1 Samuel 5

Ruth  «  1 Samuel 4  ‹  1 Samuel 5  ›  1 Samuel 6  »  2 Samuel

ՈՒԽՏԻ ՏԱՊԱՆԱԿԸ ՓՂՇՏԱՑԻՆԵՐՈՒՆ ՄԷՋ

Փղշտացիները Աստուծոյ տապանակը գրաւեցին, եւ զայն Աբենեզերէն ¹Ազովտոս տարին։

Աստուծոյ տապանակը առնելով՝ Փղշտացիները զայն Դագոնի տունը տարին ու Դագոնի քով դրին։

Հետեւեալ օրը՝ Ազովտացիները առտուն կանուխ ելան, եւ ահա՛ Դագոն Տէրոջ տապանակին առջեւ՝ երեսի վրայ գետինը ինկած էր. անոնք Դագոնը առին ու դարձեալ իր տեղը դրին։

Հետեւեալ օրն ալ, երբ առտուն՝ կանուխ ելան, ահա՛ Դագոն Տէրոջ տապանակին առջեւ՝ երեսի վրայ գետինը ինկած էր. Դագոնի գլուխն ու ձեռքերուն երկու ափերը կոտրած եւ սեմին վրայ ինկած էին, ու միայն ²Դագոնի մարմինը՝՝ մնացած էր։

(Հետեւաբար Դագոնի քուրմերը եւ բոլոր Դագոնի տունը մտնողները՝ Ազովտոս եղող Դագոնի սեմին վրայ չեն կոխեր մինչեւ այսօր։)

Յետոյ Տէրոջ ձեռքը Ազովտացիներուն վրայ ծանրացաւ, ու զանոնք ³կորսնցուց. Ազովտոսի եւ անոր հողամասին մէջ զանոնք թութքի ուռեցքներով զարկաւ։

Ազովտոսի բնակիչները ասիկա տեսնելով՝ ըսին. «Իսրայէլի Աստուծոյն տապանակը մեր քով թող չմնայ, քանի որ անոր ձեռքը մեր վրայ ու մեր աստուծոյն՝ Դագոնի վրայ ծանրացաւ»։

Հետեւաբար մարդ ղրկեցին, Փղշտացիներուն բոլոր նախարարները իրենց քով հաւաքեցին, եւ ըսին. «Ի՞նչ ընենք Իսրայէլի Աստուծոյն տապանակը»։ Անոնք ալ պատասխանեցին. «Իսրայէլի Աստուծոյն տապանակը Գէթ թող փոխադրուի»։ Ուստի Իսրայէլի Աստուծոյն տապանակը Գէթ փոխադրեցին։

Զայն հոն փոխադրելէն ետք՝ Տէրոջ ձեռքը այդ քաղաքին վրայ եղաւ։ Շատ մեծ խուճապ եղաւ. քաղաքին մարդիկը՝ պզտիկէն մինչեւ մեծը՝ զարկաւ, ու թութքի ուռեցքներով ծածկուեցան։

Հետեւաբար Աստուծոյ տապանակը Ակկարոն ղրկեցին։ Երբ Աստուծոյ տապանակը Ակկարոն հասաւ, Ակկարոնացիները աղաղակելով ըսին. «Իսրայէլի Աստուծոյն տապանակը մեզի ⁴բերին, որպէսզի մեզ ու մեր ժողովուրդը մեռցնեն»։

Ուստի մարդ ղրկելով՝ Փղշտացիներուն բոլոր նախարարները հաւաքեցին եւ ըսին. «Իսրայէլի Աստուծոյն տապանակը ղրկեցէ՛ք, եւ իր տեղը թող վերադառնայ, որպէսզի մեզ ու մեր ժողովուրդը չմեռցնէ»։ Արդարեւ ամբողջ քաղաքին մէջ մահառիթ խուճապ մը կար. Աստուծոյ ձեռքը չափազանց ծանրացաւ հոն,

ու չմեռնող մարդիկը թութքի ուռեցքներով զարնուեցան, եւ քաղաքին աղաղակը երկինք բարձրացաւ։