին դրանդիներուն քով՝ աթոռի մը վրայ նստած էր,)

դառն ⁴սիրտով Տէրոջ առջեւ աղօթեց եւ յոյժ շատ լացաւ։

Ուխտ ընելով՝ ըսաւ. «Ո՛վ զօրքերու Տէր, եթէ քու աղախինիդ տառապանքին նայիս ու զիս յիշես, եւ աղախինդ չմոռնալով՝ աղախինիդ ⁵արու զաւակ մը՝՝ տաս, զայն Տէրոջ պիտի նուիրեմ իր կեանքին բոլոր օրերուն մէջ, ու անոր գլուխին վրայ ածելի պիտի ⁶չանցնի»։

Երբ ան Տէրոջ առջեւ իր աղօթքը երկարեց, Հեղի անոր բերանը դիտեց։

Աննա իր սիրտին մէջէն կը խօսէր. միայն շրթունքը կը շարժէր, բայց ձայնը չէր լսուեր. հետեւաբար Հեղի զայն գինով կարծեց։

Ուստի Հեղի անոր ըսաւ. «Մինչեւ ե՞րբ պիտի գինովնաս. ⁷հրաժարէ՛ քու գինիէդ՝՝»։

Աննա պատասխանեց. «Ո՛չ, իմ տէ՛րս. ես վշտացած սիրտով կին մըն եմ, եւ գինի կամ օղի խմած չեմ. հապա Տէրոջ առջեւ իմ ⁸սիրտս բացի՝՝։

Քու աղախինդ ⁹անօրէն կին՝՝ մի՛ կարծեր, քանի որ իմ գանգատներուս ու վիշտիս շատութեան համար մինչեւ հիմա խօսեցայ»։

Այն ատեն Հեղի պատասխանեց. «Գնա՛ խաղաղութեամբ, եւ Իսրայէլի Աստուածը քու խնդրածդ քեզի տայ, ինչ որ իրմէ խնդրեցիր»։

Ան ալ ըսաւ. «Քու ստրկուհիդ թող շնորհք գտնէ ¹⁰առջեւդ»։ Կինը իր ճամբան գնաց, ու կերաւ. երեսը անգա՛մ մըն ալ չտրտմեցաւ։

ՍԱՄՈՒԷԼԻ ԾՆՈՒՆԴԸ ԵՒ ԸՆԾԱՅՈՒՄԸ

Անոնք առտուն կանուխ ելան եւ Տէրոջ առջեւ երկրպագեցին. ապա Ռամա դարձան ու իրենց տունը գացին։ Եղկանա իր Աննա կնոջ մօտեցաւ, եւ Տէրը զայն յիշեց։

Աննա յղացաւ, ու երբ ժամանակը հասաւ՝ որդի մը ծնաւ։ Անոր անունը ¹¹Սամուէլ կոչեց՝ ըսելով. «Քանի որ զինք Տէրոջմէն խնդրեցի»։

Յետոյ անոր այրը՝ Եղկանա իր ամբողջ ընտանիքով Սելով բարձրացաւ, որպէսզի Տէրոջ առջեւ տարեկան զոհը մատուցանէ եւ իր ուխտը կատարէ։

Բայց Աննա չբարձրացաւ, որովհետեւ իր ամուսինին ըսաւ. «Երբ տղան կաթէն կտրուի՝ այն ատեն զինք պիտի տանիմ, որպէսզի Տէրոջ առջեւ երեւնայ ու միշտ հոն մնայ»։

Անոր այրը՝ Եղկանա իրեն ըսաւ. «¹²Քեզի հաճելի՝՝ եղածը ըրէ՛. մինչեւ զայն կաթէն կտրես՝ կեցի՛ր. միայն թէ Տէրը իր խօսքը հաստատէ»։ Ուստի կինը կեցաւ եւ իր որդին դիեցուց, մինչեւ որ զայն կաթէն կտրեց։

Երբ զայն կաթէն կտրեց, զինք իրեն հետ բարձրացուց, նաեւ երեք զուարակ, մէկ արդու ալիւր ու մէկ տիկ գինի. զինք Տէրոջ տունը տարաւ, որ Սելովի մէջ էր, թէեւ տղան ¹³դեռահասակ էր։

Զուարակ մը մորթեցին եւ տղան Հեղիի տարին։

Աննա ըսաւ. «Ո՜հ, իմ տէ՛րս, քու անձդ կ’ապրի՛. ես այն կինն եմ, որ հոս՝ քու քովդ կայնեցայ Տէրոջ աղօթելու համար։

Ես այս տղային համար աղօթեցի, ու Տէրը իմ խնդրանքս ինծի տուաւ, ինչ որ իրմէ խնդրեցի։

Հիմա ես ալ զայն Տէրոջ փոխ կու տամ. որքան ժամանակ որ ¹⁴ապրի, ան Տէրոջ փոխ տրուած ըլլայ»։ Եւ ան հոն Տէրոջ երկրպագեց։