1 Samuel 2

Ruth  «  1 Samuel 1  ‹  1 Samuel 2  ›  1 Samuel 3  »  2 Samuel

ԱՆՆԱՅԻ ԱՂՕԹՔԸ

Աննա աղօթեց եւ ըսաւ. «Իմ սիրտս Տէրոջմով հրճուեցաւ, Իմ եղջիւրս Տէրոջմով բարձրացաւ. Բերանս իմ թշնամիներուս վրայ ¹բացուեցաւ, Քանի որ քու փրկութեամբդ ուրախացայ։

Տէրոջ պէս սուրբ չկայ, քանի քեզմէ զատ ուրիշ մը չկայ, Ու մեր Աստուծոյն պէս վէմ չկայ։

Ա՛լ ասկէ ետք խրոխտաբար մի՛ խօսիք, Ու ձեր բերանէն անպատկառութիւն թող չելլէ. Արդարեւ Տէրը գիտութեան Աստուածն է, Եւ ի՛նք ամենուն արարքները կը կշռէ։

Զօրաւորներուն աղեղները կոտրեցան, Ու ²տկարները ոյժով գօտեւորուեցան։

Կուշտ եղողները հացի համար վարձկան եղան, Եւ անօթիները ³պակսեցան. Մինչեւ անգամ ամուլը եօթը զաւակ ծնաւ, Ու շատ զաւակ ունեցողը ուժաթափեցաւ։

Մեռցնողն ու ապրեցնողը, ⁴Դժոխքը իջեցնողն ու վեր հանողը Տէրն է։

Թշուառացնողն ու հարստացնողը, Նուաստացնողն ու բարձրացնողը Տէրն է։

Ան չքաւորը ⁵հողէն կը վերցնէ, Եւ աղքատը աղբիւսէն կը բարձրացնէ, Որպէսզի ազնուականներուն հետ նստեցնէ, Ու փառքի գահը անոնց ժառանգել տայ. Քանի որ երկրի հիմերը Տէրոջն են, Եւ երկրագունդը անոնց վրայ հաստատեց։

Ան իր բարեպաշտներուն ոտքերը կը պահպանէ, Իսկ ամբարիշտները մութին մէջ պիտի ⁶կորսուին, Որովհետեւ ո՛չ մէկը իր ոյժով կը յաղթէ։

Տէրոջ դէմ ⁷հակառակողները պիտի կոտորուին, Երկինքէն անոնց վրայ պիտի որոտայ. Տէրը երկրի ծայրերը պիտի դատէ, Իր թագաւորին ոյժ պիտի տայ, Եւ իր օծեալին եղջիւրը պիտի բարձրացնէ»։

Եղկանա Ռամա՝ իր տունը գնաց, եւ Սամուէլ ⁸մանուկը Հեղի քահանային առջեւ Տէրոջ պաշտօնը կը կատարէր։

ՀԵՂԻԻ ՈՐԴԻՆԵՐԸ

Հեղիի որդիները ⁹անօրէն մարդիկ՝՝ ըլլալով՝ Տէրը չէին ճանչնար։

Քահանաներու սովորութեան համաձայն՝ երբ ժողովուրդէն մէկը զոհ մատուցանէր, միսին եփած ատենը՝ քահանային սպասաւորը կու գար, ձեռքը երեքժանի մսահան մը առած,

զայն կաթսային, սանին, եփարանին կամ պտուկին մէջ կը խոթէր, ու մսահանը ինչ որ հանէր՝ քահանան զայն իրեն կ’առնէր։ Անոնք Սելովի մէջ բոլոր հոն եկող Իսրայելացիներուն այսպէս կ’ընէին։

Նաեւ ճարպը այրելէ առաջ՝ քահանային սպասաւորը կու գար ու ¹⁰զոհ մատուցանողին՝՝ կ’ըսէր. «Քահանային համար խորովելո՛ւ միս տուր, քանի որ ան քեզմէ խաշած միս չ’առներ, այլ հում միս կ’ուզէ»։

Եթէ այդ մարդը ըսէր. «Հիմա ճարպը թող այրեն, ու յե՛տոյ առ՝ ¹¹սիրտիդ փափաքածին չափ», այն ատեն կը պատասխանէր. «Ո՛չ, հի՛մա տուր. եթէ ոչ՝ բռնի կ’առնեմ»։

Այսպէս՝ այն երիտասարդներուն մեղքը Տէրոջ առջեւ շատ մեծ էր, որովհետեւ մարդիկ Տէրոջ զոհը կ’անարգէին։

ՍԱՄՈՒԷԼ ՍԵԼՈՎԻ ՄԷՋ

Սամուէլ մանուկը, կտաւէ ¹²եփուտը հագած՝՝, Տէրոջ առջեւ պաշտօն կը կատարէր։

Անոր մայրը պզտիկ պատմուճան մը կը շինէր անոր, եւ ամէն տարի՝ երբ իր ամուսինին հետ տարեկան զոհը ընելու կը բարձրանար, անոր կը տանէր։

Հեղի Եղկանան ու անոր կինը օրհնելով՝ ըսաւ. «Տէրը քեզի այս կնոջմէն զարմ տայ, Տէրոջ փոխ տրուած տղային տեղը». եւ անոնք իրենց տեղը գացին։

Տէրը Աննայի այցելեց, ու ան յղացաւ եւ երեք որդի ու երկու աղջիկ ծնաւ։ Սամուէլ մանուկն ալ Տէրոջ առջեւ կը մեծնար։

ՀԵՂԻ ԵՒ ԻՐ ՈՐԴԻՆԵՐԸ

Հեղի յոյժ ծերացեր էր, ու կը լսէր ամէն ինչ որ անոր որդիները կ’ընէին ամբողջ Ւսրայէլի, եւ թէ ի՛նչպէս անոնք Հանդիպումի վրանին մուտքը համախմբուող կիներուն հետ կը պառկէին։

Անոնց ըսաւ. «Ինչո՞ւ այսպիսի բաներ կ’ընէք. արդարեւ այս ամբողջ ժողովուրդին բերանէն ձեզի համար գէշ խօսքեր կը լսեմ։

Մի՛ ընէք, որդինե՛րս, քանի ¹³նպաստաւոր չեն այն լուրերը՝ որ կը լսեմ. դուք Տէրոջ ժողովուրդը կը մոլորեցնէք։

Եթէ մարդ մը մարդու դէմ մեղանչէ, Աստուած ¹⁴պիտի ըլլայ իր իրաւարարը՝՝. բայց եթէ մարդ մը Տէրոջ դէմ մեղանչէ, ¹⁵ո՞վ պիտի ըլլայ իր իրաւարարը՝՝»։ Սակայն անոնք իրենց հօր խօսքը մտիկ չէին ըներ, որովհետեւ Տէրը զանոնք մեռցնել կ’ուզէր։

Սամուէլ մանուկը օրէ օր կը մեծնար, եւ Տէրոջ ու նաեւ մարդոց ¹⁶հաճելի էր։

Աստուծոյ մարդ մը Հեղիի եկաւ եւ անոր ըսաւ. «Տէրը սա՛ կը յայտարարէ. “Քու հօրդ տան յայտնապէս երեւցայ, երբ անոնք Եգիպտոսի մէջ Փարաւոնի տան ծառայ էին։

Իսրայէլի բոլոր տոհմերէն զայն ինծի քահանայ ընտրեցի, որպէսզի իմ զոհասեղանիս վրայ զոհ մատուցանէ, խունկ ծխէ, ու իմ առջեւս եփուտ հագնի։ Իսրայէլի որդիներուն բոլոր պատարագները քու հօրդ տան տուի։

Իմ բնակավայրիս համար պատուիրած զոհերս եւ ընծաներս ինչո՞ւ կ’անարգես ու քու որդիներդ ինձմէ աւելի կը փառաւորես, որպէսզի իմ ժողովուրդիս՝ Իսրայէլի ընտիր զոհերով ձեզ գիրցնէք”։

Ասոր համար Տէրը՝ Իսրայէլի Աստուածը սա՛ կը պատգամէ. “Ի՛րապէս ըսեր էի. "Քու տունդ ու հօրդ տունը իմ առջեւս յաւիտեան պիտի ընթանան"”. բայց հիմա Տէրը կը պատգամէ. “Հեռո՛ւ ինձմէ. որովհետեւ ես զիս փառաւորողները պիտի փառաւորեմ, իսկ զիս արհամարհողները պիտի անարգուին։

Ահա՛ կու գան օրերը՝ երբ քու բազուկդ ու հօրդ տան բազուկը պիտի կտրեմ, որպէսզի տանդ մէջ ծեր չգտնուի։

Իսրայէլի ամէն տեսակ բարութիւն վայելած ատենը՝ դուն իմ բնակավայրիս մէջ ¹⁷դժբախտութիւն պիտի տեսնես, ու քու տանդ մէջ բնաւ ծեր պիտի չգտնուի։

Քու զարմէդ մնացած մարդը, որ իմ զոհասեղանէս չեմ կտրեր, աչքերդ ¹⁸նուաղեցնելու եւ անձդ վշտացնելու համար պիտի մնայ. քու տանդ բոլոր ¹⁹զաւակները ²⁰երիտասարդութեան մէջ՝՝ պիտի մեռնին։

Եւ սա՛ քեզի նշան պիտի ըլլայ, այսինքն՝ ինչ որ երկու որդիներուդ՝ Ոփնիի ու Փենեհէսի պիտի ²¹պատահի. երկուքն ալ մէկ օրուան մէջ պիտի մեռնին։

Ինծի հաւատարիմ քահանայ մը պիտի հանեմ, որ իմ սիրտիս եւ անձիս մէջ եղածը գործադրէ։ Անոր հաստատ տուն մը պիտի կառուցանեմ, ու միշտ իմ օծեալիս առջեւ պիտի ընթանայ։

Քու տունէդ ո՛վ որ մնայ, կտոր մը արծաթի համար ու նկանակ մը հացի համար պիտի գայ, անոր երկրպագէ, եւ ըսէ. "Կ’աղաչե՛մ, զիս քահանայական պաշտօնի մը վրայ ²²կարգէ, որպէսզի պատառ մը հաց ուտեմ"”»։