1 Samuel 4

Ruth  «  1 Samuel 3  ‹  1 Samuel 4  ›  1 Samuel 5  »  2 Samuel

ՈՒԽՏԻ ՏԱՊԱՆԱԿԻՆ ԳՐԱՒՈՒՄԸ

Իսրայէլ Փղշտացիներուն դէմ պատերազմելու ¹գնաց, եւ Աբենեզերի մէջ բանակեցաւ, իսկ Փղշտացիները Ափէկի մէջ բանակեցան։

Փղշտացիները Իսրայէլի դիմաց շարուեցան. երբ պատերազմը տարածուեցաւ, Իսրայէլ պարտուեցաւ Փղշտացիներուն առջեւ, որոնք ռազմադաշտին վրայ զօրասիւնէն չորս հազար մարդու չափ կոտորեցին։

Երբ ժողովուրդը բանակավայրը ²վերադարձաւ, Իսրայէլի երէցները ըսին. «Ինչո՞ւ Տէրը մեզ կոտորեց այսօր՝ Փղշտացիներուն առջեւ։ Տէրոջ ուխտին տապանակը Սելովէն մեր քով բերենք, որ մեր մէջ գտնուի ու մեզ ազատէ մեր թշնամիներուն ձեռքէն»։

Ուստի ժողովուրդը մարդիկ ղրկեց դէպի Սելով, որ քերովբէներուն վրայ բազմող զօրքերու Տէրոջ ուխտին տապանակը անկէ փոխադրեն. Հեղիի երկու որդիները՝ Ոփնի եւ Փենեհէս հոն էին, Աստուծոյ ուխտին տապանակին հետ։

Երբ Տէրոջ ուխտին տապանակը բանակավայրը հասաւ, ամբողջ Իսրայէլը մեծ գոչիւնով գոռաց, այնպէս որ գետինը դղրդաց։

Փղշտացիները այդ գոչիւնի աղմուկը լսելով՝ ըսին. «Ի՞նչ կը նշանակէ Եբրայեցիներու բանակավայրին մէջ այս մեծ գոչիւնի աղմուկը»։ Երբ հասկցան թէ Տէրոջ տապանակը բանակավայրը եկած է,

Փղշտացիները վախցան, որովհետեւ ըսին. «Աստուած բանակավայրը եկաւ»։ Նաեւ ըսին. «Վա՜յ մեզի, քանի որ ³ասկէ առաջ՝՝ այսպիսի բան եղած չէ։

Վա՜յ մեզի, ո՞վ մեզ պիտի ազատէ այս ⁴զօրաւոր աստուածներուն ձեռքէն։ Ասո՛նք են այն աստուածները, որ Եգիպտոսը ամէն տեսակ պատուհասներով զարկին՝ անապատին մէջ։

Ուժովցէ՛ք ու կտրի՛ճ եղէք, ո՛վ Փղշտացիներ, որ Եբրայեցիներուն ստրուկ չըլլաք, ինչպէս անոնք ձեզի ստրուկ եղան. ուստի կտրի՛ճ եղէք եւ անոնց դէմ պատերազմեցէ՛ք»։

Երբ Փղշտացիները պատերազմեցան, Իսրայէլ պարտուեցաւ ու ամէն մարդ իր վրանը փախաւ. շատ մեծ պարտութիւն եղաւ, եւ Իսրայէլէն երեսուն հազար հետեւակ զօրք ինկաւ.

նաեւ Աստուծոյ տապանակը գրաւուեցաւ, ու Հեղիի երկու որդիները՝ Ոփնի եւ Փենեհէս՝ մեռան։

ՀԵՂԻԻ ՄԱՀԸ

Բենիամինէն մարդ մը զօրասիւնէն վազելով՝ նոյն օրը Սելով հասաւ։ Իր վերարկուն պատռուած էր, ու գլուխին վրայ հող ցանած էր։

Երբ հոն հասաւ, ահա՛ Հեղի՝ աթոռի մը վրայ նստած՝ ճամբային եզերքը կը ⁵սպասէր, քանի որ Աստուծոյ տապանակին համար սիրտը կը դողար։ Երբ այդ մարդը՝ քաղաք մտնելով՝ պատահածը պատմեց, ամբողջ քաղաքը աղաղակեց։

Հեղի՝ այդ աղաղակին աղմուկը լսելով՝ ըսաւ. «Ի՞նչ կը նշանակէ այս աղմուկին ձայնը»։ Այդ մարդն ալ շուտով վազեց եկաւ ու պատահածը Հեղիի պատմեց։

Հեղի իննսունութ տարեկան էր. աչքերը այնպէս ⁶մթագնած էին, որ չէր կրնար տեսնել։

Այդ մարդը Հեղիի ըսաւ. «Զօրասիւնին մէջէն եկողը ես եմ. զօրասիւնէն այսօր փախայ»։ Ան ալ ըսաւ. «Որդեա՛կ, ի՞նչ եղաւ»։

⁷Լուր բերողը պատասխանեց. «Իսրայէլ Փղշտացիներուն առջեւէն փախաւ, նաեւ ժողովուրդին մէջ մեծ կոտորած եղաւ. նոյնիսկ քու երկու որդիներդ՝ Ոփնի եւ Փենեհէս՝ մեռան, ու Աստուծոյ տապանակը գրաւուեցաւ»։

Երբ ան Աստուծոյ տապանակը յիշատակեց, Հեղի աթոռէն կռնակի վրայ ինկաւ՝ դրան քով, ⁸ողնայարը կոտրեցաւ եւ մեռաւ, քանի որ ծեր ու ծանրացած մարդ մըն էր։ Ան Իսրայէլի մէջ քառասուն տարի դատաւոր եղած էր։

ՓԵՆԵՀԷՍԻ ԿՆՈՋ ՄԱՀԸ

Անոր հարսը՝ Փենեհէսի կինը՝ յղի էր, ու ծնանելու մօտ։ Երբ Աստուծոյ տապանակին գրաւուելուն եւ իր կեսրայրին ու ամուսինին մեռնելուն լսեց, ծռեցաւ եւ ծնաւ, քանի որ անոր ցաւերը բռնեցին։

գոյժը

Երբ կը մեռնէր, քովը կայնող կիները անոր ըսին. «Մի՛ վախնար, որովհետեւ որդի մը ծնար»։ Բայց ան չպատասխանեց եւ ⁹ուշադրութիւն չդարձուց՝՝։

Տղային անունը ¹⁰Իքաբոդ կոչեց, ըսելով. «Իսրայէլէն փառքը փոխադրուեցաւ»։ (Արդարեւ Աստուծոյ տապանակը գրաւուեցաւ, եւ իր կեսրայրն ու ամուսինը մեռան։)

Ան ըսաւ. «Իսրայէլէն փառքը փոխադրուեցաւ, քանի որ Աստուծոյ տապանակը գրաւուեցաւ»։